ចាប់​ពី​ម៉ោង​៣​រសៀល​នេះ​ទៅ ពលរដ្ឋ​បារាំង​និង​បរទេស​ជា​ច្រើន​ម៉ឺន​នាក់ បាន​ប្រមូល​គ្នា​នៅ​កណ្ដាល​រដ្ឋធានី​ប៉ារីស ដើម្បី​ដើរ​សុំ​សន្ដិភាព​បន្ទាប់​ពី​ភេវរកម្ម​កាល​ពី​ថ្ងៃ​ពុធ ទី៧ ខែ​មករា ឆ្នាំ​២០១៥​កន្លង​មក ទៅ​លើ​ទស្សនាវដ្ដី​បារាំង​ឈ្មោះ ឆារលីអេបដូ (Charlie Hebdo) ដែល​ធ្វើ​ឲ្យ​មាន​ស្លាប់​១២​នាក់ និង​៥​នាក់ នៅ​ថ្ងៃ​បន្ត​បន្ទាប់​មក។ ប៉ុន្តែ​ជា​ការ​ជួប​ជុំ​ដើរ​សម្ដែង​មតិ ប្រកប​ដោយ​កិច្ច​ការពារ​សន្ដិសុខ យ៉ាង​ខ្លាំង​ក្លា​ជា​ទី​បំផុត។ កិច្ច​ការពារ​សន្ដិសុខ​ដ៏​ខ្លាំង​សម្រាប់​អ្នក​ចូល​រួម​ទាំង​អស់ ក៏​ដូច​ជា​ការពារ​សុវត្ថិភាព​ឲ្យ​​ប្រធានាធិបតី​បារាំង និង​មេ​ដឹក​នាំ​ធំៗ​មក​ពី​ប្រទេស​ជា​ច្រើន ទាំង​នៅ​ក្នុង​តំបន់​ទាំង​មក​ពី​ទ្វីប​ផ្សេង​ទៀត ដែល​មក​ចូលរួម​ដែរ​នោះ។

កាលពីថ្ងៃសុក្រទី៩ ខែមករា ប្រធានាធិបតីបារាំង លោក ហ្វ្រង់ស័រ ហូឡង់ (François Hollande) បានអំពាវនាវ​ទៅពលរដ្ឋបារាំងទាំងអស់ ឲ្យងើបឈរឡើង នៅថ្ងៃអាទិត្យនេះ ដើម្បីលើកស្ទួយតម្លៃនៃលិទ្ធិប្រជាធិបតេយ្យ និងសេរីភាព។ សូមរំលឹកដែរថា នៅមុនរជ្ជកាលរបស់លោក ហូឡង់ មានតែប្រធានាធិបតីបារាំងតែមួយគត់ ដែលបានចូលរួមក្នុងការប្រមូលផ្ដុំដ៏ធំសម្បើមរបៀបនេះ បើគិតរាប់ពីប្រទេសបារាំងបានឈ្នះ​សង្គ្រាម​លោក​លើក២ ក្នុងឆ្នាំ១៩៤៥នោះមក។ ប្រធានាធិបតីតែមួយនោះ គឺលោក ហ្វ្រង់ស៊័រ មីតេរ៉ង់ (François Mitterrand) ដែលបានចូលរួមនៅក្នុងការប្រមូលផ្ដុំដ៏សម្បើមដូច្នេះ នៅថ្ងៃទី១៤ ខែឧសភាព ឆ្នាំ១៩៩០ ដើម្បីប្រឆាំង​នឹង​ការ​ប្រកាន់ពូជសាសន៍ និងការរើសអើង។

គណបក្សស្ដាំនិយមជ្រុលបារាំង ហៅកាត់ថា FN មិនត្រូវបានអញ្ជើញឲ្យចូលរួមក្នុងការដើរនេះទេ។ អ្នករៀបចំ​កម្មវិធី បានវាយតម្លៃថា គណបក្សមួយនេះបានបង្កឲ្យមានការបែងចែកប្រទេសបារាំង និងបង្កឲ្យមានការ​ប្រកាន់រើសអើង រវាងពលរដ្ឋដែលកាន់សាសនាអ៊ីស្លាម ព្រមទាំងប្រើប្រាស់នូវការបំភិតបំភ័យ ដើម្បីចំណេញ​នយោបាយរបស់ក្រុមខ្លួន។ ប៉ុន្តែការលើកឡើងនេះ ត្រូវបានប្រធានគណបក្ស លោកស្រី ម៉ារីន ឡឺពែន (Marine Le Pen) បដិសេធ និងបរិហាពីការចាត់ទុកក្រុមលោកស្រី ដាច់ដោយឡែកពីគ្នានេះ។ លោកស្រី​និយាយថា «គ្មានការបង្រួបបង្រួមជាតិទេ»។ ចំណែកអនុប្រធានគណបក្សរបស់លោកស្រីវិញ បានវាយ​តម្លៃ​ទៀតថា ការដើរនៅថ្ងៃនេះ គ្រាន់តែជាជួបប្រជុំគ្នារវាងក្រុមបក្សពួកមួយក្រុមប៉ុណ្ណោះ។

ចំពោះមេដឹកនាំបរទេសវិញ គេសង្កេតឃើញប្រទេសនៅជុំវិញបារាំង សុទ្ធតែបានមកចូលរួមក្នុងការដើរ​នេះ​ទាំងអស់ ក្នុងនោះ រាប់តាំងពីមេដឹកនាំនៃប្រទេសប៊ែលហ្សិក ប្រទេសហូឡង់ ជាពិសេសអគ្គទេសា​ភិបាល​អាល្លឺម៉ង់ លោកស្រី​ អង់ជឺឡា ម៉ែរគែល (Angela Merkel) និងប្រធានក្រុមប្រឹក្សារដ្ឋមន្ត្រីនៃប្រទេសអ៊ីតាលី លោក ម៉ាតេអូ រ៉េនហ្សី (Matteo Renzi) បូករួមនឹងមេដឹកនាំនៃសហគមន៍អ៊ឺរ៉ុបជាច្រើននាក់។ រីឯនាយក​រដ្ឋ​មន្ត្រី​នៃប្រទេសអេស្ប៉ាញ លោក ម៉ារីយ៉ាណូ រ៉ាហ័យ (Mariano Rajoy) និងនាយករដ្ឋមន្ត្រីនៃចក្រភពអង់គ្លេស លោក ដេវីដ កាមើរូន (David Cameron) ដែលសុទ្ធសឹងជាតំណាងឲ្យប្រទេសដែលធ្លាប់រងគ្រោះ នឹងការ​វាយប្រហារដោយភេវរកម្មនោះ ក៏បានមកចូលរួមដែរ។

ចំពោះសហរដ្ឋអាមេរិកវិញ បានបញ្ជូនតំណាងរបស់ខ្លួនមកមួយរូប នោះគឺរដ្ឋមន្ត្រីក្រសួងយុត្តិធម៌ និងមហាផ្ទៃ លោក អេរិច ហូដ័រ (Eric Holder) ខណៈសហព័ន្ធរ៉ូស្សីបានបញ្ជូនលោកប្រមុខការទូត រដ្ឋមន្ត្រីការបរទេស លោក ស៊ែហ្គៃ ឡាវ្រៅ (Sergueï Lavrov) មកចូលរួមក្នុងពិធីនេះ តាមការអញ្ជើញរបស់ប្រធានាធិបតីបារាំង។ មិនត្រឹមតែប៉ុណ្ណឹង នាយករដ្ឋមន្ត្រីនៃប្រទេសអ៊ីស្ត្រាអែល លោក ប៊េនចាមីន ណេតាន់យ៉ាហ៊ូ (Benjamin Netanyahu) ប្រធានរដ្ឋប៉ាឡេស្ទីន លោក ម៉ាមូដ អាបាស (Mahmoud Abbas) មេដឹកនាំមួយចំនួនទៀត នៅ​ក្នុងតំបន់មជ្ឈឹមបូពា និងប្រធានាធិបតី នៃប្រទេសចំនួន៨ នៅទ្វីបអាហ្វ្រិក ក៏បានចូលមកដើររួម​គ្នានៅ​ប៉ារីស​ថ្ងៃនេះដែរ។ នេះគេមិនទាន់រាប់ផងទេ ពីអង្គការអន្តរជាតិជាច្រើនទៀត ដូចជាអង្គការសហប្រជាជាតិ អង្គការ​អូតង់ សម្ព័ន្ធអារ៉ាប់។ល។ សុទ្ធតែបានបង្ហាញពីសេចក្ដីសម្រេចចិត្តរួមគ្នា ពិភពលោកនេះចង់រស់នៅក្នុង​សុខ​សន្តិភាព និងគ្មានការគម្រាមកំហែង៕

ទស្សនាវដ្ដីមនោរម្យ.អាំងហ្វូ នឹងជូនព័ត៌មានបន្ថែម ពីព្រឹត្តិការណ៍នេះ។