បើមិនចូលចិត្ត ឬធ្វើនយោបាយមិនឈ្នះគេ អញ្ចឹងត្រូវតែរកល្បិច និងយុទ្ធវិធីគ្រប់យ៉ាង ដើម្បីនិយាយ​បង្កាច់​បង្ខូច ឬបង្កើតបញ្ហាផ្សេង ដើម្បីបំបែរចំណាប់អារម្មណ៍ឬ? ហើយ... វាមិនមែនជាលើកទីមួយ នោះទេ។ សមាជិក​រដ្ឋាភិបាល របស់លោកប្រធានាធិបតី ហ្វ្រង់ស៊័រ ហូឡង់ (François Hollande) និងជារដ្ឋមន្ត្រីក្រសួង​អប់រំ អ្នកស្រី ណាចា វ៉ឡូប៊ែនកាសឹម បានរងការវាយប្រហារ តាមប្រព័ន្ធផ្សព្វផ្សាយជាថ្មីទៀត ទាក់ទង​នឹង​សម្លៀក​បំពាក់ និងការផាត់មុខមាត់ របស់អ្នកស្រី នៅក្នុងវេទិកាសួរឆ្លើយមួយ នៅរដ្ឋសភាជាតិបារាំង។

ចុះផ្សាយនៅលើទំព័រមុខ នៃទស្សនាវដ្ដីឡឺព័ង (Le Point) ដ៏ល្បីរបស់ប្រទេសបារាំង អ្នកធ្វើអត្ថាធិប្បាយ​ព្រឹត្តិការណ៍ លោក ហ្សង់ប៉ូល ប្រ៊ីគីលី (Jean-Paul Brighelli) ដែលជាសាស្ត្រាចារ្យ និងជាសមាជិក​មួយ​រូប នៃ​គណបក្ស«ប្រទេសបារាំងក្រោកឈរ (Debout la France - មាននិន្នាការស្ដាំនិយមជ្រុល)»នោះ បាន​យក​អ្នកស្រីរដ្ឋមន្ត្រី ដែលមានអាយុ៣៨ឆ្នាំ មកសរសេរបរិហា ទាក់ទងនឹងនយោបាយរបស់អ្នកស្រី ក្នុងកំណែ​ទម្រង់​វិស័យ​អប់រំបារាំង។ ប៉ុន្តែការរៀបរាប់នោះ បានជ្រុលហួសទៅដល់បែបផែន នៃការស្លៀកពាក់ និងការ​ផាត់​មុខ​មាត់ ប្រកបដោយការទាក់ទាញ របស់អ្នកស្រី។

ឃ្លានោះ បានសរសេរថា៖ «គឺនៅក្នុងភាពយន្ដ "Annie Hall" ដែលសមិទ្ធិករភាពយន្ដ លោក "Woody Allen" បានបង្កើតគំនិត បែបអ្នករស់នៅរដ្ឋកាលីហ្វ័នី នូវ "LVS" ឬការបង្ហាញឲ្យឃើញ នូវខោអាវទ្រនាប់ ដ៏ត្រេក​ត្រអាល។ កាលពីថ្ងៃពុធ (សប្ដាហ៍មុន ក្នុងរដ្ឋសភាបារាំង) អ្នកស្រី ណាចា វ៉ាឡូប៊េលកាសឹម បានធ្វើ​បច្ចុប្បន្នភាព នៃគំនិត "LVS" ជំនាន់ទីពីរ ឬការបង្ហាញឲ្យឃើញ នូវអាវទ្រនាប់ ដ៏ស្រៀវស្រើបនេះ​ឡើង​វិញ។ ជាយុទ្ធសាស្ត្រ​មួយ ដ៏ចាស់​យូរលង់ ដូចជាការផាត់បបូរមាត់ ពណ៌ក្រហមឆេះ និងបន្ដោងក្រវិល ពាក់​នឹង​ត្រជៀក (...)។»

ការវាយប្រហារនេះ បានធ្វើឲ្យមានប្រតិកម្មយ៉ាងខ្លាំង ពីមជ្ឈដ្ឋាននយោបាយបារាំង។ រដ្ឋលេខាធិការ​ទទួល​បន្ទុកផ្នែកសិទ្ធិស្ត្រី អ្នកស្រី ប៉ាស្កាល់ ប៊ស្តារ (Pascal Boistard) បានប្រតិកម្មទៅនឹងអត្ថបទនេះ ដោយចាត់​ទុក​​ការលើកឡើងនេះ ថាបាន«ជេរប្រទេសផ្ដាសារ» ទៅដល់ស្ត្រីគ្រប់គ្នាទាំងអស់៕