សម រង្ស៊ី ប្រតិកម្មនឹងចំណាត់ការ ប្រឆាំងបន្ទប់ស្ថានការណ៍
ដំណឹងនៃការថ្លែងខ្លាំងៗ របស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា ថានឹងចាត់វិធានការ លើបន្ទប់ស្ថានការណ៍ ដែលជាបណ្ដុំនៃអង្គការសង្គមស៊ីវិល ដើម្បីឃ្លាំមើលការបោះឆ្នោតនោះ មិនបានធ្វើឲ្យលោក សម រង្ស៊ី អតីតប្រធានគណបក្សសង្គ្រោះជាតិ ដំអក់យូរក្នុងការធ្វើប្រតិកម្មទេ។
មេដឹកនាំប្រឆាំងធំជាងគេ របស់ប្រទេសកម្ពុជា បានប្រើប្រាស់ ទំព័រទ្វីសធើររបស់លោក សរសេរតបទៅនឹងចំណាត់ការ របស់នាយករដ្ឋមន្ត្រី យ៉ាងដូច្នេះថា៖ «នេះ ជាការប៉ុនប៉ងយ៉ាងច្បាស់ក្រឡែត ក្នុងការគំរាមកំហែង ទៅលើក្រុមអង្គការសង្គមស៊ីវិល ដែលធ្វើការងារ នៅក្នុងបុព្វហេតុដ៏ត្រឹមត្រូវ»។
នៅព្រឹកថ្ងៃទី២៦ ខែមិថុនា នេះ ក្នុងពិធីរំលឹកខួប៦៦ឆ្នាំ នៃការបង្កើតគណបក្សប្រជាជនកម្ពុជា នៅមជ្ឈមណ្ឌលកោះពេជ្រ លោក ហ៊ុន សែន បានបញ្ជាផ្ទាល់មាត់ ទៅកាន់លោក ស ខេង រដ្ឋមន្រ្តីក្រសួងមហាផ្ទៃ - អនុប្រធានគណបក្សប្រជាជនកម្ពុជា [...]
