សម រង្ស៊ី ប្រតិកម្ម​នឹង​ចំណាត់​ការ ប្រឆាំង​បន្ទប់​ស្ថានការណ៍

ភ្លាមៗ បន្ទាប់ការថ្លែង របស់លោកនាយករដ្ឋមន្ត្រី ហ៊ុន សែន ប្រើវិធានការ ប្រឆាំងបន្ទប់ស្ថានការណ៍បោះឆ្នោតរួច លោក សម រង្ស៊ី អតីតប្រធានគណបក្សសង្គ្រោះជាតិ បានធ្វើប្រតិកម្ម ពីបរទេសមកថា នេះ គឺជាការគំរាមកំហែង យ៉ាងច្បាស់ក្រឡែតមួយ។
សម រង្ស៊ី ប្រតិកម្ម​នឹង​ចំណាត់​ការ ប្រឆាំង​បន្ទប់​ស្ថានការណ៍
លោក សម រង្ស៊ី អតីតប្រធានគណបក្សសង្គ្រោះជាតិ។ (រូបថត MONOROOM.info)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី២៨ មិថុនា ២០១៧
  • កែប្រែចុងក្រោយ: June 28, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ដំណឹងនៃការថ្លែងខ្លាំងៗ របស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា ថានឹងចាត់វិធានការ លើបន្ទប់ស្ថានការណ៍ ដែលជាបណ្ដុំនៃអង្គការសង្គមស៊ីវិល ដើម្បីឃ្លាំមើលការបោះឆ្នោតនោះ មិនបានធ្វើឲ្យលោក សម រង្ស៊ី អតីតប្រធានគណបក្សសង្គ្រោះជាតិ ដំអក់យូរក្នុងការធ្វើប្រតិកម្មទេ។

មេដឹកនាំប្រឆាំងធំជាងគេ របស់ប្រទេសកម្ពុជា បានប្រើប្រាស់ ទំព័រទ្វីសធើររបស់លោក សរសេរតបទៅនឹងចំណាត់ការ របស់នាយករដ្ឋមន្ត្រី យ៉ាងដូច្នេះថា៖ «នេះ ជាការប៉ុនប៉ងយ៉ាងច្បាស់ក្រឡែត ក្នុងការគំរាមកំហែង ទៅលើក្រុមអង្គការសង្គមស៊ីវិល ដែលធ្វើការងារ នៅក្នុងបុព្វហេតុដ៏ត្រឹមត្រូវ»។

នៅព្រឹកថ្ងៃទី២៦ ខែមិថុនា នេះ ក្នុងពិធី​រំលឹកខួប៦៦ឆ្នាំ នៃការបង្កើតគណបក្សប្រជាជនកម្ពុជា នៅមជ្ឈមណ្ឌល​កោះពេជ្រ លោក ហ៊ុន សែន បានបញ្ជាផ្ទាល់មាត់ ទៅកាន់លោក ស ខេង រដ្ឋមន្រ្តី​​ក្រសួង​មហាផ្ទៃ - អនុប្រធានគណបក្សប្រជាជនកម្ពុជា ឲ្យពិនិត្យផ្លូវច្បាប់ ដើម្បីចាត់វិធានការ ប្រឆាំងបន្ទប់ស្ថានការណ៍នេះ ដោយលោកបានហៅស្ថាប័នមួយនេះ ថាកំពុងធ្វើខ្លួនស្ថិតនៅ «ក្រៅសំណាញ់ច្បាប់» និងជាទីតាំងបញ្ជា ឲ្យមាន​«បដិវត្តន៍​ពណ៌»។

បញ្ជាក្នុងរបស់លោក ហ៊ុន សែន ក្នុងថ្ងៃនេះ បានធ្វើឡើង ក្រោយការព្រមានរបស់លោក កាល​ពី​ថ្ងៃ​ទី២៦ ខែមិថុនា ទៅកាន់បន្ទប់​ស្ថានការណ៍ ដោយប្រាប់ស្ថាប័នេះ «ឲ្យល្មមៗបានហើយ»។ នៅពេលនោះ លោកនាយករដ្ឋមន្ត្រីបានថ្លែងឡើងថា៖ «សុំ​បន្ទប់​ស្ថានការណ៍​ហ្នឹង​ល្មមៗ បាន​ហើយ​អស់​លោក។ ខ្ញុំ​ក៏​ដឹង​ដែរ អស់​លោក​រៀបចំ​យ៉ាង​ម៉េច​អី យ៉ាង​ម៉េច​នោះ ហើយ​រៀបចំ​ផែនការ​អាក្រក់​ណាស់ បាន​ជា​ខ្ញុំ​ថ្កោលទោស​អ្នក​ជ្រៀតជ្រែក​កិច្ចការ ផ្ទៃក្នុង​កម្ពុជា។»។

មន្ត្រីមួយរូប​របស់បន្ទប់ស្ថានការណ៍ លោក សំ គន្ធាមី មានប្រសាសន៍ ប្រាប់វិទ្យុសម្លេងប្រជាធិបតេយ្យ (VOD) ថា ការលើកឡើងរបស់ លោក ហ៊ុន សែន គឺជាការយល់ច្រឡំ ដោយហេតុថា បន្ទប់ស្ថានការណ៍ ជាបណ្តុំអង្គការសមាគម ដែលស្របច្បាប់ បង្កើតឡើងរយៈពេលខ្លី ដើម្បីឃ្លាំមើលដំណើរបោះឆ្នោត តែប៉ុណ្ណោះ។

លោកថា៖ «បន្ទប់ស្ថានការណ៍នេះ បង្កើតតែរយៈពេលខ្លីទេ ធ្វើការជាមួយគ្នា ជាក្រុមហ្នឹង តែរយៈពេលខ្លីមួយ សម្រាប់លើដំណើរការបោះឆ្នោត។ ឥលូវចប់បោះឆ្នោត យើងរំសាយវិញអស់ហើយៗ ពួកយើងគ្មានគំនិត ធ្វើជាមូលដ្ឋានស្អីទេ។ ខ្ញុំសូមបដិសេធថា អត់មានជាមូលដ្ឋាន ជាបដិវត្តិពណ៌ទេ នេះជាចម្លើយរបស់ខ្ញុំ ។ គាត់យល់ច្រឡំហើយ!»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...