គន់ គីម នៅ​ពី​ក្រោយ​ក្រុមហ៊ុន​ចិន «UDG» ដែល​ប្ដឹង​ឈូស​ផ្ទះ​ពលរដ្ឋ​នៅ​កោះកុង?

លោក គន់ គីម អតីតអគ្គមេបញ្ជាការ​រង និង​ជា​នាយសេនាធិការ​ចម្រុះ ​នៃ​អគ្គបញ្ជាការដ្ឋាន​ នៃកងយោធពល​ខេមរភូមិន្ទ បានរងការចោទប្រកាន់ថា លោកនៅពីក្រោយក្រុមហ៊ុនចិនមួយ ឈ្មោះ «UDG» ដែលបង្កើតឡើង ដើម្បីយកមុខចេញទៅអភិវឌ្ឍ តំបន់ឆ្នេរដ៏សម្បើមមួយ នៅក្នុងខេត្តកោះកុង។​
គន់ គីម នៅ​ពី​ក្រោយ​ក្រុមហ៊ុន​ចិន «UDG» ដែល​ប្ដឹង​ឈូស​ផ្ទះ​ពលរដ្ឋ​នៅ​កោះកុង?
លោក គន់ គីម អតីតអគ្គមេបញ្ជាការរង នៃកងយោធពលខេមរភូមិន្ទកម្ពុជា។ (រូបថតលើហ្វេសប៊ុក)
Loading...
  • ដោយ: មនោរម្យ.អាំងហ្វូ ([email protected]monoroom.info) - ប៉ារីស ថ្ងៃទី០៨ កញ្ញា ២០១៨
  • កែប្រែចុងក្រោយ: September 09, 2018
  • ប្រធានបទ: ជម្លោះ​ដីធ្លី
  • អត្ថបទ: មានបញ្ហា?
  • មតិ-យោបល់

ពលរដ្ឋ ដែលអះអាងថា ខ្លួនជាជនរងគ្រោះ ព្រោះការឈូសឆាយទន្ទ្រាន រំលោភយកដីផ្ទះសម្បែង ពីសំណាក់ក្រុមហ៊ុនចិន ឈ្មោះ «UDG (Union Development Group)» និងដែលកំពុងរស់នៅ សេសសល់ចុងក្រោយ នៅលើដីដែលមានជម្លោះ បានថ្លែងថា អតីតអគ្គមេបញ្ជាការ​រង និង​ជា​នាយសេនាធិការ​ចម្រុះ ​នៃ​អគ្គបញ្ជាការដ្ឋាន​ នៃកងយោធពល​ខេមរភូមិន្ទ លោក គន់ គីម និងអតីតរដ្ឋមន្ត្រីក្រសួងបរិស្ថាន លោក ម៉ុក ម៉ារេត ធ្លាប់បានចុះ ទៅចាត់ចែង​គម្រោងអភិវឌ្ឍ នៅលើតំបន់មានជម្លោះ មុននឹងតំបន់នោះ ត្រូវបានរដ្ឋាភិបាលលោក ហ៊ុន សែន ផ្ដល់ទៅឲ្យក្រុមហ៊ុន​ចិន​ខាងលើ សម្រាប់ការអភិវឌ្ឍរយៈពេល៩៩ឆ្នាំ ដែលបង្ក​ឲ្យមានការឈូសឆាយ និងការប្ដឹងផ្ដល់ យ៉ាង​ចម្រូងសម្រាស់។

អ្នកស្រី ជៀន ក្រៀប ត្រូវបានអង្គការមាតាធម្មជាតិ ធ្វើកិច្ចសម្ភាសមួយ ថតជាវីដេអូ និងបង្ហោះតាមសម្លេងដើម ទាំងស្រុងថា៖ «មុនដំបូងហ្នឹង មាន ម៉ុក ម៉ារេត មកវត្តពយជប៉ុនហ្នឹង លើកទីមួយ។ លើកទីពីរ មាន គន់ គីម - ម៉ុក ម៉ារេត មកពយស្ងាវ មកសិក្សារឿងដីចម្ការ។ ម៉ុក ម៉ារេត - គន់ គីម ហ្នឹងហៅប្រជាជនម៉ាស្រុក គីរីសាគរ ហ្នឹងទៅទាំងអស់ កន្លែងពយស្ងាវហ្នឹង។ ដោះស្រាយថា មួយហិចតា ៨០០០ដុល្លារ។ ដល់ការពិត បានតែ១៥គ្រួសារទេ មួយហិតា ៨០០០ដុល្លារហ្នឹង។ ក្រៅពីនោះមក ២៥០ បាន ១០០០ បាន ៥០០ យូរទៅបាន១៥០ អាណាមិនយក អត់!»។

សម្រាប់លោក អ៊ុក សាវ៉ន ពលរដ្ឋមួយរូបទៀត នៅក្នុងជម្លោះដីធ្លីនោះ បានថ្លែងឡើងថា៖ «ខ្ញុំសួរទៅ[ព្រះរាជអាជ្ញា]វិញ ខ្ញុំថា ក្រុមហ៊ុនទើបមក ២០០៨ ទេ រួចចុះខ្ញុំ តាំងពីឆ្នាំ ១៩៨៦ឯណោះ ហើយចុះហេតុម៉េច ក៏មកដាក់កំហុសឲ្យខ្ញុំ ថាខ្ញុំនៅលើដីក្រុមហ៊ុន? វាអត់ទំនង អត់យុត្តិធម៌ទេ។ បាន [ព្រះរាជអាជ្ញា] ថា យើងសព្វថ្ងៃនៅលើដី ដែលរដ្ឋាភិបាលជួលឲ្យក្រុមហ៊ុន បើមិនចេញក៏ឈូស បើចេញក៏ឈូស។»។

កាល​ពីខែឧសភា ​ឆ្នាំ​២០០៨ ក្រុមហ៊ុន​ ​«UDG» ​បាន​ទទួល​ដី​សម្បទាន​សេដ្ឋកិច្ច​ សរុប​ចំនួន ​៤៥.១០០​ហិកតា ​ពី​រដ្ឋាភិបាលលោក ហ៊ុន សែន ​ដើម្បី​សាងសង់​​ទី​ក្រុង​ទេសចរណ៍​ដ៏​ធំ​មួយ​ ដែល​ត្រូវ​ចំណាយ​ទឹក​ប្រាក់ ​៣,៨​ពាន់​លាន​ដុល្លារ។​ គម្រោង​ទីក្រុង​ទេសចរណ៍​ ដ៏​សម្បើម​នេះ​ កំពុង​ដំណើរការ​ នៅ​ចំ​កណ្ដាល​ឧទ្យាន​ជាតិ​បុទុមសាគរ​ ក្នុង​ខេត្ត​កោះកុង​។

កញ្ញា លីម គីមស័រ ដែលតំណាងឲ្យអង្គការមាតាធម្មជាតិ បានចោទជាសំនួរឡើងថា៖ «តើរបបសម្ដេច ហ៊ុន សែន ផ្ដល់សិទ្ធិវិនិយោគ ទៅឲ្យក្រុមហ៊ុនចិនមួយនេះ ក្នុងគោលបំណងអ្វី? ឬមួយ គ្រាន់តែជារូបភាព​អភិវឌ្ឍ​ក្លែងបន្លំ ដើម្បីផ្ដល់ឱកាស ​ឲ្យមន្ត្រីមានអំណាច ឃុបឃិតគ្នា លួចឆក់ប្លន់ដីធ្លី របស់ប្រជាពលរដ្ឋ?»។

នេះ ជាការលើកឡើងថ្មី និងចុងក្រោយបំផុត ពីសំណាក់ក្រុមពលរដ្ឋខាងលើ ខណៈសំនុំរឿងដីធ្លី ក្នុងតំបន់ពយជប៉ុន បានផ្ទុះកើតមានជាហូហែរ រាប់ទាំងព្រឹត្តិការណ៍បិទផ្លូវ តាំងពីចុងឆ្នាំ២០១១ និងការសន្យាក្នុងខែសីហា ឆ្នាំ២០១៥ ពីសំណាក់លោក វ៉ា សំអឿន ទីប្រឹក្សា​នាយក​រដ្ឋមន្ត្រី និង​ជា​អនុប្រធាន​អាជ្ញាធរ​​ដោះស្រាយ​វិវាទ​​ដីធ្លី​ ថ្នាក់​ជាតិ ដែលអះអាងថា នឹង​យក​រឿងរ៉ាវ​ទាំង​នេះ​ ទៅ​ប្រាប់​លោក​ ហ៊ុន សែន។

ក្នុងពេលភ្លាមៗ មិនអាចស្វែងរកប្រតិកម្ម ពីលោក គន់ គីម និងលោក ម៉ុក ម៉ារេត តបនឹងការចោទសួរ ខាងលើនេះបានទេ។ លោក គន់ គីម ទើបនឹងត្រូវបានលោក ហ៊ុន សែន តម្លើងឋានៈលោក ជា«ទេសរដ្ឋមន្ត្រី» បន្ទាប់ពីលោកបានចាកចេញ ពីតំណែងជា «មេទ័ពរង» ទៅធ្វើជាតំណាងរាស្ត្រវិញនោះ។

មន្ត្រី​អង្គការ​ឃ្លាំមើល​សិទ្ធិមនុស្ស ​លីកាដូ​ ប្រចាំ​ខេត្ត​កោះកុង​ លោក ហួរ អ៊ីន ត្រូវបានវិទ្យុសម្លេងសហរដ្ឋអាមេរិក (​VOA) ស្រងសំដី កាលពីចុងខែឧសភាកន្លងទៅ ថាសព្វថ្ងៃនេះ នៅលើតំបន់ពយជប៉ុន ក្នុង​ភូមិ​ព្រែកស្មាច់​ ឃុំ​កោះ​ស្តេច​ ស្រុក​គិរីសាគរ​ នៅមានសេសសល់ពលរដ្ឋរស់នៅ ចំនួនបួនគ្រួសារ។ ប៉ុន្តែអង្គការមាតាធម្មជាតិ បានអះអាង​ក្នុងពេលនេះថា នៅសល់តែ៣គ្រួសារប៉ុណ្ណោះ ដែលមិនព្រមចាកចេញ​ពីលំនៅដ្ឋាន ដោយសារពួកគេ មិនអាចបោះបង់ធនធានធម្មជាតិ និងផ្នូរដូនតា របស់ពួកគេបាន៕

 
Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...