ប្រជាពលរដ្ឋជា៥០នាក់ មកពីភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ដែលមានទំនាស់ដីធ្លី​ដ៏រ៉ុំារ៉ៃ​ជាមួយក្រុមហ៊ុន ខេឌីស៊ីអន្តរជាតិ របស់លោកស្រីជា ខេង ភរិយាលោកស៊ុយ សែម រដ្ឋមន្ត្រីក្រសួងឧស្សាហកម្ម បាន​អមតំណើរតំណាងរបស់ខ្លួន៥នាក់ មកឆ្លើយបំភ្លឺនៅសាលាដំបូងរាជធានីភ្នំពេញ ទាក់ទិនទៅនិងបណ្តឹងរបស់ខ្លួន​ប្តឹងទាមទារយកដីរបស់ពួកគេមកវិញ។

សាលាដំបូងរាជធានីភ្នំពេញ។ (រូបថត MONOROOM.info/ O. Bory)

ជម្លោះដីធ្លី - លោក រាជ ស៊ីម៉ា តំណាងអ្នកភូមិឡពាង ដែលបានឈរជូបជុំនៅខាងមុខ សាលាដំបូងរាជធានីភ្នំពេញ​បានមានប្រសាសន៍ប្រាប់ទស្សនាវដ្តី មនោរម្យ.អាំងហ្វូ ថា ពលរដ្ឋរបស់ពួកលោក ដែលជាអ្នករងគ្រោះ​ដោយសារ​ការបណ្តេញចេញ និងឈូសឆាយផ្ទះសម្បែង ព្រមទាំងយកដីស្រែពីសំណាក់ក្រុមហ៊ុន ខេឌីស៊ីអន្តរជាតិ របស់​លោកស្រី ជា ខេង បានប្តឹងទៅសាលាដំបូងខេត្តកំពង់ឆ្នាំង ប៉ុន្តែគេពុំព្រមទទួលបណ្តឹងរួមរបស់ពួកលោកទេ ដោយ​ទាមទារឲ្យបំបែកពាក្យបណ្តឹង ដោយពួកគាត់ពុំមានលទ្ធភាពបង់ពន្ធប្រថាប់ត្រា លើពាក្យបណ្តឹងទើបនាំគ្នា​ឡើង​មកដាក់ពាក្យបណ្តឹង នៅសាលាដំបូងរាជធានីភ្នំពេញ កាលពីថ្ងៃទី ៨ ខែវិច្ឆិកា ឆ្នាំ២០១១។

លោករាជ ស៊ីម៉ា បានថ្លែង​ឲ្យដឹង​ទៀតថា៖ «យើងគ្មានទាទារអ្វីក្រៅពីដីស្រែរបស់យើងនោះទេ ហើយគ្រាន់តែរឿង​ទំនាស់​នោះក្រុមហ៊ុន ប្តឹងពលរដ្ឋឡើងតុលាការ ដោយចោទប្រកាន់ពីបទ ប្លន់និងសម្លាប់មនុស្ស តើយើងជា​ពលរដ្ឋ​ទៅប្លន់ទាហានយ៉ាងម៉េច»។

លោកបានថ្លែងបញ្ជាក់ថា នៅក្នុងសុំណុំរឿងនេះ ដោយសារតែមានការចាប់តំណាង ដាក់ពន្ធនាគាររហូតដល់៦នាក់ ជាបន្តបន្ទាប់មក ធ្វើឲ្យពលរដ្ឋខ្លះលះបង់ចោលការតស៊ូរបស់ពួកគេ ហើយរហូតមកដល់ពេលនោះ មានប្រជាជន​តែ​ចំនួន៥២គ្រួសារប៉ុណ្ណោះ ដែលបន្តតស៊ូប្រឆាំងជាមួយក្រុមហ៊ុននៅលើផ្ទៃដី ១១០ ហិកតា។ លោកបាននិយាយថា៖ «ពួកខ្ញុំស៊ូស្លាប់ មិនបោះបង់ចោល ការតវ៉ាប្រឆាំងក្រុមហ៊ុននោះទេ»។

អ្នកស្រី ឈិត ថន អាយុ ៥៥ ភរិយា របស់លោកស សុង ដែលត្រូវបានក្រុមហ៊ុនប្តឹង ចាប់ដាក់ពន្ធនាគារ​អស់​រយៈ​ពេល​ជាង ៦ឆ្នាំ ដែលទើបតែរួចពីពន្ធនាគារកាលពីចុងឆ្នាំ ២០១៣ នោះបានថ្លែងឲ្យដឹងថា ពលរដ្ឋជាម្ចាស់ដី​ តែ​ក្រុមហ៊ុនថាពលរដ្ឋរស់នៅលើដីស្របច្បាប់របស់គេ ដូច្នេះហើយពួកអ្នកស្រីត្រូវតែតវ៉ារហូតដល់ទីបញ្ចប់។ អ្នកស្រី​បានថ្លែងឲ្យដឹងថា៖ «លោកជំទាវនោះសាហាវណាស់។ គាត់បានបញ្ជារថាបើអ្នកណាក្បាលរឹង គឺចាប់ដាក់គុកឲ្យ​អស់ តែពួកខ្ញុំមិនខ្លាចគុកទេ ពីព្រោះវាអស់អីរលីងទៅហើយ។ ខ្ញុំសង្ឃឹមថាតុលាការភ្នំពេញ នឹងផ្តល់យុត្តិធម៌​ដល់​ពួក​យើង។»

គួររំលឺកផងដែរថា ទំនាស់ដីធ្លីដ៏រ៉ាំរ៉ៃរវាងប្រជាជន និងក្រុមហ៊ុន KDC អន្តរជាតិ ដែលបានឈូសឆាយដី​អ្នកភូមិ​ជាង​១៤០ហិកតា បានចាប់ផ្តើមនៅក្នុងឆ្នាំ ២០០២ ហើយស្ថានភាពបានផ្ទុះរឹតតែធំនៅក្នុងឆ្នាំ២០០៦ នៅពេលដែល​ប្រជាជនចំនួន១៣នាក់ បានកំពុងរងនូវការចោទប្រកាន់ ពីបទបរិហាកេរ្តិ៍ និងរំលោភដីមានកម្មសិទ្ធិ ហើយពលរដ្ឋ​៦នាក់ ត្រូវបានក្រុមហ៊ុនប្តឹងចាប់ដាក់ពន្ធនាគារ។

ពុំអាចទំនាក់ទំនងលោក មាស ចាន់ពិសិដ្ឋ ព្រះរាជអាជ្ញាសាលាដំបូងរាជធានីភ្នំពេញដើម្បីធ្វើការអត្ថាធិប្បាយ បានទេ។

យោងតាមរបាយការណ៍ របស់សមាគមនការពារសិទ្ធិមនុស្ស អាដហុក ដែលបានចេញផ្សាយកាលពីខែកុម្ភៈ ឆ្នាំ ២០១៣ ដែលមានមានចំណង់ជើងថា«ផ្លូវបត់» បានឲ្យដឹងថា ក្នុងឆ្នាំ ២០១២ សមាគមអាដហុក បានទទួលវិវាទដីធ្លី​ចំនួន៧០ករណី ប៉ះពាល់លើផ្ទៃដី ១០១, ៤០៨ ហិកតា និងប្រជាពលរដ្ឋចំនួន១០,៦៨៩ គ្រួសារ។

លោក ចាន់ សុវ៉េត មន្ត្រីស៊ើបអង្កេតជាន់ខ្ពស់ សមាគមនអាដហុក បានថ្លែងឲ្យដឹងថា នៅក្នុងទំនាស់ដីធ្លី​នេះ អាជ្ញាធរ​គួរតែផ្តល់យុត្តិធម៌ដល់ប្រជាពលរដ្ឋ ពីព្រោះវាបានអូសបន្លាយអស់រយៈពេលជាច្រើនឆ្នាំមកហើយ ហើយពលរដ្ឋ​ក៏​ពុំអាចធ្វើស្រែចំការបានដែរ ដែលបណ្តាលឲ្យពួកគាត់ធ្វើចំណាកស្រុកទៅធ្វើការនៅប្រទេសថៃ។ លោកបាន​ថ្លែង​ឲ្យ​ដឹងទៀតថា៖ «តាមការសង្កេតកន្លងមក គឺតុលាការផ្តល់យុត្តិធម៌សម្រាប់តែអ្នកមាន និងអ្នកមានអំណាចតែប៉ុណ្ណោះ ចំនែកឯពលរដ្ឋក្រីក្រ គឺជាជនរងគ្រោះរហូត»៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី ២៧ កុម្ភៈ ២០១៤