ការរាំគ្រវីគូទ​ហើយយកកំបេះគូទ មកត្រដុសជាមួយ​នរណាម្នាក់ ជាសាធារណៈ និងដោយគ្មាន​ការ​អនុញ្ញាត​នោះ គឺជាបទល្មើសខាងផ្លូវភេទមួយ នៅសហរដ្ឋអាមេរិក។ ស្ត្រីម្នាក់ បានធ្វើសកម្មភាពគ្រវីគូទនេះ ដោយ​មាន​ឃុបឃិត ពីមិត្តភ័ក្រស្រីរបស់នាងមួយរូបទៀត ដាក់បុរសជាគ្រូបង្រៀនម្នាក់ កាលពីថ្ងៃទី៧ ខែតុលា នៅក្នុង​ផ្សារ​​លក់​ទំនិញ នៃស្ថានីយ៍ចាក់ប្រេងមួយ ក្នុងរដ្ឋធានីវ៉ាស៊ីនតោន (អាមេរិក) ខណៈពួកគេទាំងបីនាក់ កំពុង​តម្រង់​ជួរ​គ្នា​បង់លុយ នៅទីនោះ និងបានបង្កឲ្យផ្ទុះជារឿងអាស្រូវឡើង។

នៅជាងមួយខែក្រោយមក គឺនៅថ្ងៃទី១០ ខែវិច្ឆិកា ស្ត្រីម្នាក់ត្រូវបានឃាត់ខ្លួន និងរងការចោទប្រកាន់ ពីបទ​បំពាន​​ខាងផ្លូវភេទ ក្នុងដំណាក់កាល់ពី៣ ដោយអាជ្ញាធរអាមេរិក។ មិនមែនជារឿងថ្មីទេ ព្រោះស្ត្រីជាប់ចោទ នាង​​«Ayanna Marie Knight» ម្នាក់នេះ បានរងការចោទប្រកាន់ ចំនួនពីរដងរួចមកហើយ ទាក់ទងនឹង​ការ​ធ្វើ​ពេស្យាកម្ម នៅក្នុងរដ្ឋធានីវ៉ាស៊ីតោន និងក្រុង ឡាស វេហ្គាស កាលពីពេលកន្លងមក។

ស្ត្រីម្នាក់ទៀត កំពុងត្រូវបានអាជ្ញាធរ តាមរកចាប់ខ្លួន។ ប៉ុន្តែបុរសរងគ្រោះ លោក វ៉ាស៊ីនតោន ថេរភី (Washington Tharpe) បានផ្លាស់ប្ដូរគំនិតវិញ។ នោះ គឺលោកចង់រាល់ការចោទប្រកាន់ និងបន្ទុកទទួលខុស​ត្រូវ ដែល​ទម្លាក់ ទៅលើស្ត្រីរកស៊ីទាំងពីរ ត្រូវបានបោះបង់ចោល។ លោកបានពន្យល់ប្រាប់សារព័ត៌មាន «New York Daily News» ថាលោកមិនចង់ឃើញ ស្ត្រីអ្នកបំពានលើរូបលោក ត្រូវប្រឈមនឹង​ប្រព័ន្ធ​យុត្តិធម៌​ទៀត​ទេ។ លោកថា នាងទាំងពីរ បានរងការពិន័យធ្ងន់ធ្ងររួចហើយ តាំងពីពេលដែលវីដេអូ ថតដោយកាម៉េរ៉ា​សុវត្ថិភាព ត្រូវបានដាក់បង្ហោះ តាមបណ្ដាញអ៊ិនធើណែត ហើយមនុស្សជាច្រើន បានប្រតិកម្មដាក់នាងនោះ។

គេត្រូវដឹងដែរថា ប្រសិនជាសវនាការ ត្រូវបានបើកធ្វើមែននោះ នាង «Ayanna Marie Knight» អាចនឹង​ជាប់​ពន្ធនាគារ ដល់១០ឆ្នាំ និងជាប់ឈ្មោះក្នុងបញ្ជីខ្មៅ នៃបទល្មើសខាងផ្លូវភេទ អស់មួយជីវិត។

លោក ថេរភី បានថ្លែងឲ្យដឹងថា៖ «ក្នុងអាយុ២២ឆ្នាំ នាងមិនទាន់មានភាពចាស់ទុំ នៅឡើយ។ ខ្ញុំពិតជា​ពិបាក​ចិត្ត​​ណាស់ ដែលឃើញពួកនាង ត្រូវបានគេបញ្ជូនដាក់ចូលក្នុងពន្ធនាគារ ព្រោះរឿងនេះ។» សាស្ត្រាចារ្យ​អាយុ​៤០ឆ្នាំ​រូបនេះ បានបញ្ជាក់ថា បន្ទាប់ពីរន្ធត់ចិត្ត ត្បិតការគ្រវីគូទដាក់លោក របស់ស្ត្រីនេះហើយ លោកបាន​ទៅ​ជួប​ជា​មួយ​នឹងអាចារ្យមួយរូប ដើម្បីស្វែងរកភាពស្ងប់ចិត្តមកវិញ។ ហើយតាំងពីពេលនោះមក លោកបាន​ធូរ​ស្បើយ​ក្នុង​ចិត្ត ហើយក៏បានសម្រេចចិត្តដែរថា នឹងបោះបង់ចោល នូវការចោទប្រកាន់ទៅលើស្ត្រីទាំងពីរ។ មិន​ត្រឹម​តែ​ប៉ុណ្ណឹង លោកថែមទាំងចង់ជួយ ពួកគេទាំងពីរនាក់នោះទៀតផង។

បុរសរងគ្រោះ បានថ្លែងឲ្យដឹងទៀតថា លោកចង់ជួបស្ត្រីទាំងពីរ ហើយចង់ជួយពួកនាង ឲ្យចេញពីមុខរបរ​ជា​ពេស្យាចារ។ ជាការឆ្លើយតបវិញ លោកចង់ឲ្យពួកនាងដឹងពីកំហុស និងក្លាយជាគំរូ ទៅដល់ស្ត្រីវ័យក្មេង​ផ្សេង​ទៀត។ ការខិតខំប្រឹងប្រែងរបស់លោក ថេរភី នៅពេលនេះ គឺត្រូវស្វែងរកជួប​លោករដ្ឋអាជ្ញា​ឲ្យខាងតែបាន ដើម្បី​​សុំ​ឲ្យ​បោះបង់ចោល នូវការចោទប្រកាន់។ ប៉ុន្តែនៅពេលនេះ មិនមានលទ្ធផលអ្វីនៅឡើយ។ យ៉ាងណា​ក៏​ដោយ ប្រសិន​បើ​សវនាការកាត់ទោស​ទៅលើពួកនាង ពិតជាត្រូវធ្វើ ដោយជៀសមិនផុតនោះ លោកបាន​សម្រេច​​ថា លោក​នឹង​មិន​ទៅធ្វើជាសាក្សី ដើម្បីចោទប្រកាន់ពួកនាងឡើយ៕