អាជ្ញាធរ​ប្រតិកម្ម រឿង​គោ​អ្នក​ស្រុក​ត្រូវ​ឡាន​គាប​អំពៅ​បោក​សម្លាប់​

ទិដ្ឋភាព នៃការធ្វើទារុណកម្ម ទៅលើសត្វគោប៉ុន្មានក្បាល របស់​អ្នកស្រុក ក្នុងខេត្តកំពង់ស្ពឺ បាន​បង្ក​ឲ្យ​មាន​ប្រតិកម្ម​ជា​ទូទៅ​មួយ បន្ទាប់​ពី​រូបថត នៃសត្វគោទាំងនេះ ត្រូវបានយក​មក​បង្ហោះ នៅតាម​បណ្ដាញ​សង្គម។ ការ​ភ្ញាក់​ផ្អើល​នេះ តម្រូវឲ្យ​អាជ្ញាធរខេត្តកំពង់ស្ពឺ ចាំបាច់ត្រូវ​​ចេញ​​មុខ​​ដោះស្រាយ ដោយបញ្ជា​​ទៅ​ក្រុម​ជំនាញ ​ត្រូវ​ធ្វើ​យ៉ាង​ណា រក​ការ​ពិត​ឲ្យ​ឃើញ និងសង​សំណង​ទៅ​ពលរដ្ឋ​ម្ចាស់​គោ​វិញ។
អាជ្ញាធរ​ប្រតិកម្ម រឿង​គោ​អ្នក​ស្រុក​ត្រូវ​ឡាន​គាប​អំពៅ​បោក​សម្លាប់​
ទិដ្ឋភាពសត្វគោ ដែលត្រូវរថយន្ដគាបអំពៅ ចាប់គាប និងបោក ធ្វើឲ្យស្លាប់និងរបួសធ្ងន់ធ្ងរ។ (រូបថតលើហ្វេសប៊ុក)
Loading...
  • ដោយ: ដារី ([email protected]) - ភ្នំពេញ ថ្ងៃទី០៤ កុម្ភៈ ២០១៧
  • កែប្រែចុងក្រោយ: February 04, 2017
  • ប្រធានបទ: ទារុណកម្មលើសត្វ
  • អត្ថបទ: មានបញ្ហា?
  • មតិ-យោបល់

យ៉ាងហោច គោអ្នកស្រុក នៅក្នុង​ភូមិសាមគ្គី​ ឃុំរស្មីសាមគ្គី ស្រុក​ឱរ៉ាល់ ខេត្តកំពង់ស្ពឺ ចំនួន៥ក្បាល ត្រូវ​បាន​ក្រុមហ៊ុន​យួនមួយ សម្លាប់ និងធ្វើឲ្យរបួសធ្ងន់ធ្ងរ។ អ្នកស្រុកជាម្ចាស់គោ បានអះអាងថា បុគ្គលិក​របស់​ក្រុមហ៊ុន​នេះ បាន​ប្រើ​រថយន្ដ​សម្រាប់​គាបអំពៅ​ដាក់​លើឡាន ចាប់គាប និងបោកសត្វគោ របស់ពួកគាត់​ម្ដង​មួយ​ក្បាលៗ យ៉ាង​ព្រៃផ្សៃ។ ហេតុការណ៍​ដ៏អាណោចអាធម បានកើតឡើង នៅវេលាម៉ោង ៤និង៤៥ នាទី ទាប​ភ្លឺ កាល​ពីថ្ងៃ​ទី៣ ខែកុម្ភះ ឆ្នាំ២០១៧ម្សិលម៉ិញ។

ម្ចាស់គោ ដែលកំពុងឈរមើលគោ​របស់ខ្លួន ខ្លះស្លាប់ និងខ្លះទៀត របួសដាច់មុខ-ច្រមុះ បាន​រៀបរាប់​ថា រឿងរ៉ាវ​ដ៏​សហាវ​ព្រៃផ្សៃ​របៀប​នេះ មិនមែនទើបតែកើត​ជាលើកទីមួយទេ។ កាលពី​លើក​មុនៗ ក្រុមហ៊ុន​មក​ពី​ស្រុក​យួន​មួយ​នេះ ធ្លាប់បានដេញចាប់សត្វគោ របស់អ្នកស្រុក នៅពេលដែលសត្វគោ​ទាំង​នេះ ចូល​ទៅ​ក្នុង​ចំការ​អំពៅ​របស់​ក្រុមហ៊ុន និងបន្ទាប់មក បានប្រាប់ម្ចាស់គោ ឲ្យយកប្រាក់​មក​លោះ ដើម្បីបានគោ​ត្រឡប់​ទៅ​វិញ។

ហេតុការណ៍អមនុស្សធម៌ ត្រូវបានយកមកបង្ហោះផ្សាយ នៅលើបណ្ដាញសង្គម ក្នុងថ្ងៃដដែល ហើយ​ទទួល​បាន​ប្រតិកម្ម និង​ការ​ចែក​រំលែក យ៉ាងសន្ធឹកសន្ធាប់ ដែលចាំបាច់​តម្រូវ ឲ្យអាជ្ញាធរ​ចេញមុខ​ដោះ​ស្រាយ។ ដោយ​ទំនងជាហេតុ​នេះហើយ ទើប​បញ្ជា​ដ៏​ដាច់ណាត់មួយ នៅថ្ងៃទី៤ ខែកុម្ភៈនេះ ត្រូវបានអភិបាល​ខេត្ត​កំពង់ស្ពឺ លោក វ៉ី សំណាង កំណត់ទៅ​ក្រុមជំនាញខេត្ត ដែលពាក់ព័ន្ធទាំងអស់ ថាត្រូវ​ស្វែងរក​មូលហេតុ​​ពិត​​ប្រាកដ ដោះ​ស្រាយ​សំណង​ជូនពលរដ្ឋ និងតាមចាប់​ជនដៃដល់ យកមក​ផ្ដន្ទាទោស​តាមច្បាប់។

មិន​មានឃើញប្រតិកម្ម ពីខាងក្រុមហ៊ុន​ចំការអំពៅ តបនឹងការចោទប្រកាន់​នេះ​នៅឡើយ មកទល់​នឹង​ម៉ោង​នេះ។ អ្នកសារព័ត៌មាន ដែលបានទៅដល់​កន្លែងកើតហេតុ បានរាយការណ៍ថា ក្រុមហ៊ុន​បាន​បិទ​ផ្លូវ មិន​ឲ្យ​នរណា​ចូល​ទាំង​អស់ ដែលជាហេតុ ធ្វើអ្នក​សារព័ត៌មាន មិនអាច​ចូល​ទៅ សុំប្រតិកម្ម​ដោយ​ផ្ទាល់​បានទេ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...