អតីតប្រធានាធិបតីបារាំង លោកនីកូឡា សាកូហ្សី (Nicolas Sarkozy) ត្រូវបានតុលាការឃាត់ខ្លួន ទុកពេញមួយយប់ កាលពីយប់ថ្ងៃអង្គារទី១ កក្កដា មកដល់ថ្ងៃ២ ខែកក្កដានេះ ដើម្បីសិក្សាអង្កេតជុំវិញសំនុំរឿងជាច្រើន ទាក់ទងនឹងអំពើ​ពុករលួយ«ជាន់ខ្ពស់» ប្រើប្រាស់ឥទ្ធិពល និងរំលោភលើអាថ៌កំបាំង របស់ស្ថាប័នតុលាការ។ លោកអាចនឹងមាន​ទោស​ជាប់ពន្ធនាគារ រហូតដល់ទៅ១០ឆ្នាំ ប្រសិនបើតុលាការរកឃើញថា លោកពិតជាមានកំហុសមែននោះ។

លោកនីកូឡា ស្សាកូហ្សី នៅត្រូកាដេរ៉ូ ជិតទួអេហ្វែល ពេលធ្វើយុទ្ធនាការឃោសនា បោះឆ្នោតប្រធានាធិបតីឆ្នាំ ២០១២​នេះ។ (រូបថត របស់គណបក្ស UMP)

ប្រព័ន្ធយុត្តិធម៌ - លោកអតីតប្រធានាធិបតី នីកូឡា សាកូហ្សី ទំនងជាកំពុងធ្លាក់ ក្នុងស្ថានភាពដ៏លំបាកលំបិន​មួយ​ហើយ។ ការបង្ខាំងទុកខ្លួនលោក ពេញមួយយប់ ដើម្បីសិក្សាអង្កេតដោយតុលាការនេះ បានធ្វើឡើងបន្ទាប់ពីលោក ត្រូវបាននគរបាលយុត្តិធម៌បារាំង ឃាត់ខ្លួនដើម្បីសាកសួរអស់រយៈពេលជាង១៥ម៉ោង ចាប់ផ្ដើមពីព្រឹកថ្ងៃទី១​ ខែ​កក្កដាកន្លងមក។ មេធាវីរបស់លោក និងចៅក្រមជាន់ខ្ពស់ពីររូបទៀត ក៏ត្រូវបានបង្ខាំងខ្លួនទុក ដើម្បីធ្វើការអង្កេត នៅក្នុងសំនុំរឿងដដែលនេះដែរ។

តើបទចោទប្រកាន់ ទៅលើអតីតប្រធានាធិបតី មានអ្វីខ្លះ?

បើតាមការិយាល័យអយ្យការ អមតុលាការបារាំង បានឲ្យដឹងថា លោក នីកូឡា សាកូហ្សី អាចនឹងត្រូវចោទប្រកាន់ ពីបទប្រព្រឹត្តិ​អំពើពុករលួយជាន់ខ្ពស់ ប្រើប្រាស់ឥទ្ធិពលរបស់ខ្លួន និងរំលោភលើអាថ៌កំបាំង របស់ស្ថាប័នតុលាការ។

តើតុលាការបារាំង ចង់បានអ្វី?

តុលាការចង់ដឹងឲ្យច្បាស់ ថាតើលោក តាមរយៈមេធាវីរបស់លោក ទីជេរី អ៊ែរហ្សូ (Thierry Herzog) បានស្វែង​រក​ចង់ដឹង ពីព័ត៌មានដ៏សំងាត់មួយ ទាក់ទងនឹងសាលដីកាសម្រេច ទៅលើសំនុំរឿងរបស់មហាសេដ្ឋីនីបារាំងមួយរូប លោកស្រី ប៊េតង់គួ (Bettencourt)។ ដើម្បីជាថ្នូរនឹងព័ត៌មានសំងាត់នេះ ការផ្ដល់ដំណែងដ៏សំខាន់មួយនៅ​ប្រទេស​មូណាកូ (ខាងត្បូងប្រទេសបារាំង) ទំនងជាត្រូវបានសន្យា ទៅឲ្យចៅក្រមជាន់ខ្ពស់ទទួលបន្ទុកសំនុំរឿង លោក ជីប៊ែរ អាហ្សីប៊ែរ (Gilbert Azibert)។

តើអ្នកស៊ើបអង្កេតបារាំង រកឃើញអ្វីទៅ?

ដំបូងឡើយ ចៅក្រមស៊ើបអង្កេតជំនាញខាងហិរញ្ញវត្ថុពីររូប បានដឹកនាំការស្រាវជ្រាវមួយ ទាក់ទងនឹងបទចោទ​ប្រកាន់ នៃការផ្ដល់ប្រាក់ដ៏សន្ធឹកសន្ធាប់ ពីសំណាក់ជនផ្ដាច់ការ មូអាម៉ា ហ្គាដាហ្វី (Mouammar Kadhafi) ដើម្បី​ផ្គត់ផ្គង់ ឲ្យយុទ្ធនាការឃោសនាបោះឆ្នោត របស់លោក នីកូឡា សាកូហ្សី កាលពីឆ្នាំ២០០៧។ នៅក្នុងរង្វន់នៃការ​ស៊ើបអង្កេតនេះ ចៅក្រមទាំងពីររូប បានសម្រេចដាក់អ្នកជិតដិតរបស់លោក រាប់ទាំងអតីតរដ្ឋមន្ត្រីជាច្រើននាក់ផង ទៅក្នុងការតាមដានផ្នែកទូរស័ព្ទទំនាក់ទំនង។

ដោយសារហេតុនេះហើយ ទើបចៅក្រមបានរកឃើញថា លោក សាកូហ្សី និងបក្សពួក បានព្យាយាមចង់ដឹងពី​ការ​ស៊ើប​អង្កេតនេះ ពីសំណាក់អ្នកទទួលខុសត្រូវ ខាងនគរបាលមួយរូប។  នៅខែសីហា ឆ្នាំ២០១៣ ចៅក្រមក៏បាន​សម្រេចដាក់លោក សាកូហ្សី ម្ដងវិញ ទៅក្នុងការតាមដានផ្នែកទូរស័ព្ទនេះដែរ។

ម្ដងនេះ ក្រុមអ្នកស៊ើបអង្កេត បានដឹងទៀតថា លោក នីកូឡា សាកូហ្សី មានទូរស័ព្ទមួយខ្សែទៀត ដើម្បីទាក់ទង​ជា​មួយមេធាវីរបស់លោក។ ហើយគឺខ្សែទូរស័ព្ទ ក្នុងឈ្មោះ ប៉ូល ប៊ីស្មីត (Paul Bismuth) នេះហើយ ដែលត្រូវបានប្រើ ដើម្បីចង់ដឹងពីព័ត៌មានដ៏សំងាត់មួយ ទាក់ទងនឹងសាលដីកាសម្រេច ទៅលើសំនុំរឿងរបស់មហាសេដ្ឋីនីមួយរូប គឺលោកស្រី ប៊េតង់គួ ពីសំណាក់ចៅក្រមតុលាការកំពូល លោក ជីប៊ែរ អាហ្សីប៊ែរ ជាថ្នូរទៅនឹងការសន្យា​ផ្ដល់ទៅ​ឲ្យ​ចៅក្រមរូបនេះ នូវកៅអីមួយដ៏ពិសេស នៅប្រទេសម៉ូណាកូ។ តែ«កៅអី»នោះ រហូតមកដល់ថ្ងៃនេះ មិនត្រូវបានផ្ដល់​ជូនលោក ជីប៊ែរ អាហ្សីប៊ែរ ទេ។

លោក សាកូហ្សី អាចរងទុក្ខទោសអ្វីខ្លះ?

នៅក្នុងដំណាក់កាលនេះ ការស៊ើបអង្កេត កំពុងដំណើរការទៅមុខនៅឡើយ។ ប៉ុន្តែប្រសិនបើ មានភស្ដុតាងសាក្សី​គ្រប់គ្រាន់ សវនាការកាត់ទោសនឺងអាចកើតឡើង ធ្វើទៅលើអតីតប្រធានាធិបតី ហើយលោក សាកូហ្សី នឹងអាច​ជាប់​ពន្ធនាគារ១០ឆ្នាំ និងពិន័យជាប្រាក់ ប្រមាណជា ១សែន៥ម៉ឺន អ៊ឺរ៉ូ (ត្រូវជាប្រមាណ២ សែនដុល្លារ)។ មិនត្រឹមតែ​ប៉ុណ្ណោះ ក្រមព្រហ្មទណ្ឌរបស់ប្រទេសបារាំង អាចនឹងបន្ថែមទោសជាច្រើនទៀត ដូចជាហាមឃាត់លោក សាកូហ្សី មិនឲ្យធ្វើនយោបាយជាដើម។ ការហាមឃាត់ដែលអាចកើតឡើង ខណៈពេលនេះ លោកកំពុងត្រៀមខ្លួន ត្រឡប់​មក​ប្រឡូកក្នុងនយោបាយវិញផងនោះ៕