សិទ្ធិ - អ្នកនាំពាក្យក្រសួងយុត្តិធម៌កម្ពុជា លោក សម ប្រជាមានិត ឲ្យដឹងថាកាលពីល្ងាចថ្ងៃទី០១ ខែកក្កដា ឆ្នាំ២០១៤​នេះ លោក វីរ៉ា ស៊ុមខ្វាមឃីត សកម្មជនអាវលឿងថៃ ត្រូវបានតំណាងស្ថានទូតថៃ​ប្រចាំ​ប្រទេសកម្ពុជា ទៅទទួលនៅពន្ធនាគារព្រៃសរ។

លោក សម ប្រជាមានិត បានពន្យល់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី០២ ខែកក្កដា ឆ្នាំ២០១៤ នេះថា បន្ទាប់​ពីបានអនុវត្តទោស បានជាង៤ឆ្នាំមក លោក វីរ៉ា ស៊ុមខ្វាមឃីត  ត្រូវបាន​ព្រះមហាក្សត្រ​កម្ពុជា នរោត្តម សីហមុនី តាមសំណើរបស់លោក អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌កម្ពុជា បានឡាយព្រះហត្ថលេខា លើ​ព្រះរាជក្រិត្យលើកលែងទោស ចុះថ្ងៃទី០១ ខែកក្កដា ឆ្នាំ២០១៤ ឲ្យសកម្មជនអាវលឿងថៃមានសេរីភាព។

បើតាមអ្នកនាំពាក្យក្រសួងយុត្តិធម៌កម្ពុជាដដែលនេះ បានពន្យល់ថា ការសម្រេចដោះលែងមុនកាលកំណត់នេះ ក៏​ក្នុងន័យសម្តែងមនុស្សធម៌ ខណៈប្រជាពលរដ្ឋកម្ពុជាទូទាំងប្រទេស ចូលរួមគោរពព្រះវិញ្ញាណខន្ធ និងដង្ហែ​ព្រះអដ្ឋិ​អតីតព្រះមហាក្សត្រ ព្រះបរមរតនកោដ្ឋ ខាងមុនេះ។

តែបើយោងតាមសេចក្តីរាយការណ៍ព័ត៌មាន របស់កាសែត ដឺណេសិន (The Nation) របស់ថៃ បានឲ្យដឹងថា មេ​ដឹក​នាំយោធាថៃបានស្វះស្វែង រកការដោះលែងលោក វីរ៉ា ស៊ុមខ្វាមឃីត ( Veera Somkwamkid )។ លោកហ៊ុន សែន នាយករដ្ឋមន្រ្តីកម្ពុជា បានយល់ព្រមចំពោះសំណើនេះ និងបានប្រាប់ដល់លោក ស៊ាហ៊ីសាក់ ភួងកេតកែវ (Sihasak Phuangketkoew ) រដ្ឋមន្ត្រីស្តីទី នៃក្រសួងការបរទេសថៃ ក្នុងជំនួបនៅទីក្រុងភ្នំពេញ ថ្ងៃទី០១ ខែកក្កដា ឆ្នាំ២០១៤។

គួរបញ្ជាក់ថា លោកវីរ៉ា ស៊ុមខ្វាមឃីត ( Veera Somkwamkid) សកម្មជនអាវលឿងថៃ ដែលគ្រោងនឹងចាក​ចេញពី​ប្រទេសកម្ពុជា នៅថ្ងៃទី០២ ខែកក្កដា ឆ្នាំ២០១៤ នេះ ត្រូវបានកម្លាំងយោធាកម្ពុជា ចាប់ខ្លួនកាលពីខែធ្នូ ឆ្នាំ២០១០ ហើយត្រូវតុលាការកម្ពុជា កាត់ទោសកាលពីខែកុម្ភៈ ឆ្នាំ២០១១ ពីបទចារកម្ម ដោយផ្តន្ទាទោសឲ្យជាប់​ពន្ធនាគារ​រយ:ពេល ៨ ឆ្នាំ៕