ឧបនាយករដ្ឋមន្ត្រីថៃថា នគរបាលជួយ យីងឡាក់ ឲ្យភៀសខ្លួនតាមកម្ពុជា
ឧបនាយករដ្ឋមន្ត្រីថៃ លោក ប្រាវិត វង្សសុវណ្ណ (Prawit Wongsuwan) បានថ្លែងចោទប្រកាន់ មន្ត្រីនគរបាល ចំនួន ៣នាក់ ថាបានជួយអ្នកស្រី យីងឡាក់ ស៊ីណាវ៉ាត្រា (Yingluck Shinawatra) អតីតនាយករដ្ឋមន្ត្រីថៃជាសម្ងាត់ ដើម្បីគេចខ្លួនចេញពីប្រទេសថៃ ដោយឆ្លងកាត់តាមព្រំដែន «មិនផ្លូវការ» ចូលមកក្នុងទឹកដីកម្ពុជា។
អ្នកស្រីអតីតនាយករដ្ឋមន្ត្រី ត្រូវបានតុលាការកំពូល ក្នុងរាជធានីបាងកក កាត់ទោសដោយកំបាំងមុខ នៅថ្ងៃពុធទី២៧ ខែកញ្ញា ឆ្នាំ២០១៧នេះ ឲ្យជាប់ពន្ធនាគារ៥ឆ្នាំ ពីបទធ្វេសប្រហែល ក្នុងការប្រើប្រាស់ថវិការដ្ឋ នៅក្នុងនយោបាយឧបត្ថម្ភស្រូវអង្ករ នៅពេលដែលអ្នកស្រី កំពុងកាន់អំណាច។
អ្នកស្រី យីងឡាក់ ស៊ីណាវ៉ាត្រា បានបាត់ខ្លួនពីប្រទេសថៃ តាំងពីថ្ងៃទី២៥ ខែសីហា ឆ្នាំ២០១៧កន្លងទៅ ដែលជាថ្ងៃដែលអ្នកស្រី បានខកខាន មិនបានបង្ហាញខ្លួន ដើម្បីស្ដាប់ការប្រកាសសាលក្រម របស់តុលាការកំពូល នៅពេលនោះ។
[...]
