ខណៈនេះ លោក មាជ សុវណ្ណារ៉ា ដែលត្រូវបានដោះលែង ឲ្យមានសេរីភាព កាលពីចុងខែកន្លងទៅ បានទៅដល់សហរដ្ឋអាមេរិកហើយ ដើម្បីជួបជុំ​ប្រពន្ធកូន និងដើម្បីព្យាបាលជំងឺ នៅទីនោះ។ អតីតមន្ត្រីរបស់គណបក្សសង្គ្រោះជាតិ ដែលត្រូវបានជាប់ក្នុងពន្ធនាគារ អស់រយៈពេលជិត៤ឆ្នាំ បានធ្វើដំណើរ​ទៅដល់​ព្រលាន​យន្ដហោះ​អន្តរជាតិ នៃក្រុងឡូសអេនជឺឡេស កាលពីម៉ោងប្រមាណជា ១០ ព្រឹកថ្ងៃសៅរ៍ ទី៨ ខែកញ្ញា ឆ្នាំ២០១៨។

លោក មាជ សុវណ្ណារ៉ា បានចាកចេញពីប្រទេសកម្ពុជា កាលពីយប់​ថ្ងៃទី៧ ខែកញ្ញា ឆ្នាំ២០១៨ បន្ទាប់ពីលោកបានលាចាកសិក្ខាបទ នៅក្នុងថ្ងៃដដែល។ លោក បានកោរសក់សាងផ្នួស បួសជាព្រះសង្ឃ កាលពីល្ងាចថ្ងៃទី១ ខែកញ្ញា ឆ្នាំ២០១៨ នៅក្នុងវត្តដំណាក់ សង្កាត់សាលាកំរើក ក្រុង/ខេត្ត សៀមរាប  ដើម្បីអ្វីមួយ ដែលលោកអះអាងថា ជាការ«បិណ្ឌបាត ឲ្យមានការទម្លាក់ចុះ [នូវអំពើ]ហិង្សានយោបាយ ការចាប់យកមេត្តាធម៌ ដោយបញ្ចប់នូវវប្បធម៌ សម្លាប់ ចាប់ដាក់គុក និងការគំរាមកំហែង រត់ចោលស្រុក»។

នៅមុនចេញដំណើរ អតីតមន្ត្រីគណបក្សប្រឆាំងរូបនេះ បានថ្លែងថា លោកនឹងត្រឡប់មកប្រទេសកម្ពុជាវិញ និងមកធ្វើជាអ្នកនយោបាយឡើងវិញ នៅក្នុងពេលខាងមុខ៕