ម្នាក់ជូនពរទៅ ម្នាក់ទៀតជូនពរមកវិញ។ លោកនាយករដ្ឋមន្ត្រី ហ៊ុន សែន បានថ្លែងអំណរគុណ ត្រឡប់ទៅលោក សម រង្ស៊ី វិញ បន្ទាប់ពីមេដឹកនាំប្រឆាំងរូបនេះ បានសរសេរជូនពរលោក ឲ្យឆាប់ជាសះស្បើយ ពីជំងឺកាលពីម្សិលម៉ិញ។ នេះ បើតាមមតិយោបល់ពីរឃ្លា ដែលបានសរសេរ ដោយគណនេយ្យហ្វេសប៊ុក ដាក់ឈ្មោះ «Hun Sen» នៅលើទំព័រហ្វេសប៊ុក របស់សារព័ត៌មានក្នុងស្រុកមួយ។

បើតាមសារព័ត៌មាននោះ ដែលគេស្គាល់ថា មាននិន្នាការ ស្និតនឹងរដ្ឋាភិបាល របស់គណបក្សប្រជាជនកម្ពុជា បានអះអាងថា គណនេយ្យនោះ ជារបស់លោក ហ៊ុន សែន។ គណនេយ្យហ្វេសប៊ុក «Hun Sen» បានសរសរ នៅត្រង់កន្លែង​ដាក់មតិយោបល់ថា៖ «ខ្ញុំសូមអរគុណដ៏ជ្រាលជ្រៅ ចំពោះឯកឧត្តម សម រង្ស៊ី ដែលបានជូនពរខ្ញុំ ក្នុងពេលដែលខ្ញុំមានជម្ងឺ»។

ដូចទស្សនាវដ្ដីមនោរម្យ.អាំងហ្វូ បានរាយការណ៍ នៅថ្ងៃទី៥ ខែឧសភារួចហើយ ថាលោក សម រង្ស៊ី អតីតប្រធានគណបក្សសង្គ្រោះជាតិ បានសរសេរសារមួយ នៅលើទំព័រទ្វីសធើរ (Twitter) របស់លោក ជូនពរលោក ហ៊ុន សែន ដែលបានប្រកាសធ្លាក់ខ្លួនឈឺ តាំងពីរសៀលថ្ងៃទី៣ ខែឧសភា និងចាំបាច់​ត្រូវទៅមន្ទីរពេទ្យ ជា«បន្ទាន់» ដើម្បីពិនិត្យ និងព្យាបាល។ លោកនាយករដ្ឋមន្ត្រី ត្រូវនៅសម្រាកក្នុងមន្ទីរពេទ្យ នៃប្រទេសសិង្ហបូរី រហូតដល់ថ្ងៃទី៧ ខែឧសភាស្អែក ដែលបង្កឲ្យជំនួប​របស់លោកជាផ្លូវការមួយចំនួន ត្រូវបានអាក់ខាន។

» អត្ថបទដែលទាក់ទង៖ សម រង្ស៊ី ជូន​ពរ ហ៊ុន សែន ឲ្យ​ឆាប់​ជា​សះ​ស្បើយ

នៅថ្ងៃទី៦ ខែឧសភានេះ សារព័ត៌មានក្នុងស្រុកជាច្រើន ក៏បានលើកយកការជូនពរ របស់លោក សម រង្ស៊ី មកចុះផ្សាយដែរ ក្នុងនោះមានទាំងសារព័ត៌មានមួយ​ខាងលើផង។ ដោយបែបនេះហើយ ទើបគណនេយ្យហ្វេសប៊ុក «Hun Sen» បានយកឱកាសនៃការបង្ហោះអត្ថបទ នៅលើបណ្ដាញសង្គម របស់សារព័ត៌មាននេះ ដើម្បីសរសេរសារថ្លែងអំណរគុណ តបទៅមេដឹកនាំប្រឆាំង ដែលកំពុងត្រូវបាន​និរទេសខ្លួន នៅឯក្រៅប្រទេស។

បន្ថែមពីលើឃ្លាអរគុណខាងលើ គណនេយ្យ «Hun Sen» នៅបានសរសេរជូនពរ ត្រឡប់ទៅលោក សម រង្ស៊ី វិញដូច្នេះថា៖ «ខ្ញុំក៏សុំយកឱកាសនេះ ជូនពរឯកឧត្តម និងលោកជំទាវ ព្រមទាំងក្រុមគ្រួសារ ជួបតែសេចក្តីសុខ»៕