ប្រជាពលរដ្ឋចំនួនពីរភូមិ ក្នុងស្រុកឈូក ខេត្តកំពត បាននាំគ្នាឡើងដាក់ញត្តិ នៅរដ្ឋសភាបន្ថែមទៀត ក្នុងព្រឹក​ថ្ងៃទី៧ ខែកញ្ញានេះ ដើម្បីស្នើឲ្យផ្ដល់ប្លង់កម្មសិទ្ធិ ដែលវាស់វែងដោយក្រុមយុវជន ក្នុងឆ្នាំ២០១២។ ប៉ុន្តែទន្ទឹម​នឹងការទាមទារនេះ អ្នកភូមិមកពីស្រុកស្រែចំការទាំងនេះ បានថ្លែងបរិហាពីទង្វើរបស់មន្ត្រីថ្នាក់ស្រុក ដែល​ពលរដ្ឋបានចោទថា បានរំលោភយកដីធ្លី ផ្ទះសម្បែងរបស់ពួកគាត់។

មកពីភូមិតេជោអន្លង់ក្មេងលេង, ភូមិតេជោក្បាលដំរី ស្ថិតក្នុងឃុំតេជោអភិវឌ្ឍន៍ ស្រុកឈូក ខេត្តកំពត ចំនួន​១០០នាក់ តំណាងឲ្យប្រជាពលរដ្ឋ ប្រមាណជាងមួយពាន់គ្រួសារ អ្នកស្រី ទូច ស៊ីនួន បានបង្ហាញ​ពីការ​លំបាក​របស់ខ្លួន ប្រាប់ទស្សនាវដ្តីមនោរម្យ.អាំងហ្វូថា អាជ្ញាធរ បានបង្ខំឲ្យគ្រួសារអ្នកស្រី ចេញពីផ្ទះ និងមិនព្រម​ធ្វើការ​ប្រគល់ដី ដែលក្រុមយុវជនរបស់នាយករដ្ឋមន្រ្តី វាស់វែងឲ្យនោះឡើយ។ អ្នកស្រីបន្ថែមថា ដីដែល​ធ្លាប់​រស់នៅ និងដាំដំឡូង ត្រូវបានអាជ្ញាធរខេត្ត លួចឈូសឆាយ នាពាក់កណ្តាលយប់។ ឯផលដំឡូង«មើម» ដែល​សល់ពីការឈូសនោះ ត្រូវបានហាមមិនឲ្យរើស ដោយលប់ចោលទៅក្នុងដីវិញ។ ក្រុមអាជ្ញាធរ ថែមទាំងបាន​ប្រើប្រាស់អាវុធគម្រាម ដោយហាម មិនឲ្យធ្វើការតវ៉ា និងប្តឹងផ្តល់ទៀត។

អ្នកស្រីថា ក្រុមនោះ មិនដឹងជាដឹកនាំ ដោយអ្នកណាឡើយ តែអ្នកស្រីស្គាល់មនុស្ស តែពីរនាក់ប៉ុណ្ណោះ ម្នាក់​ឈ្មោះ ឌុច សាវឿន និងម្នាក់ទៀត ឈ្មោះ ប៉ែន សុត្រាវុធ ជាមន្រ្តីសុរិយោដីស្រុក។ អ្នកស្រី បានថ្លែងឲ្យដឹង​ថា៖ «ខ្ញុំមិនដឹងជាទៅរស់នៅទីណាទេ គេយកដីធ្វើផ្ទះថ្ម អស់ហើយ។ (...) គេឲ្យខ្ញុំពីរម៉ឺនខ្មែរ ឈប់តវ៉ា.. វាយខ្ញុំ​បែក​ក្បាល បាក់ធ្មេញ.. តាំងពីហ្នឹងខ្ញុំបាក់ស្បាត ខ្ញុំខ្លាចគេវាយងាប់ទៀត។ (...) សូមសម្តេច ហ៊ុន សែន ជួយប្រជា​ពលរដ្ឋផង។ (ពលរដ្ឋ)ងាប់អស់ហើយ បើយ៉ាងនេះ។»

លោក លី ណាក់ អាយុ៤៨ ឆ្នាំ បានថ្លែងដែរថា លោកឡើងមកនេះ ដើម្បីធ្វើការទាមទារ ឲ្យអាជ្ញាធរថ្នាក់លើ ជួយ​ដោះស្រាយបញ្ហាដីធ្លី ដែលលោកនាយករដ្ឋមន្រ្តី ហ៊ុន សែន បញ្ជាឲ្យវាស់វែងជូនប្រជាពលរដ្ឋ។ តាំងពី​ឆ្នាំ​២០០១ មកទល់នឹងបច្ចុប្បន្ននេះ មិនឃើញអាជ្ញាធរខេត្តវាស់វែង ប្រគល់ឲ្យនោះឡើយ។ លោកបន្តថា អាជ្ញាធរ​ភូមិ ឃុំ ស្រុក ពេលខំវាស់វែងដីធ្លី របស់ប្រជាពលរដ្ឋ មិនបានធ្វើការសួរនាំ ឬប្រាប់ ឬជូនដំណឹងយ៉ាង​ណានោះ​ឡើយ តែផ្ទុយទៅវិញ ក្រុមមន្ត្រីទាំងនោះ បានចុះវាស់វែងតែខ្លួនឯង និងចែកតែគ្នាឯងតែម្តង។

រីឯពលរដ្ឋមួយរូបទៀត លោក ភឿន បានលើកឡើងថា មិនត្រឹមតែវាស់ដីពលរដ្ឋយកទេ ហើយថែមទាំង​គម្រាម​ពលរដ្ឋថែមទៀត។ លោក បានថ្លែងឲ្យដឹងថា៖ «ពេលពលរដ្ឋប្តឹងអាជ្ញាធរ ស្រុក ខេត្ត មិនដោះស្រាយ​ឲ្យទេ ទើបពលរដ្ឋនាំគ្នា ឡើងមកធ្វើការទាមទារ ដល់រាជធានីនេះ។ (...) ថាវាស់ទុកឲ្យទាហានសោធន ឯ​ទាហាន​សោធន ក៏មិនបាន ក៏រងគ្រោះ និងការមិនបានទទួលដីដែរ។ (...) គេថា ចាំបោះឆ្នោតរួច (២០១៣) ដោះស្រាយ ដល់បោះឆ្នោតហើយ បាត់ឈឹង។»

សម្រាប់អ្នកស្រី រត្ន សូផន ហៅ ម៉ែចាស់ បានលើកឡើងថា អ្នកស្រីធ្លាប់ជាឆ្មបពេទ្យ បានចូលនិវត្តន៍ហើយ បានទៅទិញដីនៅតំបន់នោះ។ អ្នកស្រី ថាបានរស់នៅនៅទីនោះ រហូតដល់បច្ចុប្បន្ន ស្រាប់តែអាជ្ញាធរ​បាន​មក​ឈូសឆាយ កំទេចផ្ទះពលរដ្ឋ និងដុតបំផ្លាញដំណាំ និងផ្ទះសម្បែងខ្ទេចខ្ទី គ្មានសល់អ្វីឡើយ ក្រៅពី​គ្រោងឆ្អឹង​ផ្ទះ​នោះឡើយ។

យុវជន ពុទ្ធិ មកពីសកលវិទ្យាល័យ CUS ដែលបានតាមឃ្លាំមើលសកម្មភាពតវ៉ា របស់ប្រជាពលរដ្ឋ បាន​លើក​ឡើងថា អាជ្ញាធរស្រុកឈូក ខេត្តកំពត មិនបានអនុវត្តតាមអនុក្រិត្យ ឆ្នាំ២០១២ ដែលចេញដោយ​លោក ហ៊ុន សែន នាយករដ្ឋមន្រ្តីទេ បែរជានាំគ្នាធ្វើការវាស់វែង ពុះច្រៀកដី ប្រជាពលរដ្ឋ ហើយឲ្យប្រជា​ពលរដ្ឋ តែ​ចំណែក​មួយតូចជាងដីគាត់ពីមុន ដោយរំលោភលើអនុក្រិត្យនោះទៅវិញ។ យុវជនរូបនេះ បានបញ្ជាក់​ថា៖ «អាជ្ញាធរ​មិនចាំបាច់វាស់វែងទៀតទេ ព្រោះក្រុមយុវជនសម្តេចតេជោ បានវាស់វែងរួចហើយ។ អាជ្ញាធរខេត្តមាន​កាតព្វកិច្ច​តែមួយគត់ គឺការចេញប្លង់ តាមការវាស់វែងរបស់ក្រុមយុវជនទាំងនោះ ជាការស្រេច។»

ទស្សនាវដ្ដីមនោរម្យ.អាំងហ្វូ នឹងស្វែងរកប្រតិកម្ម ពីសំណាក់អាជ្ញាធរ ទាំងថ្នាក់ស្រុកឈូក ទាំងខាងថ្នាក់​ខេត្ត​កំពត ដើម្បីយកមកចុះផ្សាយ នៅក្នុងអត្ថបទលើកក្រោយរបស់ខ្លួន។ ប៉ុន្តែនៅក្នុងការស្វែងរកប្រតិកម្ម ក្នុងពេល​ភ្លាមៗនេះ មិនមានការឆ្លើយតប ឬទាក់ទងមិនបាន៕