ឡានបង្កគ្រោះថ្នាក់ ធុន តូយូតា (TOYOTA) ពណ៍ទឹកប្រាក់ស្លាកលេខភ្នំពេញ ២AB-៤១៤៩ ត្រូវបានបើកបរ ដោយបុរសម្នាក់ មិនស្គាល់អត្តសញ្ញាណ។ ឡានបង្កនេះ ត្រូវបានអ្នកឃើញហេតុការណ៍ប្រាប់ឱ្យដឹងថា បើក​បរក្នុងទិសដៅ ពីជើងទៅត្បួង តាមបណ្តោយផ្លូវ ២៧១ ផ្លូវធំជាប់ផ្សារដើមថ្កូវ ក្នុងសង្កាត់ ផ្សារដើមថ្កូវ ខណ្ឌ​ចំកាមន រាជធានីភ្នំពេញ។ លុះមកដល់ចំណុច ជិតកន្លែងលក់ដូរ គ្រឿងសក្ការៈបូជាមួយកន្លែង ទល់មុខ​ពេទ្យ​ធ្មេញ ក៏ជ្រុលចង្កូតទៅបុក ផ្ទាំងថ្មចែកផ្លូវពេញទំហឹង បណ្តាលឱ្យខូចខាតមួយចំនួនធំ។

បន្ទាប់ពីជួបគ្រោះថ្នាក់នេះ រថយន្តតូយ៉ូតា បានរងការខូចខាត ផ្នែកខាងមុខ។ ដោយឡែកម្ចាស់ឡាន ដែលគេ​ដឹងថា មិនមានបញ្ហាអ្វីធ្ងន់ធ្ងរនោះ បានបើកទ្វារថយន្ដ ហើយរត់គេចខ្លូនបាត់ស្រមោល ដោយទុករថយន្ត​ចោល នៅកន្លែងកើតហេតុ។

ករណីបង្កគ្រោះថ្នាក់ រួចទុកឡានចោលនេះ បានកើតឡើង កាលពីវេលាម៉ោង៦ ព្រឹកថ្ងៃទី០៧ ខែកញ្ញា ឆ្នាំ​២០១៥។ ក្រោយពេលកើតហេតុ ប្រមាណ៣០នាទី គេឃើញ មាននគរបាលចររាចរណ៍ផ្លូវគោក រាជធានី​ភ្នំពេញ ចុះមកអន្តរាគមន៍។ ក្រោយពីពិនិត្យរួចរាល់ បានបញ្ជាក់ឱ្យដឹងថា ផ្ទាំងថ្ម ដែលបានបាក់មានចំនួន​ច្រើន ព្រោះត្រួវឡានបុកពេញទំហឹង។ យ៉ាងណាក៏ដោយ នគរបាលចររាចរណ៍រាជធានី បានបញ្ជាក់ថា ការ​ខូចខាត​ខ្លាំង គឺតែ០៦ផ្ទាំងប៉ុណ្ណោះ។

ក្រោយពីពិនិត្យរួចរាល់ មន្ត្រីនគរបាលទាំងនោះ បានចាត់ការស្ទួចឡានបង្ក យកទៅរក្សារទុក នៅការិយាល័យ​ចរាចរណ៍ រាជធានីភ្នំពេញ ដើម្បីរងចាំម្ចាស់ចូលខ្លូន ទៅដោះស្រាយ៕