ករណីគ្រោះថ្នាក់ ដែលបានផ្ដាច់ជីវិតមនុស្ស ភ្លាមៗនេះ បានកើតឡើង កាលពីវេលាម៉ោង ៧ និង៣០នាទីយប់ ថ្ងៃទី ២៦ ខែកក្កដា ឆ្នាំ២០១៥ ត្រង់ចំនុចចន្លោះ ពីគីឡូម៉ែត្រលេខ ១៧ និង ១៨ ក្នុងភូមិធំ ឃុំភូមិធំ ស្រុក​កៀន​ស្វាយ ខេត្តកណ្តាល។ ជនរងគ្រោះដែលស្លាប់ភ្លាមៗ នៅក្នុងហេតុការណ៍នេះ ត្រូវបានគេស្គាល់ឈ្មោះ ហម ហាប់ អាយុ៣០ រស់នៅភូមិធំ ឃុំភូមិធំ ស្រុកកៀនស្វាយ ខេត្តកណ្តាល មានបុខរបរជាកសិករ។

សាក្សីពីកន្លែងកើតហេតុ បានប្រាប់ឲ្យដឹងថា គ្រោះថ្នាក់នេះបង្ករឡើង ពីជនរងគ្រោះខាងលើ ដែលជិះម៉ូតូម៉ាក វេវ មិនស្គាល់ស្លាកលេខ បានបើកបរយ៉ាងលឿន ចេញពីភ្នំពេញ តាមបណ្តោយផ្លូវជាតិលេខ១។ លុះមក​ដល់​កន្លែងកើតហេតុ បានរ៉េចង្កូត ទៅបុកម៉ូតូមួយគ្រឿងទៀត ជាម៉ូតូធំ កំពុងជិះពីរនាក់ប្តីប្រពន្ធ ក្នុងទិសដៅ​បញ្ច្រាស​គ្នាពេញទំហឹង។ ការប៉ះទង្គិច ពេញល្បឿន បានធ្វើឲ្យម្ចាស់ម៉ូតូ វេវ បានស្លាប់ ហើយពីរនាក់ប្ដីប្រពន្ធ បាន​រង​របួស​ធ្ងន់។ សាក្សីបន្តទៀតថា ម៉ូតូបុកនឹងម៉ូតូ ខ្ទេចស្ទើរមិនសល់រូបរាង បានន័យថាល្បឿន ពិត​ជា​មិន​ធម្មតា​ទេ។

ប្តីប្រពន្ធ ដែលរងរបួសធ្ងន់ ត្រូវបានបញ្ជូន ទៅមន្ទីពេទ្យភ្លាមៗ ដើម្បីសង្គ្រោះបន្ទាន់។ តាមការបញ្ជាក់ របស់​មន្ត្រី​សមត្ថកិច្ចនៅកន្លែងកើតហេតុ បានឲ្យដឹងថា ម្ចាស់ម៉ូតូ (វេវ) ទំនងជាស្រវឹង បានជាបើកម៉ូតូរ៉េចង្កូត ទៅ​បុក​គ្នា យ៉ាងពេញទំហឹង បែបនេះ។ មន្រ្តីដដែលបានបន្តថា បច្ចុប្បន្ន សាកសពត្រូវបានប្រគល់ ជូនក្រុម​គ្រួសារ​យក​ទៅធ្វើបុណ្យ ចំណែកឯវត្ថុតាង បានរក្សាទុកនៅការិយាល័យ ស្រុកកៀនស្វាយ ដើម្បីរងចាំភាគីទាំង​សង​ខាង ទៅ​ធ្វើការដោះស្រាយ នាពេលក្រោយ៕