នៅពេលដែលកំហុស មិនអាចជួសជុលវិញបាន... រីឯការសុំទោស ទោះជាត្រូវបានធ្វើច្រើនដង និងមានទំហំ​ប៉ុណ្ណាក៏ដោយ... តើគេត្រូវអនុគ្រោះ ឲ្យអ្នកទាំងពីរឬទេ? កាលពីសប្ដាហ៍មុន បុរសជាអនុរក្ស (និងជាគ្រូ​បង្រៀនដែរ) និងស្ត្រីជាគ្រូបង្រៀន ឯកទេសគីមី នៃវិទ្យាល័យមួយ នៃក្រុង ស្វនស៊ី ត្រូវបានហាមឃាត់​មិន​ឲ្យ​បង្រៀន ចំនួន៣ឆ្នាំ បន្ទាប់ពីឈុតឆាក «បន្ធូរតណ្ហាបះជើង» មួយ របស់អ្នកទាំងពីរ ដែលបានប្រព្រឹត្តិ​នៅក្នុង​សាលា​នេះ តាំងពីអំឡុងរដូវផ្ការីក ឆ្នាំ២០១៤កន្លងទៅ ត្រូវបានទម្លាយចេញជាសាធារណៈ។

ការបែកធ្លាយ ដែលបង្កភាពរ៉ៅឆាន ដល់លោក ហ្គ្រាហាម ដានៀល (Graham Daniels) អាយុ៥១ឆ្នាំ និង​អ្នកស្រី ប៊ែថាន ថូម៉ាស (Bethan Thomas) អាយុ៣៧ឆ្នាំ ជារូបភាពថតពីខាងក្រៅ ដែលថតជាប់ដោយ​កូន​សិស្សម្នាក់ និងដែលត្រូវបានយកមកបង្ហោះ ចែកផ្សាយពាសពេញអ៊ិនធើណែត។ ក្នុងវីដេអូ ៣៤វិនាទី គេបានឭសម្លេង​អ្នក​ទាំង​ពីរ ដែលសុទ្ធតែមានប្រពន្ធ​មានប្ដី នាពេលនោះ កំពុងធ្វើសកម្មភាពរួមរ័ក្ស យ៉ាង​ដង្ហក់។

នៅចំពោះភស្ដុតាង ដែលពិបាកនឹងប្រកែកបាននេះ អ្នកទាំងពីរមិនមានជម្រើសអ្វីផ្សេង ក្រៅពីទទួលស្គាល់​ទង្វើរបស់ខ្លួននោះឡើយ ជាពិសេស នៅពេលដែលការស៊ើបអង្កេត បន្ទាប់ពីហេតុការណ៍នេះ បានបង្ហាញឲ្យ​ដឹងទៀតថា អ្នកទាំងពីរបានលួចប្រព្រឹត្តិរឿងនេះ តាំងពីជិត១ឆ្នាំមកហើយ។

កាលពីពុធសប្ដាហ៍មុន ការដាក់ពិន័យទៅលើលោកអនុរក្ស និងអ្នកស្រីសាស្ត្រាចារ្យ ដែលសុទ្ធតែល្បី​ឈ្មោះ ថាជាគ្រូបង្រៀនដ៏គម្រូ បានធ្លាក់មកដល់។ គណៈកម្មការវិន័យប្រចាំតំបន់ បានប្រកាសថា ទង្វើរបស់អ្នក​ទាំង​ពីរ បានបង្កភាពអាប់អោន ដល់វិស័យអប់រំ ដល់ខ្លួនឯង និងដល់ស្ថាប័ន ដែលពួកខ្លួនកំពុង​ធ្វើការ (បង្រៀន)។ គណៈកម្មការបានចាត់ទុកថា៖ «ទង្វើអានាចារ  ដែលមានលក្ខណៈច្រើនដង និងមិនអាច​ទទួល​យក​បាន របស់​អ្នកទាំងពីរ បានធ្វើឡើងផ្ទុយពី គរុកោសល្យ និងពីវិជ្ជាជីវៈជាគ្រូបង្រៀន»។

ដើម្បីការពារខ្លួន ពីការដាក់វិន័យដ៏ធ្ងន់ធ្ងរ គូស្នេហ៍លួចលាក់ទាំងពីរនាក់ បាននិយាយអះអាង ពីការទទួល​ស្គាល់កំហុស និងពីអ្វីដែលខ្លួនអាចជួសជុល ពីទង្វើជ្រុលហួសហេតុនេះ។ លោក ហ្គ្រាហាម ដានៀល បាន​ថ្លែងរៀបរាប់ នូវវិប្បដិសារីដែលកើតចេញ​ពីទង្វើមួយ ដែលលោកហៅថា កង្វៈវិជ្ជាជីវៈ។ លោកថ្លែងឡើងថា៖ «ខ្ញុំពិតជា​បាន​ធ្វើរឿងនេះ ដែលធ្វើឲ្យខ្ញុំមានការខ្មាសអៀនខ្លាំងណាស់»។ រីឯអ្នកស្រី ប៊ែថាន ថូម៉ាស វិញ បាន​និយាយ​ថា៖ «សាលារៀន មានសារៈសំខាន់បំផុត ​សម្រាប់ជីវិតខ្ញុំ។ ខ្ញុំបានបាត់បង់នូវអ្វីៗជាច្រើន សម្រាប់​គម្រោងទាំងអស់ ទាំង​ក្នុង​អាជីព ទាំងក្នុងជីវិត​ឯកជន។»៕