ក្រោយការចុះពិនិត្យជាក់ស្តែង នៅ​ក្នុង​តំបន់​ភូមិ​ព្រែក​ខ្សាច់ ភូមិ​សំរុង​តាកែវ និង​ភូមិ​យាយ​សែន ឃុំ​ព្រែក​ខ្សាច់ ស្រុក​គីរីសាគរ ខេត្ត​កោះកុង​រួច​មក ប្រធាន​គណៈកម្មការ​សិទ្ធិ​មនុស្ស ទទួល​ពាក្យ​បណ្តឹង អង្កេត និង​ទំនាក់​ទំនង រដ្ឋសភា ព្រឹទ្ធសភា (​ឬ​ហៅ​ថា​គណៈកម្មការ​ទី១) នៃ​រដ្ឋសភា លោក អេង ឆៃអ៊ាង បាន​បង្ហាញ​ការ​យល់​ឃើញ​ថា «យន្តការ​នៃ​ការ​ដោះ​ស្រាយ​រឿង​ដី​ធ្លី ក្នុង​ខេត្ត​កោះ​កុង នៅ​មាន​ភាព​មិន​ប្រក្រតី​នៅ​ឡើយ មក​ទល់​បច្ចុប្បន្ន»។

ក្រោយជំនួបកាលពីថ្ងៃទី១២ ខែ​ធ្នូ ឆ្នាំ​២០១៤ នា​ទីស្តីការ​ក្រសួង​បរិដ្ឋាន លោក អេង ឆៃអៀង បាន​ស្រង់​សម្ដី​លោក សាយ សំអាល់ រដ្ឋ​មន្រ្តី​វ័យ​ក្មេង​នៃ​ក្រសួង​បរិស្ថាន ពី​ករណី​ដំណោះ​ស្រាយ​វិវាទ​ដី​ធ្លី ក្នុង​ស្រុក​គីរីសាគរ ខេត្ត​កោះកុង មក​បញ្ជាក់​ថា លោក​រដ្ឋមន្ត្រី ទើប​តែ​ឡើង​កាន់​តំណែង​ថ្មីៗ ដូច្នេះ​មិន​ទាន់​ក្តាប់​ជុំ​នៅ​ឡើយ។ តែ​យ៉ាង​ណា លោក សាយ សំអាល់ ថា​បាន​នឹង​កំពុង​ខិតខំ ដោះ​ស្រាយ​ជា​បន្ត​បន្ទាប់ ក្នុង​រឿង​នេះ​ហើយ។

ប្រធានគណៈកម្មការទី១នៃរដ្ឋសភា បានបញ្ជាក់ពីមួលហេតុនៃវិវាទនោះថា មកពីអាជ្ញាធរមូលដ្ឋាន ទទួល​ប្រាក់ខែពីក្រុមហ៊ុនប្រចាំខែ និងទទួលរង្វាន់ផ្សេងៗទៀតជាច្រើន ដូចជាម៉ួតូជាដើម។ ដូចនេះ អាជ្ញាធរ​ត្រូវ​តែ​យកចិត្តក្រុមហ៊ុន ច្រើនជាងយកចិត្តប្រជាពលរដ្ឋ។ ដូច្នេះ រាល់របាយការណ៍ក៏អាចមានការលាក់លៀមច្រើន នឹងផ្តល់ប្រយោជន៍ទៅខាងក្រុមហ៊ុន ជៀសជាងប្រយោជន៍របស់ប្រជាពលរដ្ឋ។

លោកបានបន្ថែមថា មូលហេតុមួយទៀត ភាពជាក់ស្តែងនៃរឿង និងរបាយការណ៍ដែលរកឃើញ ដោយ​ការ​អង្កេតរបស់អន្តរក្រសួង មានភាពមិន«សូវ»ស្របគ្នា។ ដូច្នេះ លោកបានស្នើសុំឲ្យផ្អាកការបណ្តេញ​ប្រជា​ពលរដ្ឋ​ដោយបង្ខំ កុំឲ្យមានការឈូសឆាយផ្ទះសំបែង កុំឲ្យដុត នឹងរុំរើដោយបង្ខំបន្តទៅទៀត ព្រោះទង្វើទាំងអស់ នេះ​ថា «វាផ្ទុយនឹងគោលការណ៍របស់រាជរដ្ឋាភិបាល ព្រោះគោលការណ៍នេះ ត្រូវឲ្យប្រជាពលរដ្ឋរើចេញ​ដោយ​ស្ម័គ្រចិត្ត។ បើមិនមានការទទួកយក នូវគោលនយោបាយណាមួយ ឬមិនព្រមរើផ្លាស់លំនៅដ្ឋានពី​ប្រជា​ពលរដ្ឋ​ទេ គោលការណ៍នោះបានអនុញ្ញាតឲ្យធ្វើការព្យួរសិន។»

លោកអេង ឆៃអៀង បានលើកយកសម្ដីរបស់ពលរដ្ឋ នៅពេលចុះទៅដល់ទីតាំងទំនាស់ មកបញ្ជាក់ថា៖ «គាត់ (ប្រជាពលរដ្ឋ) គាំទ្រឲ្យមានការអភិវឌ្ឍន៍ តែការអភិវឌ្ឍន៍នោះធ្វើយ៉ាងណាឲ្យពួកគាត់ (ប្រជាពលរដ្ឋ) បាន​ទទួល​ផល កុំឲ្យពួកគាត់ក្លាយជាជនរងគ្រោះ ព្រោះតែការអភិវឌ្ឍន៍។ ហើយកុំឲ្យមានផលចំណេញចូល ទៅ​ក្រុមហ៊ុនតែម្ខាងដូច្នេះ។»

លោកស្នើសុំឲ្យរដ្ឋមន្រ្តី លោក សាយ សំអាល់ គួរចុះទៅមើលផ្ទាល់ដល់ទីទំនាស់ផង ហើយធ្វើការចែកឲ្យ​ដាច់​ពីគ្នា រវាងម្ចាស់ដី (អ្នករស់នៅយូមកហើយ) និងឈ្មួញទិញដូរដី។ លោកបានសង្កត់ធ្ងន់ថា៖ «ប្រជាពលរដ្ឋ​រស់​នៅ​តាំងពីលំបាក ដល់ពេលមានផ្លូវចូលទៅដល់ ក៏រឹតតែពិបាកជាងកាលអត់ផ្លូវទៅទៀត។ (…) កាលមិនទាន់​មានផ្លូវ (ប្រជាពលរដ្ឋ) ពិបាកផ្នែកទទួលសេវា ដូចជាសេវាសុខភាព សេវាអប់រំ។ ដល់ពេលមានផ្លូវ គាត់​(ប្រជា​ពលរដ្ឋ)បានសេវាសុខភាព សេវាអប់រំធូរ តែបែរជាត្រូវបាត់បង់ដី។»

សូមរំលឹកថា ក្នុងភូមិព្រែកខ្សាច់ ភូមិសំរុងតាកែវ និងភូមិយាយសែន ឃុំព្រែកខ្សាច់ ស្រុកគីរីសាគរ ខេត្តកោះកុង ដែលកើតមានវិវាទដីធ្លីនោះ មានប្រជាពលរដ្ឋ ប្រមាណ១៣៥គ្រួសារ ក្នុងនោះ នៅសល់តែប្រមាណ​ជាង១៩​គ្រួសារ ដែលជាម្ចាស់ស្រុកដើមប៉ុណ្ណោះ។

ក្រុមហ៊ុនដែលមានវិវាទ ជាមួយប្រជាពលរដ្ឋឈ្មោះក្រុមហ៊ុន អែស.អ៊ី.ហ្សិត របស់លោកឧកញ៉ា លី យ៉ុងផាត់ សមាជិកព្រឹទ្ធសភាមកពីគណបក្សប្រជាជនកម្ពុជា ដែលទទួលបានសិទ្ធិវិនិយោគពីរដ្ឋាភិបាល ក្នុងឆ្នាំ២០០៥។ ឯវិវាទដីធ្លីនេះ ក៏ចាប់ផ្តើមកើតឡើងខ្លាំង ក្នុងឆ្នាំ២០០៨ រហូតមកដល់បច្ចុប្បន្ន។ ភាពមិនសុខចិត្ត នឹងដំណោះ​ស្រាយគ្មានយុត្តិធម៌នេះ បានបង្ខំចិត្តប្រជាពលរដ្ឋធ្វើការតវ៉ាជាបន្តបន្ទាប់ រហូតមានការបិទផ្លូវ ខណៈឯតំណាង​ប្រជាពលរដ្ឋមួយចំនួន ត្រូវបានចាប់ឃុំខ្លួន៕

សូមទស្សនាកិច្ចសម្ភាសន៍លោក អេង ឆៃអៀង ជាមួយទស្សនាវដ្តីមនោរម្យ.អាំងហ្វូដូចខាងក្រោម៖

(វីដេអូមិនទាន់រួចរាល់)