យុវជនជាតិអង់គ្លេសអាយុ២៤ឆ្នាំមួយរូប បានបង្កឲ្យមានការភិតភ័យព្រលឹងចុងសក់មួយ នៅក្នុងយន្ដហោះ ដោយសារ​យុវជនរូបនេះ បានព្រលែងចេញពីកាបូបរបស់ខ្លួន នូវពស់វែកមួយក្បាល ដែលបុរសដាក់ឈ្មោះឲ្យថា «មៃគី»។

រូបថតជំនួសដែលថតនៅក្នុងភាពយន្ដរឿង ពស់វែកនៅលើយន្ដហោះ។ (រូបថតភាពយន្ដ)

ចម្លែកតែពិត - ហេតុការណ៍ដ៏ភ័យរន្ធត់បានកើតឡើង នៅសប្ដាហ៍កន្លងទៅ នៅលើយន្ដហោះនៃក្រុមហ៊ុនអាកាសចរណ៍ អ៊ីស៊ីចេត (EasyJet) ដែលហោះភ្ជាប់ទីក្រុងតែលអាវីវ ប្រទេសអ៊ីស្ត្រាអែល និងទីក្រុងឡុងដ៍ ប្រទេសអង់គ្លេស។ អាដាម ហ្គូបាយ (Adam Gubbay) អាយុ២៤ឆ្នាំ មានមុខរបរជាអ្នកបើករថយន្ដក្រុង បានធ្វើឲ្យអ្នកដំណើរជាមួយគាត់​ជាច្រើននាក់​ភ័យបុកពោះ ដោយសារតែគាត់បានព្រលែង ពស់វែកមួយក្បាល ចេញពីក្នុងកាបូប ខណៈពេលដែលយន្ដហោះ​កំពុង​ហោះនៅលើអាកាស។

អាដាម ហ្គូបាយ បាននិយាយពន្យល់ថា «ខ្ញុំបានដាក់ មៃគី នៅក្នុងប្រអប់ក្រដាសមួយ ដែលមានប្រហោងតូចៗនៅជុំវិញ ហើយប្រអប់នោះ នៅក្នុងកាបូបរបស់ខ្ញុំ»។ កាបូបមានពស់នោះ បានបន្លឺសម្លេងសញ្ញានៅពេលដែល អាដាម ហ្គូបាយ ឆ្លង​កាត់ម៉ាស៊ីនត្រួតពិនិត្យ មុនពេលឡើងយន្ដហោះ តែគេបានឲ្យអាដាម ហ្គូបាយ បន្តដំណើរ ដោយមិនបាន​ឃាត់ទុកអ្វី​ឡើយ។

នៅពេលយន្ដហោះបានមកដល់ពាក់កណ្ដាលផ្លូវ អាដាម ហ្គូបាយ មានបំណងចង់ឲ្យទឹកទៅសត្វរបស់ខ្លួនផឹក។ ប៉ុន្តែ​ខណៈ អាដាម ដកពស់វែកចេញពីក្នុងកាបូប អ្នកដំណើរអង្គុយនៅក្បែរ បានស្រែកឆោរឡោឡើង។ អាដាមបានរំលឹកថា «ស្ត្រីម្នាក់បានស្រែកថា មានពស់វែកនៅលើយន្ដហោះ។ ពេលនោះ មនុស្សមួយចំនួននាំគ្នាផ្អើលឆោឡោតាមដែរ តែទាំង​អស់គ្នានៅតែរក្សាភាពស្ងប់ស្ងៀម។»

ស្ថិតក្នុងសភាពភ្លាមៗនោះ អ្នកបើកបរយន្ដហោះបានគម្រាមនឹងចុះចតជាបន្ទាន់។ តែអាដាម ហ្គូបាយ បានយកសត្វដែល​អមដំណើរជាមួយខ្លួន ទុកដាក់ក្នុងប្រអប់វិញ ហើយបានធានាថានឹងមិនមានកើតនូវឧប្បត្តិវហេតុអ្វីទាំងអស់ រហូតដល់​យន្ដហោះ​ចុះចត ជាស្ថាពរនៅព្រលានយន្ដហោះក្រុងឡុងដ៍។ នៅ​ពេលចេញពីយន្ដហោះ យុវជនម្ចាស់សត្វពស់ ត្រូវបាន​នគរបាលឃាត់ខ្លួន ហើយបានទទួលនូវការព្រមានមួយ ពីអាជ្ញាធរ។ យុវជនបានថ្លែងទាំងមួរម៉ៅថា «រឿងនេះកើត​ឡើង​ដោយការមិនយល់មួយ។ ខ្ញុំគ្រាន់ជាមនុស្សម្នាក់ដែលស្រឡាញ់សត្វប៉ុណ្ណោះ ប៉ុន្តែរឿងរ៉ាវ វាបាន​ធ្វើឲ្យ​ខ្ញុំក្ដៅ​ក្រហាយ​មែនទែន។»

ចំណែកអ្នកនាំពាក្យរបស់ក្រុមហ៊ុនអាកាសចរណ៍ អ៊ីស៊ីចេត វិញ បានចេញមកធានាអះអាង នៅចំពោះមុខអ្នកដំណើរ​ដែលប្រើសេវាកម្មរបស់ខ្លួនថា ជីវិតរបស់ពួកគេមិនបាន ស្ថិតក្នុងសភាពគ្រោះថ្នាក់នោះទេ។ ស្ត្រីអ្នកនាំពាក្យនោះ បាន​ថ្លែងបញ្ជាក់ថា «ពស់វែកមិនមានធ្វើសកម្មភាពអ្វីឡើយ ហើយវាបាននៅក្នុងប្រអប់របស់វា រហូតដល់ការហោះហើរ​បាន​បញ្ចប់»។ ទោះយ៉ាងណាក៏ដោយ ក៏ការស៊ើបអង្កេតមួយ ត្រូវបានបង្កើតឡើង ដើម្បីរកឲ្យឃើញពីមូលហេតុ ដែលសត្វ​ដ៏មានគ្រោះថ្នាក់ដូចយ៉ាងសត្វពស់វែកនេះ ត្រូវបានគេឲ្យឡើង«ជិះ»យន្ដហោះ៕

សូមទស្សនាវីដេអូ នៅពេលដែលអាដាមផ្ដល់សម្ភាសឲ្យអ្នកការសែត៖

-----------------------------------------------------
ដោយ៖ សេក មនោរកុមារ - ប៉ារីស ថ្ងៃទី០៣ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ