ផ្ទុះអាវុធនៅព្រលានយន្ដហោះក្នុងរដ្ឋផ្លរីដា៖ ចំនួនអ្នកស្លាប់កើន!
- ដោយ: សុបិន្ដ ([email protected]) - ម៉ុងរ៉េអាល់ ថ្ងៃទី ០៦ មករា ២០១៧
- កែប្រែចុងក្រោយ: January 06, 2017
- ប្រធានបទ: បាញ់បោះ
- អត្ថបទ: មានបញ្ហា?
- មតិ-យោបល់
-
ប្រព័ន្ធផ្សព្វផ្សាយអាមេរិក បានផ្សាយឲ្យដឹងថា ការផ្ទុះអាវុធមួយ បានកើតឡើង នៅព្រលានយន្ដហោះ «Fort Lauderdale-Hollywood» ក្នុងរដ្ឋផ្លរីដា (Florida) ភាគអាគ្នេយ៍នៃសហរដ្ឋអាមេរិក។ អ្នកដំណើរទាំងអស់ ដែលមានចំនួនរាប់សិប ត្រូវបានជម្លៀសខ្លួន ចេញ ខណៈជនរងគ្រោះជាច្រើន ត្រូវបានដឹកជាបន្តបន្ទាប់ ទៅកាន់មន្ទីរពេទ្យ។
បើតាមទូរទស្សន៍ «MSNBC» បានឲ្យដឹងថា បុរសខ្មាន់កាំភ្លើង នៅក្នុងព្រឹត្តិការណ៍នេះ ត្រូវបានចាប់ខ្លួនភ្លាមៗ និងបញ្ជូនទៅឃុំខ្លួន។
មានវត្តមាន នៅនឹងកន្លែងកើតហេតុនោះ លោក «Ari Fleischer» អតីតអ្នកនាំពាក្យ របស់អតីតប្រធានាធិបតីអាមេរិក លោក «George W. Bush» បានសរសេរនៅលើបណ្ដាញសង្គមទ្វីសធើរ (Twitter) ថា៖ «ការផ្ទុះអាវុធ បានលាន់ឮឡើង យ៉ាងខ្លាំងក្លា។ មនុស្សទាំងអស់គ្នា នាំគ្នារត់។»។
ព្រលានយន្ដហោះ «Fort Lauderdale» ខ្លួនឯង បានសរសេរប្រកាស នៅលើទំព័រទ្វីសធើរដែរថា៖ «ហេតុការណ៍ កំពុងប្រព្រឹត្តិទៅនៅឡើយ» នៅក្នុងលំហរង់ចាំ ទីពីរ (Terminal 2) នៅត្រង់ចំណុច ទទួលឥវ៉ាន់ របស់អ្នកដំណើរ។
សាក្សីជាច្រើននាក់ បានឲ្យដឹងថា អ្នកដំណើរបានដណ្ដើមគ្នា រត់យកប្រាស់អាយុ តែរៀងៗខ្លួន ខណៈរូបភាពតាមកញ្ចក់ទូរទស្សន៍ បង្ហាញថា អ្នកដំណើរជាច្រើនសិបនាក់ បានប្រមូលជួបជុំគ្នា នៅកណ្ដាលព្រលាន។ ទូរទស្សន៍អាមេរិកផ្សេងទៀត បានបង្ហាញពីរូបភាព នៃរថយន្ដសង្គ្រោះ និងរថយន្ដនគរបាល ជាច្រើនគ្រឿង ដែលត្រូវបានបញ្ជូន ទៅដល់ជាបន្តបន្ទាប់៕
NEW: "We heard the shots...popping shots," witness at Fort Lauderdale Int'l Airport tells CBSN https://t.co/J54RiABFFl pic.twitter.com/KgsL9hw2Ln
— CBS News (@CBSNews) 6 janvier 2017