ចម្បាំងយុត្តិធម៌នៅសាលាឧទ្ធរណ៍ ដើម្បីសុំឲ្យលោក អ៊ុំ សំអាន តំណាងរាស្ត្រមណ្ឌលខេត្តសៀមរាប បាន​នៅ​ក្រៅ​ឃុំ​ជា​បណ្ដោះអាសន្ន បានជួបនឹងភាពបរាជ័យ នៅព្រឹកថ្ងៃអង្គារទី១៧ ខែឧសភានេះ ដែលមិនខុសគ្នា​ពី​ការ​ស្នើសុំឲ្យនៅក្រៅឃុំ ដែលបានធ្វើកន្លងមក នៅសាលាដំបូងនោះឡើយ។

លោក ជូង ជូងី មេធាវីការពារក្ដីឲ្យលោក អ៊ុំ សំអាន បានថ្លែងប្រាប់អ្នកសារព័ត៌មានថា ចៅក្រមបានសម្រេច មិន​ឲ្យកូនក្ដីរបស់លោក នៅក្រៅឃុំជាបណ្តោះអាសន្នទេ ដោយយោងតាមមូលហេតុពីរ៖ ទីមួយ សាលា​ដំបូង​មិន​ទាន់បញ្ចប់ការស៊ើបអង្កេត និងទីពីរ លោក អ៊ុំ សំអាន អាចបង្កចលាចលក្នុងសង្គម ប្រសិនបើ​នៅ​ក្រៅ​ឃុំ។

លោកមេធាវី បានថ្លែងឲ្យដឹងថា៖ «សភា​​​ស៊ើប​​​សួរ​​​សាលា​​​ឧទ្ធរណ៍ ​​​​​​យល់​​​ឃើញ​​​ថា ​​​គាត់​​​ជា​​​តំណាង​​​រាស្ត្រ​​​ ការ​​​ដែល​​​ដោះ​​​លែង​​​គាត់​​​ឲ្យ​​​នៅ​​​ក្រៅ​​​ឃុំ​​​​​​ អាច​​​មាន​​​ឥទ្ធិពល​​​​​​បណ្តាល​​​ឲ្យ​​​មាន​​​ភាព​​​វឹក​​​វរ​​​ក្នុង​​​សង្គម។ ទី​​​២ សភា​​​ស៊ើប​​​សួរ​​​​សាលា​​​​​​ឧទ្ធរណ៍​​​​យល់​​​ឃើញ​​​ថា ចៅក្រម​​​​​​សាលា​​​ដំបូង​​​​​​រាជ​​​ធានី​​​ភ្នំពេញ​​​​​​ មិន​​​ទាន់​​​បិទ​​​នីតិ​​​វិធី​​​ស៊ើប​​​សួរ​​​នៅ​​​ឡើយ។»

លោកតំណាងរាស្ត្រ អ៊ុំ សំអាន ដែលមានឈ្មោះល្បីល្បាញ នៅក្នុងសំនុំរឿងព្រំដែនកម្ពុជា-វៀតណាម ត្រូវ​បាន​អាជ្ញាធរចាប់ខ្លួន កាលពីយប់រំលងអាធ្រាត្រ ឈានចូលថ្ងៃទី១១ ខែមេសា ឆ្នាំ២០១៦ ក្នុងខេត្តសៀមរាប បន្ទាប់​ពី​លោក​បានត្រឡប់មកដល់កម្ពុជាវិញ កាលពីថ្ងៃទី១០ ខែមេសា។ បន្ទាប់មក ព្រះរាជអាជ្ញា នៅសាលា​ដំបូង​រាជធានី​ភ្នំពេញ បានចោទប្រកាន់លោក អ៊ុំ សំអាន នៅថ្ងៃនៅថ្ងៃទី១២ ខែមេសា ឆ្នាំ២០១៦ ពីបទញុះញង់ ឲ្យ​ប្រព្រឹត្ត​បទឧក្រិដ្ឋជាអាទិ៍ និងឲ្យមានការរើសអើង តាមមាត្រា៤៩៥ និង៤៩៦នៃក្រមព្រហ្មទណ្ឌ តាមរយៈ​សកម្មភាព​របស់លោក ពីឆ្នាំ២០១៥ រហូតដល់ថ្ងៃទី១០ខែមេសា ឆ្នាំ២០១៦ ដែលមានជាប់ពាក់ព័ន្ធ នឹង​សំនុំ​រឿង​ប្រើប្រាស់​ផែនទីក្លែងក្លាយ។

ជាមួយនឹងដៃជាប់ខ្នោះ លោក អ៊ុំ សំអាន ដែលត្រូវបានបញ្ជូន មកសាលាឧទ្ធរណ៍ដែរនោះ បានថ្លែងដោយខ្លី នៅ​មុន​សវនាការនាព្រឹកនេះថា៖ «រឿងដែលអយុត្តិធម៌ អ្នកការពារទឹកដី ត្រូវជាប់ពន្ធនាគារ ឯអ្នកធ្វើឲ្យ​បាត់បង់​ទឹកដី គឺជាអ្នកស្នេហាជាតិនិងរួចខ្លួនទៅវិញ»។ តំណាងរាស្ត្ររូបនេះ បានថ្លែងការពារខ្លួនទៀតថា ការចាប់​ខ្លួន​របស់​លោក បានធ្វើឡើងផ្ទុយនឹងរដ្ឋធម្មនុញ្ញ ត្រង់មាត្រា៨០។

តាមមាត្រា៨០ នៃរដ្ឋធម្មនុញ្ញាកម្ពុជា បានចែងថា៖ «តំណាងរាស្ត្រ មានអភ័យឯកសិទ្ធិសភា។ តំណាងរាស្ត្រ​រូប​ណា​ក៏​ដោយ មិន​អាច​ត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុ ពីបានសំដែងយោបល់ ឬ​បញ្ចេញ​មតិ ក្នុង​ការ​បំពេញ​មុខងាររបស់ខ្លួន សោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការ​ឃុំ​ខ្លួន សមាជិក​ណា​មួយ​នៃ​រដ្ឋសភា នឹង​អាចធ្វើទៅកើត លុះត្រាតែមានការយល់ព្រមពីរដ្ឋសភា ឬពី​គណៈ​កម្មាធិការ​អចិន្ត្រៃយ៍ របស់រដ្ឋសភា ក្នុង​ចន្លោះ​​សម័យ​ប្រជុំនៃរដ្ឋសភា វៀរលែងតែក្នុងករណី​បទល្មើស​ព្រហ្មទណ្ឌ​ជាក់ស្ដែង។ (...)»។

ប៉ុន្តែមាត្រា៨០នេះ ត្រូវបានអាជ្ញាធររដ្ឋាភិបាល និងក្រុមសមាជិកសភាដែលមាននិន្នាការ ស្និតនឹង​គណបក្ស​ប្រជាជនកម្ពុជា (គណបក្សកាន់អំណាច) យកទៅបកស្រាយ ខុសពីការលើកឡើងរបស់លោក អ៊ុំ សំអាន ខាង​លើ៕