ប្រធានាធិបតី​យួន​ស្នើ ហេង សំរិន ឲ្យ​បន្ត«គាំទ្រ​បណ្ដាជន​យួន»​នៅ​កម្ពុជា

ប្រមុខរដ្ឋវៀតណាម បានរំលឹកប្រធានរដ្ឋសភាកម្ពុជា យ៉ាងដូច្នេះ នៅក្នុងជំនួបមួយ កាលពីចុងសប្ដាហ៍នេះ។ ជំនួបនោះ ជាផ្នែកមួយ នៅក្នុងដំណើរទស្សនកិច្ចផ្លូវរដ្ឋ របស់លោក ហេង សំរិន ទៅកាន់ប្រទេសវៀតណាម តាមការអញ្ជើញ របស់ប្រធានរដ្ឋសភាប្រជាជន​ នៃសាធារណរដ្ឋសង្គមនិយម​វៀតណាម។
ប្រធានាធិបតី​យួន​ស្នើ ហេង សំរិន ឲ្យ​បន្ត«គាំទ្រ​បណ្ដាជន​យួន»​នៅ​កម្ពុជា
ពីឆ្វេងទៅស្ដាំ៖ លោក ហេង សំរិន ប្រធានរដ្ឋសភាកម្ពុជា និងលោក ត្រឹង ដាយខ្វាង ប្រធានាធិបតីវៀតណាម។ (រូបថត VOV)
Loading...
  • ដោយ: មនោរម្យ.អាំងហ្វូ (info[email protected]) - ភ្នំពេញ ថ្ងៃទី២៧ មិថុនា ២០១៧
  • កែប្រែចុងក្រោយ: June 27, 2017
  • ប្រធានបទ: អន្តោប្រវេសន៍
  • អត្ថបទ: មានបញ្ហា?
  • មតិ-យោបល់

ការស្នើឲ្យបន្ត «គាំទ្របណ្ដាជនយួន» ដែលកំពុងរស់នៅ ក្នុងប្រទេសកម្ពុជា ត្រូវបានស្នើឡើង ដោយប្រធានាធិបតីវៀតណាម លោក ត្រឹង ដាយ ខ្វាង (Trân Dai Quang) ទៅកាន់លោក ហេង សំរិន ប្រធានរដ្ឋសភាកម្ពុជា ក្នុងជំនួបមួយកាលពីថ្ងៃទី២៤ ខែមិថុនា ចុងសប្ដាហ៍កន្លងមក ក្នុងរដ្ឋធានីហាណូយ ប្រទេសវៀតណាម។ នេះ បើតាមការផ្សាយឲ្យដឹង របស់ទីភ្នាក់ងារព័ត៌មានផ្លូវការវៀតណាម ដែលហៅកាត់ថា «VNA»។

ទីភ្នាក់ងារព័ត៌មាន បានបញ្ជាក់ថា ការ«គាំទ្របណ្ដាជនយួន» ដែលកំពុងរស់នៅយ៉ាងច្រើន នៅក្នុងប្រទេសកម្ពុជា ជាការរួមចំណែក ក្នុងការលើកស្ទួយ«មិត្តភាពរវាងប្រទេសទាំងពីរ វៀតណាម-កម្ពុជា»។

មិត្តភាព សាមគ្គីភាព និងកិច្ចសហប្រតិបត្តិការ ដែលចាំបាច់ត្រូវពង្រឹក ដោយប្រទេសទាំងពីរ។ នេះ បើតាមការលើកឡើង របស់លោក ត្រឹង ដាយ ខ្វាង ធ្វើឡើងទៅកាន់លោក ហេង សំរិន និងត្រូវបានដកស្រង់សំដី ដោយទីភ្នាក់ងារព័ត៌មានដដែល។ លោកថា ភាពជាមិត្តនេះ នឹងជួយសំរួលដល់ចំណងទាក់ទាក់ ផ្នែកសេដ្ឋកិច្ច ពាណិជ្ជកម្ម និងការវិនិយោគទុន ដោយមិនភ្លេចផងទេ នូវការពង្រឹង នូវចំណងការទូត រវាងប្រជាជននៃប្រទេសទាំងពីរ ជាពិសេសរវាង«យុវជនជំនាន់ក្រោយ»។

ទីភ្នាក់ងារព័ត៌មាន មិនបានបញ្ជាក់​លំអិតបន្ថែម ថាតើការ«គាំទ្របណ្ដាជនយួន នៅកម្ពុជា»នោះ ត្រូវធ្វើឡើងក្នុងរបៀបណា ឬក្នុងទម្រង់​បែបម៉េចទេ តែបានអះអាងថា ជាការស្នើឡើង របស់ប្រធានាធិបតីវៀតណាម ទៅកាន់ប្រធានរដ្ឋសភា និងរដ្ឋសភាជាតិកម្ពុជាទាំងមូល។

មន្ត្រី​ជាន់ខ្ពស់ នៃ​ក្រសួង​មហាផ្ទៃ​កម្ពុជា ធ្លាប់បានថ្លែងប្រាប់ប្រព័ន្ធផ្សព្វផ្សាយ កាលពីខែសីហាកន្លងទៅ ថាជនអន្តោប្រវេសន៍យួន ដែលកំពុងរស់នៅក្នុងប្រទេសកម្ពុជា មានចំនួនសរុប ប្រមាណជាង១៦ម៉ឺននាក់។ លោកនាយ​ឧត្ដមសេនីយ៍ សុខ ផល អគ្គនាយក ​នៃ​អគ្គ​នាយកដ្ឋាន​អន្តោប្រវេសន៍ បានបញ្ជាក់នៅពេលនោះថា ពីក្នុងចំណោមនោះ មានតែ៣ម៉ឺននាក់ប៉ុណ្ណោះ ដែលកំពុងរស់នៅដោយស្របច្បាប់។

ដោយឡែក ក្នុងជំនួប ហេង សំរិន-ត្រឹង ដាយ ខ្វាង ដែលត្រូវបានធ្វើឡើង នៅខាងមុខរូបចម្លាក់ របស់លោក ហូ ជីមិញ ដ៏ធំនោះ មេដឹកនាំទាំងពីររូប នៅបានជជែកគ្នា ពីកិច្ចការមូយចំនួនទៀត ក្នុងនោះមានការលើកឡើង ពីសំណាក់ប្រធានាធិបតីវៀតណាមថា ប្រជាជនកម្ពុជាកំពុងទទួលបានផ្លែផ្កា ពីជោគជ័យដ៏ត្រចះត្រចង់ នៃស្នាដៃជាតិ សម្រាប់សន្តិភាព ស្ថេរភាព និងភាពរុងរឿង ក្រោមការដឹកនាំ​របស់រដ្ឋាភិបាល​គណបក្ស​ប្រជាជន​កម្ពុជា។ ខណៈលោក ហេង សំរិន បានបញ្ជាក់​ទៅកាន់​មេដឹកនាំ​វៀតណាម​ថា ប្រជាជនកម្ពុជានឹង«ចងចាំជានិច្ច» នូវការលះបង់ដ៏ធំធេង របស់កងទ័ពវៀតណាម នៅក្នុងការប្រយុទ្ធ ដើម្បីរំដោះកម្ពុជា ពីរបបប្រល័យពូជសាសន៍ ប៉ុលពត។

ប៉ុន្តែរឿងខ្លះ ដែលមិនមែនជារឿង ដែលទាក់ទងជាមួយកិច្ចការបរទេសនោះ ក៏ត្រូវបានលោក ហេង សំរិន ថ្លែងនៅក្នុងជំនួបនោះដែរ។ លោកថា ប្រទេស​កម្ពុជា នឹងបន្តរក្សា«លំនឹងបរិយាកាសនយោបាយ» បន្ទាប់ពីការបោះឆ្នោត ជ្រើសរើសក្រុមប្រឹក្សាឃុំសង្កាត់ អាណត្តិទី៤កន្លងមកថ្មីៗ។ រឿងរ៉ាវនៃការបោះឆ្នោត ដែលជារឿងផ្ទៃក្នុងកម្ពុជា តែបានប៉ះពាល់តិចឬច្រើន ទៅដល់គណបក្សប្រជាជនកម្ពុជា ដែលមានទំនាក់ទំនងជិតស្និត ជាមួយប្រទេស​វៀតណាម ជាពិសេស​ជាមួយ​គណបក្ស​កុម្មុយនីស របស់ប្រទេសនេះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...