ការបាត់យន្ដហោះ MH370 ធ្វើឲ្យផែនទីបាតសមុទ្រថ្មីមួយ ចាប់បដិសន្ធិ
- ដោយ: សុបិន្ដ ដោយ សុបិន្ត (ទាក់ទង៖ [email protected]) - ម៉ុងរ៉េអាល់ ថ្ងៃទី០៤ តុលា ២០១៤
- កែប្រែចុងក្រោយ: October 05, 2014
- ប្រធានបទ: វិទ្សាសាស្ត្រ
- អត្ថបទ: មានបញ្ហា?
- មតិ-យោបល់
-
ជាមួយនឹងការសិក្សាថ្មីមួយ ដែលបានផ្សាយនៅក្នុងទស្សនាវដ្ដីវិទ្យាសាស្ត្រ ក្រុមអ្នកស្រាវជ្រាវវិទ្យាសាស្ត្រ បានសម្រេចបាននូវផែនទីសណ្ឋានដីថ្មីមួយ ដែលនឹងលាតសន្ធឹងប្រមាណជា៨០% នៃបាតសមុទ្ររបស់ផែនដី។
លោកសាស្ត្រាចារ្យ ដៀតម៉ា មីល័រ (Dietmar Muller) មកពីសកលវិទ្យាល័យ ស៊ីដនី (ប្រទេសអូស្ត្រាលី) បានថ្លែងពន្យល់ថា៖ «ការបាត់យន្ដហោះ MH370 របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ នៅក្នុងមហាសមុទ្រឥណ្ឌា កាលពីជាង៦ខែមុន បានធ្វើឲ្យយើងដឹងខ្លួន ពីការស្គាល់មិនច្បាស់ ជុំវិញសណ្ឋានដី និងជម្រៅបាតសមុទ្រ។ យើងបានស្គាល់ពីស្ថានភាពដី របស់ភពព្រះអង្គារ បានច្បាស់ជាងសណ្ឋានដី នៅបាតសមុទ្ររបស់ផែនដី។»
ផែនទីថ្មីនេះ ត្រូវបានសម្រេចជារូបរាង ជាមួយនឹងការវាស់វែងដែលមានច្បាស់លាស់ខ្លាំងបំផុត នៃប្រព័ន្ធផ្កាយរណប CryoSat 2 របស់ភ្នាក់ងារអវកាសអ៊ឺរ៉ុប និងផ្កាយរណប Jason 1 របស់ភ្នាក់ងារអវកាសណាហ្សា (NASA) របស់អាមេរិក។ ដូច្នេះផែនទីថ្មី ស្ដីពីសណ្ឋានដីបាតសមុទ្រ នឹងមានភាពលំអិតរបស់វា យ៉ាងហោច ១០ដងច្រើនជាង ផែនទីដែលបានផ្សាយ កាលពីជាង២០ឆ្នាំមុន។
ពីមុន សណ្ឋានដី និងជម្រៅនៃបាតមហាសមុទ្រ ត្រូវបានស្រង់ដោយឧបរកណ៍ស្ទង់មួយ ដែលត្រូវបានបញ្ជាពីលើនាវាមួយទៅ។ ប៉ុន្តែបច្ចេកទេសនេះ មិនត្រឹមតែស្រង់មិនបានច្បាស់ ទៅលើសណ្ឋានដី និងជម្រៅសមុទ្រប៉ុណ្ណោះទេ តែថែមទាំងចំណាយថវិការយ៉ាងច្រើនសន្ធឹកសន្ទាប់ ហើយត្រូវប្រើរយៈពេលយូរនោះថែមទៀត។ លោកសាស្ត្រាចារ្យ មីល័រ បានបញ្ជាក់ថា៖ «គេត្រូវប្រើពេលប្រមាណជា២០០ឆ្នាំ ដើម្បីធ្វើផែនទីបាតសមុទ្រនេះ ដោយប្រើបច្ចេកទេសបញ្ជាពីលើនាវា ហើយត្រូវចំណាយអស់ច្រើនពាន់លានដុល្លារ»។
គេបានរកឃើញយ៉ាងច្បាស់បន្ថែមទៀត នូវភ្នំនៅបាតសមុទ្រច្រើនរាប់ពាន់ ដែលភ្នំខ្លះ មានកំពស់ដល់ទៅជាង១០០០ម៉ែត្រ។ អ្នកវិទ្យាសាស្ត្រម្នាក់ ដែលធ្វើផែនទីនេះ បានពន្យល់ថា៖ «ឥឡូវនេះ អ្នកអាចមើលដឹងយ៉ាងច្បាស់ ពីភ្នំលាក់ខ្លួនទាំងឡាយ ដែលជាទេសភាពរួមគ្នា នៅលើផែនដីយើងនេះ»៕