យន្ដហោះដឹកទំនិញ ចុះចតលើផ្លូវជាតិនៅអ៊ីតាលី!
- ដោយ: ឈូករ័ត្ន អត្ថបទ៖ ឈូករ័ត្ន ([email protected]) - ភ្នំពេញ ថ្ងៃទី០៥ សីហា ២០១៦
- កែប្រែចុងក្រោយ: August 05, 2016
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
អ្នកដែលភ័យជាងគេ នៅក្នុងហេតុការណ៍នេះ គឺអ្នកបើកបររថយន្ដ នៅលើផ្លូវថ្នល់ ព្រោះយន្ដហោះដឹកទំនិញមួយគ្រឿង បានចុះចតខុសព្រលាន នៅវេលាម៉ោង៤ទៀបភ្លឺ ព្រឹកថ្ងៃសុក្រនេះ។ យន្ដហោះដ៏ធំ បានបញ្ចប់ការហោះហើររបស់ខ្លួន នៅលើផ្លូវថ្នល់ជាតិនោះ ដែលស្ថិតនៅក្បែរព្រលានយន្ដហោះ នៃក្រុង«Bergame» ភាគខាងជើងប្រទេសអ៊ីតាលី។
នៅក្រោយហេតុការណ៍ ព្រលានយន្ដហោះ «Bergame» បានជួបនូវភាពរអាក់រអួល ហើយជើងហោះហើរជាច្រើន ត្រូវបានលប់ចោល ទាំងការហោះចេញ ទាំងការចុះចត។ រហូតមកដល់ម៉ោង៧ព្រឹក ទើបសេវាកម្មហោះហើរខ្លះ បានចាប់ផ្ដើមមានដំណើរការឡើងវិញ។ ចំណែកឯចរាចរណ៍ទាំងពីរទិស នៅលើផ្លូវថ្នល់វិញ ត្រូវបានកាត់ផ្ដាច់ អស់រយៈពេលជាច្រើនម៉ោងដូចគ្នា។
មកដល់ម៉ោង៩ព្រឹក ម៉ោងក្នុងស្រុក (ត្រូវនឹងម៉ោង ១៤រសៀល ម៉ោងនៅកម្ពុជា) គេនៅមិនទាន់ដឹងនៅឡើយ ពីមូលហេតុ ដែលបណ្ដាលឲ្យយន្ដហោះ បានចុះចតខុសផ្លូវដូច្នេះ។ ប៉ុន្តែសំណាងល្អ មិនមានសេចក្ដីរាយការណ៍ណាមួយ និយាយថា មានមនុស្សរងរបួសនោះឡើយ ទាំងបុគ្គលិកនៅលើយន្ដហោះបីនាក់ និងអ្នកបើកបររថយន្ដ នៅលើផ្លូវថ្នល់។
បើតាមសារព័ត៌មានអ៊ីតាលី «Corriere della Serra» បានរាយការណ៍ថា គ្រោះថ្នាក់ទំនងជាកើតឡើង ដោយសារស្ថានភាពឧត្តុនិយមដ៏អាក្រក់ ដែលកើតឡើងតាំងយប់ម្សិលម៉ិញ នៅក្នុងទ្វីបអ៊ឺរ៉ុបខាងត្បូង ជាពិសេសយន្ដហោះ បានព្យាយាមចុះចត នៅខណៈពេលមានខ្យល់ព្យុះ កំពុងបក់បោកនៅក្នុងតំបន់នោះ។
សារព័ត៌មានដដែល បានអះអាងទៀតថា យន្ដហោះបានជ្រុលដំណើររបស់ខ្លួន ចេញពីផ្លូវចុះចត ហើយបានបុកឲ្យរបើករបងខណ្ឌចែក របស់ព្រលានយន្ដហោះ និងបានបុកកំទេចរថយន្ដចតស្ងៀមជាច្រើនគ្រឿង មុននឹងមកឈប់ស្ងៀម នៅលើផ្លូវថ្នល់ជាតិ លេខ៥៩១ ដែលភ្ជាប់ក្រុងខាងលើ ទៅនឹងក្រុងមួយទៀត ឈ្មោះ «Zanica» របស់ប្រទេសអ៊ីតាលី៕
» ទិដ្ឋភាពមួយចំនួនទៀត បង្ហាញពីគ្រោះថ្នាក់ខាងលើ៖
