លោក ឆាល រ៉ាំសី វីរបុរស ដែលបានជួយស្ត្រីបីរូបឲ្យរួចខ្លួន ពីការចាប់ពង្រត់។

ថ្លែងតាមបណ្ដាញទូរទស្សន៍ និងសារព័ត៌មានជាច្រើនក្នុងពិភពលោក លោកឆាល រ៉ាំសី បានឲ្យដឹងថា «ខ្ញុំលឺសូរសម្លេង​ស្រែក ខណៈពេលដែលខ្ញុំកំពុងតែញ៉ាំ"ម៉ាកដូណាល់"។ ខ្ញុំចេញទៅក្រៅផ្ទះ ហើយខ្ញុំបានឃើញនារីម្នាក់ ដែលមាន​អាការៈ​ជ្រួលច្របល់ជាខ្លាំង បានកំពុងព្យាយាមចេញពីផ្ទះរបស់ខ្លួន។ ខ្ញុំបានដើរទៅជិតដល់ច្រកចូលផ្ទះនោះ ហើយលឺនាង​និយាយថា៖ ជួយខ្ញុំឲ្យចេញទៅផង! ខ្ញុំនៅទីនេះតាំងពីយូរមកហើយ។»

ពាក្យសម្ដីជាមួយនឹងរូបភាពផ្ទាល់ខ្លួន បានថ្លែងប្រាប់ទៅកាន់ពិភពលោក ជាមួយការរៀបរាប់យ៉ាងលំអិត ពីហេតុការណ៍​ដែលលោកបានជួយ នាងអាមេនដា ប៊ើរី (Amanda Berry) ឲ្យរំដោះខ្លួនរួចពីជនចាប់ពង្រត់ ឈ្មោះអារីយ៉េល កាស្ត្រូ (Ariel Castro)។ មកទល់នឹងពេលនេះ នរណាៗក៏គេបានដឹងថា «វីរបុរសញ៉ាំម៉ាកដូ» រូបនេះ បានផ្អាកអាហារពេលរបស់គាត់ ដើម្បីជួយស្ត្រីរងគ្រោះទាំងបីនាក់ ហើយពួកគេបានស្នើសុំឲ្យសហគ្រាសហឹមប៊ើហ្គើរ ផ្ដល់រង្វាន់ឲ្យទៅវីរជនរបស់យើង។

ការស្នើសុំនេះ ទទួលបានជោគជ័យដូចបំណងមែន។ កាលពីថ្ងៃព្រហស្បត្តិ៍ អ្នកនាំពាក្យសហគ្រាសដ៏ធំរបស់អាមេរិក បាន​បញ្ជាក់ប្រាប់បណ្ដាញទូរទស្សន៍ស៊ីអ៊ិនអ៊ិន ថា ម៉ាកដូណាល់ បានឲ្យរង្វាន់ទៅលោកឆាល រ៉ាំសី នូវការទទួលទាន​ហឹមប៊ើហ្គើរ ក្នុងរយៈពេលមួយឆ្នាំ ដោយឥតគិតថ្លៃ។ មិនត្រឹមតែប៉ុណ្ណោះ សហគ្រាសដែលមានភោជនីយដ្ឋាន នៅជុំវិញ​ពិភពលោកមួយនេះ ថែមទាំងបានផ្ដល់វិភាគទានក្នុងនាម ឆាល រ៉ាំសី និងស្ត្រីទាំងបីរូប នូវទឹកប្រាក់ចំនួន១០ពាន់ដុល្លា សម្រាប់កម្មវិធីសង្គ្រោះកុមាទាំងឡាយរ ដែលត្រូវបានគេចាប់ពង្រត់។

ឆាល រ៉ាំសី ដែលធ្លាប់មានរឿងប្រលាក់ប្រលូក ជាមួយតុលាការទាក់ទងនឹងគ្រឿងញៀន ការលួចគាស់ផ្ទះ និងអំពើហឹង្សា​ក្នុងផ្ទះតាំងពីឆ្នាំ២០០០នោះ នឹងមិនចំណាយប្រាក់សូម្បីមួយសេនឡើយ បើសិនជាគាត់ចូលញ៉ាំហឹមប៊ើហ្គើរមួយពេល នៅក្នុងភោជនីយដ្ឋានចំនួន១៣ផ្សេងទៀតប្រចាំតំបន់។ ការលើកទឹកចិត្តនេះ បានផ្ដល់ជូនគាត់ រហូតមួយជីវិត ដោយ​មិន​មានកាលកំណត់។

សូមអានអត្ថបទដែលទាក់ទងនឹងសំនុំរឿងនេះឡើងវិញ ដោយចុចនៅទីនេះ។ ខាងក្រោមជាវីដេអូ ស្ដីពីកិច្ចសម្ភាស​ដែល​ឆាល រ៉ាំសី បានផ្ដល់ទៅឲ្យស្ថានីយទូរទស្សន៍៖

នៅពេលអ្នកដឹងថា មានរង្វាន់ដល់ដៃ និងមានការលើកទឹកចិត្តបែបនេះ តើអ្នកមានបំណងចងក្លាយជា«វីរបុរស»​ដូច​គាត់​ដែរឬទេ?

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៤ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ