ហ៊ុន ម៉ាណែត ឡើងជាមេទ័ពកំពូល សម្រាប់រយៈពេលបីថ្ងៃ
ឪពុកកាន់តំណែង ជានាយករដ្ឋមន្ត្រីផង និងជាអគ្គមេបញ្ជាការកងកម្លាំងប្រដាប់អាវុធផង ខណៈពេលនេះ កូនប្រុសកំពុងបោះជំហាន ទៅកាន់តំណែង ជាអគ្គមេបញ្ជាការកងយោធពលខេមរភូមិន្ទ ដែលជាតំណែងដ៏កំពូល នៅក្រោមបញ្ជា ត្រឹមតែឪពុកខ្លួនប៉ុណ្ណោះ។ លោក ហ៊ុន ម៉ាណែត កូនប្រុសច្បង របស់លោក ហ៊ុន សែន ដែលកំពុងកាន់តួនាទី ជាអគ្គមេបញ្ជាការរង នៃកងយោធពលខេមរភូមិន្ទ ត្រូវបានប្រគល់តួនាទី ជាអគ្គមេបញ្ជាការស្ដីទី នៃកងយោធពលខេមរភូមិន្ទ ជំនួស លោក សៅ សុខា ក្នុងពេលលោកសម្រាកព្យាបាលជំងឺ នៅប្រទេសសឹង្ហបុរី ចំនួនបីថ្ងៃ។
លិខិតប្រគល់តំណែងមេទ័ពកំពូលស្ដីទី នៃកងយោធពលខេមរភូមិន្ទ ចុះថ្ងៃទី២៤ សីហា ដែលបានមកដល់ដៃអ្នកសារព័ត៌មាន នៅថ្ងៃទី២៧ សីហា បានបញ្ជាក់ពីមូលហេតុ នៃការប្រគល់តំណែងនេះថា គឺដោយសារលោក សៅ សុខា ត្រូវទៅព្យាបាលជំងឺ នៅប្រទេសសឹង្ហបុរី ចំនួន៣ថ្ងៃ គឺពីថ្ងៃទី២៦ ដល់ថ្ងៃទី២៨ [...]
