រូបថតសាកសព កុមារតូច ដែលមានឈ្មោះ អៃឡាន គៀរឌី (Aylan Kurdi) អណ្ដែតមកទើរនៅលើឆ្នេរ នៃ​ប្រទេស​ទួរគី ដូចបានបង្ហាញខាងលើនេះ ត្រូវបានបង្ហោះព័ទ្ធជុំវិញផែនដី តាមរយៈសារព័ត៌មាន និងតាម​បណ្ដាញ​​សង្គម។ កុមារ អៃឡាន ដែលបានលង់ទឹកស្លាប់នេះ មានអាយុ៣ឆ្នាំហើយ។ បើគេដឹងពីហេតុការណ៍ នៃ​ការ​ធ្លាក់​​ទឹក​ របស់គ្រួសារកុមារទាំងមូលនេះ សភាពអាណោចអធម ស្រយ៉ុតស្រយ៉ង់ នឹងមានកាន់តែខ្លាំង​ឡើង។

ឪពុករបស់កុមារ លោក អាបដាឡាហ៍ សេនូ (Abdallah Shenu) បានថ្លែងរៀបរាប់ ពីហេតុការណ៍ដ៏រន្ធត់នេះ ប្រាប់ទីភ្នាក់ងារសារព័ត៌មាន «Dogan» ថា កូនៗរបស់លោក បានរបូតដៃ ឡើងកាណូត ដើម្បីភៀសខ្លួន ចេញ​ពីប្រទេសស៊ីរី ទៅកាន់ប្រទេសក្រិច កាលពីយប់ថ្ងៃអង្គារ ចូលថ្ងៃពុធ សប្ដាហ៍មុន។ ក្នុងចំណោមកូនៗទាំងនោះ មានកុមារ អៃឡាន គៀរឌី មួយរូបផង។

លោក អាដាឡាហ៍ បាននិយាយឲ្យដឹងទៀតថា៖ «យើងមានអាវការពារទាំងអស់ ប៉ុន្តែកាណូតបានឃ្លោងយ៉ាង​ខ្លាំង ដោយសារតែមនុស្សនៅលើនោះ នាំគ្នាងើបឈរឡើង (ដែលធ្វើឲ្យគ្រួសាលោក ធ្លាក់ចូលទឹកទាំងអស់)។ ខ្ញុំបានចាប់ដៃភរិយាខ្ញុំ។ ប៉ុន្តែកូនៗរបស់ខ្ញុំ បានរបូតចេញពីដៃខ្ញុំ។»។

«ទាំងអស់គ្នាស្រែក»

ភរិយាលោក និងត្រូវជាម្ដាយកុមារ នាង រ៉ៃអាណា (Rihanna) អាយុ២៧ឆ្នាំ ជាមួយនឹងកូនប្រុសម្នាក់ទៀត អាយុ​៥ឆ្នាំ បានបានលង់ទឹក នៅក្នុងហេតុការណ៍នេះដែរ។ លោក អាដាឡាហ៍ បាននិយាយទាំងក្ដុកក្ដួលថា៖ «មេឃ​ងងឹតចាក់ភ្នែក ហើយទាំងអស់គ្នាស្រែកឡើង។ ហេតុដូច្នេះហើយ ទើបភរិយានិងកូនរបស់ខ្ញុំ មិនបាន​ស្ដាប់ឮ​សម្លេងស្រែកហៅ របស់ខ្ញុំ។ ខ្ញុំបានព្យាយាមហែលទឹក ឆ្ពោះមកកាន់ឆ្នេរវិញ ដោយសារខ្ញុំសម្លឹងឃើញពន្លឺ ប៉ុន្តែ​ខ្ញុំរកមិនឃើញភរិយា និងកូនរបស់ខ្ញុំនោះឡើយ នៅពេលមកដល់គោក។»

«ខ្ញុំបានទៅកាន់មន្ទីរពេទ្យ... គឺនៅទីនោះហើយ ដែលខ្ញុំបានដឹង ពីដំណឹងដ៏រន្ធត់នេះ» ឪពុកកុមារ អៃឡាន បាន​ថ្លែងបន្ត។

លោក អាដាឡាហ៍ សេនូ ដែលមានដើមកំណើត ជាជាតិគៀដ (kurde) និងមានទីលំនៅ ក្នុងក្រុង «Kobané» ភាគ​ខាងជើងនៃប្រទេសស៊ីរី បានថ្លែងបញ្ជាក់ ប្រាប់ទីភ្នាក់ងារដដែលថា ហេតុការណ៍នេះ បានកើតឡើង​បន្ទាប់​ពីលោក បានសាកល្បងជាលើកដំបូង ភៀសខ្លួនមកកាន់ប្រទេសក្រិច (សមាជិកសហគមន៍អ៊ឺរ៉ុប) ជាមួយនឹង​គ្រួសាររបស់លោក។ រីឯកាណូត ដែលពួកលោកជិះ នៅយប់នោះ ត្រូវបានក្រុមឆ្មាំសមុទ្រ នៃប្រទេសក្រិច ស្កាត់​ចាប់បាន៕