ការផ្លាស់ប្ដូរទម្លាប់មនុស្ស មិនជាពិបាកប៉ុន្មានទេ។ តែការផ្លាស់ប្ដូរផ្នត់គំនិត ទើបជាការលំបាក ជាពិសេស​នៅ​ពេលដែលគ្រប់គ្នា តែងតែគិតថា នៅចិញ្ចើមថ្នល់ ក៏ជាផ្នែកមួយ ឬជាកម្មសិទ្ធិ នៃលំនៅដ្ឋាន ឬ​ការិយាល័យ​របស់ខ្លួនដែរ​នោះ។ ការហួងហែង យកចិញ្ចើមផ្លូវ ជាកម្មសិទ្ធិផ្ទាល់ខ្លួននេះ បានបង្កឲ្យមានការកក​ស្ទះយ៉ាង​ច្រើន សម្រាប់​ការធ្វើចរាចរណ៍ ក្នុងដងផ្លូវមួយចំនួន នារាជធានីភ្នំពេញ។

ដោយសារហេតុផល សណ្ដាប់ធ្នាប់សាធារណៈនេះហើយ ទើបអាជ្ញាធរខណ្ឌដូនពេញ ដឹកនាំដោយលោក គួច ចំរើន អភិបាលខណ្ឌ បានចុះធ្វើការ បង្ក្រាបអ្នកយកចិញ្ចើមថ្នល់ មកធ្វើអាជីវកម្ម កាលពីព្រឹកថ្ងៃទី០២ ខែកញ្ញា​ឆ្នាំ២០១៥ កន្លងទៅនេះ។ នេះជាអ្វី ដែលគេអាចដឹងបាន នៅលើគណនីហ្វេសប៊ុកផ្ទាល់ខ្លួន របស់លោក។

ក្នុងឱកាសនោះ លោក គួច ចំរើន បានសរសេរឲ្យដឹងថា៖ «ការប្រើប្រាស់ចិញ្ចើមថ្នល់ នៅមានស្ថានភាព​ស្មុគ​ស្មាញ​នៅឡើយុ។ ខ្លះប្រើសម្រាប់ ចតមធ្យោបាយ ខ្លះដាក់តាំងទំនិញ ខ្លះដាក់ផើងផ្កា ខ្លះជីកផ្សារដាក់​ផ្លាក​ផ្សព្វ​ផ្សាយ ខ្លះបាំងបិទយកជាប្រយោជន៍ដាច់មុខ បង្ករភាពប្រឈមយ៉ាងធ្ងន់ធ្ងរ សំរាប់ទីក្រុងរបស់យើង សាលា​រាជធានី ខណ្ឌ សង្កាត់ បានជូនដំណឹងជាច្រើនដង រួចមកហើយ សុំអោយមានការចូលរួមរៀបចំ ចិញ្ចើម​ថ្នល់​របស់​យើង ទុកជាប្រយោជន៍សាធារណៈ សម្រាប់ថ្មើរជើង និង សោភណ្ឌភាពទីក្រុងយើង។ សាលា​ខណ្ឌ​ដូនពេញ​​សូមអង្វរបងប្អូន មេត្តាចូលរួមសហការរៀបចំ សម្រាប់ទីក្រុងរបស់យើងទាំងអស់គ្នា។»។

ទន្ទឹមនឹងការអំពាវនាវនេះ នៅតាមបណ្តោយផ្លូវលេខ ១៧២កែង៦៣ រហូតដល់ផ្លូវនរោត្តម នៅរាជធានីភ្នំពេញ ផ្លាកយីហោជាច្រើន ត្រូវបានអាជ្ញាធរដឹកចេញ ជាបណ្តើរៗ ដោយសារតែផ្លាកទាំងនោះ ធ្វើនៅតាមចិញ្ចើមផ្លូវ​សារធារណៈ បង្កការកកស្ទះ នៅពេលសាធារណៈជនធ្វើដំណើរ ក្នុងរាជធានីភ្នំពេញ។ លោក​អភិបាល​ខណ្ឌ​បាន​បញ្ជាក់ថា ចំពោះរឿងទាំងអស់នេះ សាលារាជធានីភ្នំពេញ ធ្លាប់បានជូនដំណឹង ជាសាធារណៈ ច្រើន​ដង​រួចមកហើយ តែប្រជាពលរដ្ឋដូចជាមិនសហការ។ ដូច្នេះ នៅថ្ងៃនេះ លោកបានដឹកនាំកម្លាំងចម្រុះ ខណ្ឌ​ដូនពេញ​ជាច្រើននាក់ ដើម្បីធ្វើការដកហូតវត្ថុហាមឃាត់ ដែលបានដាក់នៅលើផ្លូវរួមមាន ផ្លាកយីហោ ផើងផ្កា និងកន្លែងដាក់តាំងទំនិញជាដើម។

ដោយឡែក១១ខណ្ឌផ្សេងទៀត នៅរាជធានីភ្នំពេញ មិនទាន់មាន ការចុះបង្ក្រាបផ្ទះ ដែលឈ្លានពាន​ចិញ្ចើម​ផ្លូវសាធារណៈ ទៅជារបស់ផ្ទាល់ខ្លូន ដូចខណ្ឌដូនពេញនៅឡើយ។ ក្រោយពីការប្រមូលផ្ទាំងផ្សព្វផ្សាយ និង​ជម្រះផ្លូវ១៧២ កែងផ្លូវលេខ៦៣ រហូតដល់ផ្លូវនរោត្តមរួចមក លោកអភិបាលខណ្ឌដូនពេញ បានសំណូមពរ​ដល់​ប្រជាពលរដ្ឋទៀតថា៖ «សាលាខណ្ឌដូនពេញ សូមអង្វរបងប្អូនមេត្តាចូលរួម សហការរៀបចំ សម្រាប់​ទីក្រុង​របស់យើងទាំងអស់គ្នា»។ លោកពន្យល់ដែរថា បញ្ហាកកស្ទះ បណ្តាលមកពីកត្តាគ្មានចិញ្ចើមផ្លូវ សម្រាប់​អ្នកថ្មើរជើង ធ្វើដំណើរ៕