ករណីការប្តឹងផ្តល់គ្នារវាងក្រុមហ៊ុនអ៊េសឃេ និងលោក ខេមរៈ សេរីមន្ត ព្រមទាំងក្រុមគ្រួសារជនរងគ្រោះ​ បាន​ឈាន​ដល់ទីបញ្ចប់ហើយ ដោយភាគីរងគ្រោះ យល់ព្រមទទួលយកសំណង បើទោះបីជាសំណងនោះ មិនបានគ្រប់ចំនួន​ទៅតាមបណ្ដឹងក៏ដោយ។

តារាចម្រៀង ខេមរៈ សេរីមន្ដ។ (រូបថតហ្វេសប៊ុក)

រឿងក្តីតារា - ទីបំផុតទៅក្រោយការសម្របសម្រួល រវាងលោក ខេមរៈ សេរីមន្តនិង គ្រួសារជនរងគ្រោះដទៃទៀត ក្នុងគ្រោះថ្នាក់ចរាចរកាលពីខែមីនា ឆ្នាំ ២០១៣កន្លងទៅ ជាមួយក្រុមហ៊ុនអ៊េសឃេ ក្រោមការយោគយល់គ្នា ភាគី​ក្រុមហ៊ុនបានយល់ព្រមផ្ដល់សំណង ដល់ភាគីគ្រួសារអ្នកស្លាប់នីមួយៗ ចំនួន ១០,០០០ដុល្លារ និង អ្នករង​របួស​នៅ​ក្នុងហេតុការណ៍នោះ ចំនួន ៤,៥០០ ដុល្លារ។ ដោយឡែកសម្រាប់លោកខេមរៈ សេរីមន្ត ក្រុមហ៊ុនបានយល់ព្រម​សងនូវទឹកប្រាក់ចំនួន២៩.០០០ ដុល្លារ ដែលមានតម្លៃស្មើនឹងរថយន្ត TUNDRA ថ្មីស្រឡាងមួយគ្រឿង។

បើតាមលោក ខេមរៈ សេរីមន្ត តារាចម្រៀងល្បីឈ្មោះបោះសម្លេងនៅកម្ពុជា ប្រាប់គេហទំព័រក្នុងស្រុកមួយ បាន​ឱ្យ​ដឹងថា ក្រោយពីសាលក្រមសាលាដំបូងខេត្តព្រះសីហនុ និង សាលដីកាសាលាដំបូងខេត្ត បានសម្រេចថា ក្រុមហ៊ុន​អ៊េសឃេ ត្រូវសងការខូចខាតឱ្យដើមបណ្ដឹងលោក ខេមរៈ សិរីមន្ត ចំនួន ៨៥,០០០ដុល្លារ តារាកំប្លែង លោក យាយ ណយ សំណាង ចំនួន ២៥, ០០០ដុល្លារ ដោយឡែក សម្រាប់តារាកំប្លែង នាយ កុយ និង គ្រួសារជនរងគ្រោះផ្សេង​ទៀត២៣,០០០ដុល្លារ។ ប៉ុន្តែការសម្រេចនេះ ត្រូវបានក្រុមហ៊ុនបដិសេធមិនទទួលយក និងបានប្ដឹងបន្តទៅ​តុលាការ​កំពូល ដើម្បីរកយុត្តិធម៌របស់ខ្លួន។

តាមរយៈតារាចម្រៀងរូបនេះ ក្រោយពីភាគីទាំងពីរព្រមព្រៀងគ្នារួចរាល់ ពេលនេះក្រុមហ៊ុនបានដកពាក្យ​បណ្តឹង​វិញហើយ។ ដូច្នេះមានន័យថា រឿងនេះ ត្រូវបញ្ចប់ទាំងស្រុង។

សូមបញ្ជាក់ថា ការសម្រេចផ្តល់សំណងជាថវិកា របស់ក្រុមហ៊ុនអ៊េសឃេ ដល់ភាគីជនរងគ្រោះលោក ខេមរៈ សិរីមន្ត និងអ្នកដែលរងគ្រោះ ក្នុងឧប្បទ្ទវហេតុគ្រោះថ្នាក់ចរាចរណ៍ បានធ្វើឡើងក្នុងជំនួបស្វែងរកដំណោះស្រាយ ដើម្បី​បញ្ចប់រឿងក្រៅប្រព័ន្ធតុលាការ កាលពីថ្ងៃទី១១ ខែមិថុនា ឆ្នាំ២០១៤ម្សិលម៉ិញនេះ។

គួររម្លឹកថា លោក ខេមរៈ សិរីមន្ត តារាចម្រៀងប្រចាំផលិតកម្មសាន់ដេ រួមទាំងក្រុមការងារ ដែលរួមមានទាំងកូនប្រុស​របស់តារាកំប្លែងនាយ កុយ និងយាយ ណយ សំណាង បានជួបនូវឧប្បទ្ទវហេតុគ្រោះថ្នាក់ចរាចរ នៅលើផ្លូវជាតិ​លេខ​៤ ក្នុងខេត្តព្រះសីហនុ កាលពីថ្ងៃទី៧ ខែមីនា ឆ្នាំ២០១៣។ គ្រោះថ្នាក់នោះ បណ្តាលឲ្យរថយន្តរបស់លោក ខេមរៈ សិរីមន្ត ខូចខាតទាំងស្រុង រួមទាំងមានមនុស្ស ៦ នាក់បាត់បង់ជីវិត និង ៨នាក់ផ្សេងទៀតរងរបួស៕