អ្នក​នាំ​ពាក្យ​ក្រសួង​ការ​បរទេស​កម្ពុជា លោក កុយ គួង បាន​អះ​អាង​ពី​ពាក្យ​បណ្តឹង ថា​នឹង​អាច​កើត​ឡើង ប្រឆាំង​ទៅ​នឹង​ទាហាន​ថៃ ដែល​បាន​បាញ់​សម្លាប់​មនុស្ស ហើយ​កំទេច​សាក​សព បើ​កម្ពុជា​រក​ឃើញ​ថា សាក​សព​ទាំង​ពីរ​នោះ ជា​ជន​ជាតិ​ខ្មែរ​។

ក្រោយ​ការ​ចុះ​ហត្ថលេខា លើ​កិច្ច​ព្រម​ព្រៀង​សេវាកម្ម​ដឹក​ជញ្ជូន តាម​ផ្លូវ​អាកាស កម្ពុជា-ជប៉ុន មន្រ្តី​នាំ​ពាក្យ​ក្រសួង​ការ​បរទេស​កម្ពុជា បាន​រៀប​រាប់​ក្នុង​កិច្ច​សម្ភាស​ជា​មួយ​អ្នក​សារព័ត៌មាន កាល​ពី​ថ្ងៃ​ទី​១៤ ខែ​មករា ឆ្នាំ​២០១៥ ម្សិល​ម៉ិញ​នេះ​ថា រដ្ឋាភិបាល​កម្ពុជា និង​រដ្ឋាភិបាល​ថៃ បាន​នឹង​កំពុង​រង់​ចាំ​មើល​នូវ​លទ្ធផល ក្នុង​ការ​ធ្វើ​កោសល្យ​វិច័យ លើសំណាក​សព​ទាំង​ពីរ​នោះ ថា​ជា​ពលរដ្ឋ​ខ្មែរ មែន​ឬ​មិន​មែន។ បើ​ពិត​ជា​សំណាក​សព​នោះ​ជា​ជន​ជាតិ​ខ្មែរ ខាង​ក្រសួង​ការ​បរទេស នឹង​ប្តឹង​ទាម​ទារ​ឲ្យ​អាជ្ញាធរ​ថៃ​ស្វែង​រក​ឃាតករ មក​ផ្តន្ទា​ទោស​តាម​ផ្លូវ​ច្បាប់ ជា​មួយ​នឹង​សំណង​ដល់​គ្រួសារ​ជន​រង​គ្រោះ ដែល​បាន​ស្លាប់​ទៅ​នោះ។

លោក កុយ គួង បានបន្តថា៖ «ទុកឲ្យអ្នកបច្ចេកទេសពិនិត្យ ហើយដើម្បីផ្តល់លទ្ធផលថា ពីរនាក់នោះ ជា​ជន​ជាតិអ្វី? ជាជនជាតិថៃ ឬជនជាតិខ្មែរយើង? រហូតមកដល់ពេលនេះ យើងមិនទាន់ដឹងថា ជាជនជាតិអ្វីនៅ​ឡើយទេ។ (…)យើងបានបង្កើតអនុគណៈកម្មការចម្រុះមួយ ដែលមានផ្នែកសុខាភិបាល ព័ត៌មាន និងផ្នែក​យោធាចូលរួម ដើម្បីធ្វើការជាមួយថៃ ពាក់ព័ន្ធទៅរឿងសាកសព ដែលគេដុតឆេះរោលមើល​លែងស្គាល់​នោះ។ (…) អនុគណៈកម្មាធិការមួយនេះតែងតែធ្វើការ អំពាវនាវដល់សាច់ញាតិ ថាមានបងប្អូនស្លាប់ ហើយ​អគ្គ​កុងស៊ុល​ខ្មែរនៅថៃក៏តែងតែធ្វើបែបនេះដែរ។»

ថ្មីៗនេះ នីចំណុចស្រុកខ្លងហាត ខេត្ដស្រះកែវ ប្រទេសថៃ ជាប់នឹងស្រុកសំពៅលូន ខេត្ដបាត់ដំបង ប្រទេស​កម្ពុជា មានព័ត៌មានមយយចំនួន បានធ្វើការចុះផ្សាយថា ទាហានឈុតខ្មៅរបស់ថៃ បានបាញ់រះ មកលើប្រជា​ពលរដ្ឋខ្មែរ។ ក្នុងនោះមានប្រជាពលរដ្ឋខ្មែរពីរនាក់ ត្រូវបានបាញ់សម្លាប់ បន្ទាប់មកបានយកសពអ្នក​ទាំងពីរ​នោះ ទៅដុតបំផ្លាញបំបាត់ភស្តុតាងចោលទៀតផង។

កាលពីថ្ងៃទី ៩ ខែមករា ឆ្នាំ២០១៥ថ្មីៗនេះ នៅលើគេហទំព័រអគ្គស្នងការដ្ឋាននគបាលជាតិ ក៏បានស្រង់សំដី​លោក លោក កុយ គួង មកបញ្ជាក់ដែរថា ប្រទេសកម្ពុជាបានព្រមាន ដាក់ពាក្យបណ្ដឹងតាមផ្លូវច្បាប់ ប្រឆាំង​នឹង​អាជ្ញាធរថៃ ក្នុងករណីទាហានឈុតខ្មៅរបស់ថៃ ដែលបានប្រើកាំភ្លើងបាញ់សម្លាប់ប្រជាជនខ្មែរ នៅលើ​ទឹកដីថៃ កាលពីថ្ងៃទី០៧ ខែមករា ឆ្នាំ២០១៥ បន្ទាប់មកយកសាកសពដុតចោលបំបិទភស្តុតាង។

«ក្រសួងការបរទេសកម្ពុជា បានទាក់ទងទៅកាន់ការិយាល័យ ទំនាក់ទំនងព្រំដែនកម្ពុជា-ថៃ និងអាជ្ញាធរ​ខេត្ដស្រះកែវ ដើម្បីបើកការស៊ើបអង្កេត លើសំណុំរឿងមនុស្សពីរនាក់ ក្នុងចំណោម៤នាក់ ដែលត្រូវ​ទាហាន​ឈុតខ្មៅថៃប្រើកាំភ្លើងបាញ់រះ បណ្ដាលឲ្យស្លាប់ និងដុតបំផ្លាញសាកសព ស្ថិតនៅត្រង់ចំណុចស្រុកខ្លងហាត ខេត្ដស្រះកែវ ប្រទេសថៃ ដែលជាប់នឹងស្រុកសំពៅលូន ខេត្ដបាត់ដំបង។»

តាមការបញ្ជាក់របស់សាច់ញាតិជនរងគ្រោះ ដែលត្រូវបានទាហានថៃបាញ់សម្លាប់នោះ មានឈ្មោះ សូ រស់ ភេទប្រុស អាយុ៣៦ឆ្នាំ និង រឿន ជី ភេទប្រុស អាយុ២១ឆ្នាំ។ អ្នកទាំងពីររស់នៅភូមិគោកកី ឃុំសែនសុខ ស្រុក​ក្រឡាញ់ ខេត្ដសៀមរាប ប្រទេសកម្ពុជា។

សម្រាប់ក្រុមអ្នកប្រើប្រាស់បណ្ដាញព័ត៌មានសង្គមមួយចំនួន ដែលបានស្គាល់ពីវប្បធម៌របស់ជនជាតិថៃ បាន​លើកឡើងថា ជនជាតិថៃ បើទោះជាមានការស្អប់គ្នាយ៉ាងណាក៏ដោយ ពួកគេមិនដែលហ៊ានប្រមាថដល់​អាយុ​ជីវិតបែបនេះទេ។ ជាក់ស្តែងបើសិនជាអ្នកស្លាប់នោះ ជាជនជាតិថៃ ដូចជាគ្មានអ្វី ដែលត្រូវធ្វើឲ្យទាហានថៃ បាញ់សម្លាប់ជនជាតិគ្នាឯង លើទឹកដីរបស់ខ្លួននោះឡើយ។ ម្ចាស់គណនីហ្វេសប៊ុកមួយរូប បានសរសេរថា៖ «គ្មានជនជាតិណា ក្រៅពីជនជាតិខ្មែរទេ។ ព្រោះកន្លងមកទាហានថៃ មានគំនុំច្រើនជាមួយពលរដ្ឋកម្ពុជា ដែល​តែងតែឆ្លងដែនខុសច្បាប់ទៅកាន់ប្រទេសគេ ក្នុងការដណ្តើមការងារជនជាតិពួកគេនោះ។»៕

សូមទស្សនាកិច្ចសម្ភាស លោក គួយ គួង ជាមយយអ្នកសារព័ត៌មានដូចខាងក្រោម៖