«រោងចក្រហ្នឹង ទាល់តែមានកាត បានទៅបន្ទប់ទឹកបាន បើគ្មានទៅមិនបានទេ បើទៅ សន្តិសុខ​ឃើញចាប់​ទៅ​ព្រមាន បីដងដេញចេញពីរោងចក្រតែម្តង។ ចំងាយ ពីកន្លែងធ្វើការទៅបន្ទប់ទឹក ប្រមាណ១០០ម៉ែត្រ ថៅកែ​កំណត់​ម៉ោង ឲ្យទៅតែ០៥នាទីប៉ុណ្ណោះ» ទាំងនេះជាកាលើកឡើង របស់ ស្រីនឿន ដែលជាកម្មការនី​រោងចក្រ​«គានធិច» នៅឯស្រុកត្រាំកក់ ខេត្តតាកែវ។

នៅក្នុងទឹកមុខមិនសូវស្រស់ ដែលកំពុងឈរកាន់បដា តវ៉ានៅពីមុខវិមានរដ្ឋសភា ស្រីនឿន បានស្រដីថា ថៅកែ​រោងចក្ររបស់នាង មិនព្រមគោរពតាមពាក្យសន្យានោះទេ ដែលនៅក្នុងកិច្ចសន្យាការងារនោះ បានសរសេរ​ពី​ប្រាក់ខែគោល បន្ទាប់ពីធ្វើបានពីរខែ នឹងក្លាយជាបុគ្កលិកពេញសិទ្ធ ទទួលបានប្រាក់ខែ១២៨ ដុល្លាក្នុងមួយខែ។ តែបច្ចុប្បន្ន នាងធ្វើបាន០៥ខែហើយ បានតែ១២៣ដុល្លាប៉ុណ្ណោះ។ នាងបានបន្តថា មិនដូចអ្វី ដែលមាននៅក្នុង​កិច្ចសន្យាទេ លុយអាហារក៏គ្មាន សិទ្ធសេរីភាពក៏លំបាក សូម្បីតែទៅបន្ទប់ទឹក ក៏កំណត់ម៉ោងដែរ។

បញ្ហាលំបាកទាំងអស់នេះ មិនមែនមានតែនៅក្នុងរោងចក្រ «គានធិច» នោះទេ ដែលមានថៅកែ ជាជនជាតិ​ចិន​តៃវ៉ាន់នោះ ស្រីពេជ្រ ដែលកំពុងតែតវ៉ា និងធ្វើការដាក់ញត្តិ នៅមុខរដ្ឋសភា ជាមួយក្រុមសហជីពរបស់ខ្លូន ក៏​បាន​ថ្លែងឡើងដែរថា ការធ្វើកូដកម្មនេះ អស់រយៈពេល១២ថ្ងៃមកហើយ គោលបំណង សុំឲ្យថៅកែតម្លើងប្រាក់​ខែគោល១២៨ ដុល្លាដល់បុគ្គលិកពេញសិទ្ធ ចាប់ពី២ ខែឡើងទៅ និងទទួលយកប្រធានសហជីព ០៥រូប ដែល​ថៅកែបានបញ្ឈប់ និងផ្តល់លុយអាហារថ្ងៃត្រង់១ថ្ងៃ ២០០០រៀល ព្រមទាំងទាមទារ ឲ្យថៅកែរោងចក្រ​ឈប់​ប្រើច្បាប់ គាបសង្កត់លើកម្មករ នៅពេលធ្វើការ (ទាំងកាយវិការ និងពាក្យសម្តី)។

យ៉ាងណាក៏ដោយ ក៏អគ្គលេខាធិការសហព័ន្ធ សហជីពការងារកម្មករកម្ពុជា លោក ហៀក បូរី កាលពីព្រឹក​ថ្ងៃ​ទី២៣ ខែមិថុនា បានឲ្យដឹងថា ក្រុមកម្មករប្រមាណ ជាង២០០នាក់ខាងលើ ជាអ្នកធ្វើការ នៅក្នុងរោងចក្រ​ពីរ​ផ្សេងគ្នា ដែលកំពុងដាក់ញត្តិ នៅមុខរដ្ឋសភាទាមទារលក្ខខ័ណ មួយចំនួនពីរថៅកែរោងចក្រ ដែលតែងតែ​គម្រាម​ក្រុមកម្មករ មិនឲ្យផ្ទុះការតវ៉ាតម្លើងប្រាក់ខែ។ លោកថា កាលពីថ្ងៃទី២២ម្សឹលម៉ិញ ប្រធានផ្នែក​ជនជាតិ​ចិនទាំងនោះ បានទាំងប្រើរបងលួស និងបំពង់ពន្លត់អគ្គិភ័យ បាញ់រះទៅលើក្រុមកម្មករទៀតផង។

តែហេតុការណ៍ទាំងនោះ ត្រូវបានស្ងាត់ទៅវិញភ្លាមៗ ដោយមានកងកម្លាំងអាជ្ញាធរ ពីទីរួមខេត្តតាកែវ ដែល​ដឹកនាំ​ដោយលោក ឡាយ វណ្ណៈ អភិបាលខេត្តតាកែវ ចុះមកជួយធ្វើអន្តរាគមន៍ទាន់ពេល។ ការចុះផ្ទាល់នេះ លោកក៏បានដោះស្រាយ ជាមួយថៅកែរោងចក្រដែរ តែកម្មករថា នៅមិនទទួលបានលទ្ធផលសោះ ព្រោះ​ថៅកែ​រោងចក្រនោះ និយាយតែមាត់ មិនព្រមបោះត្រា នៅលើឯកសាររបស់កម្មករនោះទេ។

ទស្សនាវដ្ដីមនោរម្យ.អាំងហ្វូ កំពុងស្វែងរកទាក់ទង អ្នកទទួលខុសត្រូវ ពីរោងចក្រទាំងពីរខាងលើ ដើម្បីបក​ស្រាយពីការចោទប្រកាន់នេះ តែនៅមិនទាន់មានការឆ្លើយតប នៅឡើយ៕