ការបង្ក្រាបដោយកងកម្លាំងអាជ្ញាធរ ទៅលើក្រុមកម្មករ នៅមុខរោងចក្រឧស្សាហកម្មកាណាឌីយ៉ាណា ផ្លូវវ៉េងស្រេង សង្កាត់ចោមចៅ រាជធានីភ្នំពេញ នៅតែបន្តមានអំពើហិង្សាកើតមានដដែល ដោយក្នុងនោះ​កងកម្លាំងបាន​ប្រើ​គ្រាប់​កំាភ្លើងពិត រួមនឹងគ្រាប់បែកផ្សែងជាច្រើនគ្រាប់ បាញ់សំដៅលើក្រុមកម្មកររោងចក្រ និងអ្នក​កាសែតជាតិនិង​អន្តជាតិ ដែលចូលពីច្រកខាងលិច។

សាក្សីដែលបានឃើញកងកម្លាំងអាជ្ញាធរប្រើប្រាស់គ្រាប់កាំភ្លើងពិត បាញ់ស្រោចលើកម្មករ។ (រូបថត ហ្វេសប៊ុក)

វិបត្តិការងារ - ការបាញ់នេះ ពិតជាមានលក្ខណៈខ្លាំងក្លាណាស់ ដោយសារមានសេចក្ដីរាយការណ៍មកថា កង​កម្លាំងប្រដាប់អាវុធទាំងនោះ បានធ្វើការបាញ់សំដៅលើក្រុមកម្មករដោយត្រង់តែម្តង។ អ្នកយកព័ត៌មាន​ប្រចាំ​ឲ្យទស្សនាវដ្ដីមនោរម្យព័ងអាំងហ្វូ បានថ្លែងបញ្ជាក់ឲ្យដឹងថា នាពេលនេះ មានអ្នករងរបួសចំនួនប្រាំនាក់ ដោយ​ម្នាក់ត្រូវក្បាល ម្នាក់ត្រូវដៃ និងម្នាក់ត្រូវជើង ចំណែកពីរនាក់ទៀតមិនដឹងថាយ៉ាងម្តេចនៅឡើយ ហើយកំពុងត្រូវ​បាន​ដឹកបញ្ចួនទៅកាន់មន្ទីពេទ្យ ដើម្បីព្យាបាល។ សេចក្ដីរាយការណ៍បានបន្ថែមថា ការបង្ក្រាបនេះបានបង្ក​ឲ្យ​មាន​មនុស្សស្លាប់និងរបួស ប៉ុន្តែនៅមិនទាន់មានដឹងថាមានចំនួនប៉ុន្មានឲ្យពិតប្រាកដនៅឡើយ។

នៅក្នុងព្រឹត្តិការណ៍នេះដែរ ជនរងគ្រោះម្នាក់ ដែលត្រូវបានដឹងជញ្ជូនមកកាន់មន្ទីពេទ្យមួយ ដែលមានឈ្មោះថា «មន្ទីពេទ្យសម្រាកព្យាបាលឯករាជ្យ» ត្រូវបានផ្ទេទៅកាន់មន្ទីពេទ្យផ្សេង ដោយសារតែមន្ទីរពេទ្យ«ឯករាជ្យ»នោះ មិនទទួលជនរងរបួសដើម្បីសម្រាកព្យាបាល។ ហេតុការណ៍ ដែលបានបង្កឲ្យក្រុមកម្មករផ្ទុះកំហឹង ហើយបាន​ធ្វើការ​កម្ទេចបំផ្លាញមន្ទីពេទ្យនោះ ធ្វើឲ្យរងនូវការខូចខាតជាដំណំ។

សូមរំលឹកថា ការរាំច្រៀងដោយមិនបានបិទផ្លូវ របស់កម្មករក្នុងរោងចក្រមួយនេះ (កាណាឌីយ៉ា) កាលពីអាធ្រាត​ចន្លោះម៉ោង១១ ១២ អាធ្រាតយប់មិញនេះ ត្រូវបានបង្ក្រាបយ៉ាងខ្លាំងក្លាជាទីបំផុត ពីកងប្រដាប់អាវុធអាវខ្មៅ នេះ​តាមសម្តីបងស្រី សោភ័ណ កម្មការនី រោងចក្រកាត់ដេរកាណាឌីយ៉ាណា។ ចំណែកលោក សុខ សុខុម ដែលជា​អ្នករស់នៅជិតខាង និងជាសាក្សីឃើញព្រឹត្តិការណ៍ផ្ទាល់ភ្នែក បានប្រាប់ពីហេតុការណ៏ហិង្សាយប់មិញថា មាន​ការ​វាយដុំបង្ករបួសស្នាមបាក់ដៃ និងយុវជន«ស្លាប់»ម្នាក់នៅមុខផ្សារឯករាជ្យ២។

ការបង្ក្រាបនេះ ធ្វើឡើងដោយកងប្រដាប់អាវុធ ប្រមាណជាជាង១០០នាក់ ពីភាគខាងលិចនៃ ការបិទផ្លូវនេះ ទៅ​លើក្រុមកម្មករប្រមាណជាជាង ៣០០នាក់ ក្នុងនោះមានកម្មការិនីប្រហែលជាចំនួនពាក់កណ្តាល។ សូមបញ្ជាក់ថា មុនពេលមានការបង្ក្រាបដោយកងប្រដាប់អាវុធនេះ សារជាថ្មីនោះ កាលពីព្រឹកមិញនេះ មានឧទ្ធភាគចក្រតូចមួយ បានបើកក្រឡឹងជុំវិញក្រុមកម្មករដែលឈរបិទផ្លូវនៅទីនោះ ពី៥ទៅ៦ជុំ មុននឹង មានការបង្ក្រាបពីក្រុមសមត្តកិច្ច​ទាំងនេះ៕

-----------------------------------------------
ដោយ៖ ក. សេងហុង - ភ្នំពេញ ថ្ងៃ០៣ ខែមករា ឆ្នាំ ២០១៤
រាយការណ៏ដោយ៖ លោក អ៊ុម វ៉ារី
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ