នៅកម្ពុជាត្រូវតែបញ្ឈប់ជាបន្ទាន់ នូវការរិតត្បិតសេរីភាព និងការប្រើហិង្សាលើប្រជាពលរដ្ឋ កម្មករ ដែលទាមទារ​នូវសិទ្ធិ និងសេរីភាពតាមការសម្តែងមតិរបស់ពួកគេ។ នេះជាការថ្លែងរបស់លោក លោក រ៉ុង ឈុន ប្រធានសមាគម​គ្រូបង្រៀន​កម្ពុជា​ឯករាជ្យ និងជាប្រធានសហភាពសហជីពកម្ពុជា ដោយបានអះអាងបន្ថែមថា កម្ពុជាកំពុងតែរអិល​ជើង ឆ្ពោះទៅរ​ករបប«យោធា»​និយម ដែលជារបបផ្តាច់ការ។

លោករ៉ុង ឈុន ថ្លែងក្នុងពិធីជួបជុំស្វែងរកសន្តិភាពមួយ របស់យុវជន កាលពីដើមខែកញ្ញាឆ្នាំ២០១៣។( រូបថត MONOROOM.info/ Kessor)

ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី0៩ ខែឧសភា ឆ្នាំ២០១៤
-----------------------

សេរីភាពនៅកម្ពុជា - ក្នុងសន្និសីទសារព័ត៌មាន ថ្ងៃទី៨ ឧសភាម្សិលម៉ិញនេះ បន្ទាប់ពីអវត្តមានពីប្រទេសកម្ពុជា​ជាង​មួយខែមក លោក រ៉ុង ឈុន បានប្រកាសជំហរជាថ្មី ចំនួនបី ដើម្បីការទាមទារសិទ្ធិ និងសេរីភាពសម្រាប់ប្រជាពលរដ្ឋ ក៏ដូចជាកម្មក គ្រូបង្រៀន និងសម្រាប់អ្នករងនូវភាពអយុត្តិធម៌ នាពេលកន្លងមកជាដើម។

ជំហរទាំងបីរបស់ប្រធានសមាគមគ្រូបង្រៀនកម្ពុជាឯករាជ្យ បានប្រកាសជាផ្លូវការថា លោកនិងក្រុមការងារ បន្តការ​ស្វែងករនូវកិច្ចអន្តរាគម ដើម្បីឲ្យមានការដោះលែងអ្នកទាំង២១នាក់ ដែលបានចាប់ខ្លួនដោយអយុត្តិធម៌​នាពេល​កន្លងមក ទាមទារឲ្យមានការតម្លើងប្រាក់បៀវត្សកម្មករ ឲ្យបាន១៦០ ដុល្លា ក្នុងមួយខែ និងទាមទាឲ្យបញ្ចប់ការរារាំង ការប្រើកម្លាំង ពីសំណាក់អាជ្ញាធរកម្ពុជា មកលើប្រជាពលរដ្ឋ ដែលសម្តែងមតិ ដើម្បីសិទ្ធិ និងសេរីភាពនោះ។

ប្រធានសហភាពសហជីពកម្ពុជារូបនេះ បានដាក់កំហិតទៅកាន់រដ្ឋាភិបាលសព្វថ្ងៃ ដែលដឹននាំដោយលោក​នាយក​រដ្ឋមន្រ្តី ហ៊ុន សែន ថាត្រូវបញ្ឈប់ជាបន្ទាន់ នូវការប្រើប្រាស់អំពើហិង្សា វាយបង្រ្កាបលើប្រជាពលរដ្ឋ ជាយុវជន កម្មករ គ្រូបង្រៀន។ នេះជាល័ក្ខខណ្ឌតឹងរ៉ឹងមួយ ដែលលោកនិយាយថា អាចនឹងមានការដាក់ទណ្ឌកម្មធ្ងន់ធ្ងរ ពីបណ្តា​ប្រទេស​ម្ចាស់ជំនួយសំខាន់ របស់​កម្ពុជា។

ការដាក់ទណ្ឌកម្ម ពីបណ្តាប្រទេសម្ចាស់ជំនួយ ដូចយ៉ាងពីសហរដ្ឋអាមេរិកនោះ ត្រូវបានលោក រ៉ុង ឈុន ទទួល​ស្គាល់​ថា អាចមានការប៉ះពាល់ដល់ជីវភាព របស់កម្មករមួយភាគធំ តែលោកបាននិយាយទៀតថា វាគ្រាន់តែស្ថិតក្នុង​រយៈ​ពេល​ខ្លីមួយប៉ុណ្ណោះ។ «ប្រជាពលរដ្ឋខ្មែរ កម្មករ គ្រូបង្រៀន មិនទើបតែប៉ះពាល់នៅពេលអាមេរិកដាក់ទណ្ឌកម្មទេ តែសម្រាប់ប្រជាពលរដ្ឋខ្មែរ កម្មករ គ្រូបង្រៀនបានប៉ះពាល់រួចជាស្រេចទៅហើយ ក្នុងរយៈកាលជាង៣០ឆ្នាំមកនេះ នៅតែមិនទាន់មានដំណោះស្រាយ។ (...) បើប៉ះពាល់មួយខែ ពីរខែ ឬមួយឆ្នាំ យើងស៊ូរងទទួលផលប៉ះពាល់ ដើម្បីរក​ដំណោះស្រាយមួយល្អប្រសើរ សម្រាប់អនាគតកូនខ្មែរ និងរស់នៅបានសមរម្យក្នុងរយៈពេលយូរ។»

ទស្សនាវដ្ដីមនោរម្យ.អាំងហ្វូ នៅមិនទាន់ទទួលបានប្រតិកម្ម ពីមន្ត្រីរដ្ឋាភិបាលណាម្នាក់នៅឡើយ  ទាក់ទង​នឹងការ​ថ្លែងបរិហារខាងលើរបស់លោក រ៉ុង ឈុន  ដែលត្រូវបានស្គាល់ថាមាននិន្នាការទៅរកគណបក្សសង្គ្រោះជាតិ។

យ៉ាងណាក៏ដោយ លោក រ៉ុង ឈុន បានអំពាវនាវឲ្យខិតខំស្វែងរកដណោះស្រាយ រវាងខ្មែរនឹងខ្មែរ ដើម្បីបញ្ជៀសនូវ​ទណ្ឌកម្មខាងលើ។ លោកបាននិយាយឲ្យដឹងថា៖ «បើយើងមិនស្វែងរកដំណោះស្រាយ ទុកឲ្យការរំលោភបំពាន ការ​មិនយក​ចិត្តទុកដាក់នៅតែបន្ត យើងនឹងរងគ្រោះ ហើយបន្តការវេទនានេះជាបន្តទៅទៀត។ »

មេដឹកនាំសមាគម-សហជីពដ៏ល្បីឈ្មោះរូបនេះ បានបន្តដកស្រង់សម្តីរបស់ថ្នាក់ដឹកនាំអាមេរិក មកថ្លែងទៀតថា «បើ​លោក ហ៊ុន សែន នៅតែបន្តការរំលោភបំពាន ការ​បាញ់សម្លាប់កម្មករ ការបាញ់សម្លាប់ប្រជាពលរដ្ឋ ការប្រើ​ហិង្សា​មក​លើប្រជាពលរដ្ឋ អវសានរបស់លោក ហ៊ុន សែន កាន់តែខិតជិតដល់ហើយ»៕