ក្នុងឆ្នាំ២០១៤នេះ សាធារណៈរដ្ឋប្រជាមានិតចិន បានសម្រេចផ្តល់ជំនួយ ដល់ប្រទេសកម្ពុជាទ្វេដង ហើយជំនួយ​ទាំង​នោះ ភាគច្រើនផ្តោតទៅលើ ការបណ្តុះបណ្តាលធនធានមនុស្ស និងការផ្តល់សម្ភារៈផ្សេងៗទៀត។

លោក ស៊ី ជាំងភីង។ រូបថត AP។

ដោយ អ៊ំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៩ ឧសភា ២០១៤
---------------------

កិច្ចសហប្រតិបត្តិការ- បន្ទាប់ពីពិធីចុះហត្ថលេខាជាមួយមន្រ្តីជាន់ខ្ពស់ចិន នៅទីស្តីការក្រសួងការពារជាតិកម្ពុជា បានបញ្ចប់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិកម្ពុជាលោកទា បាញ់ នៅថ្ងៃទី០៩ ខែឧសភា ឆ្នាំ​២០១៤ នេះបានលើកឡើងថាប្រទេសចិនបានសម្រេចផ្តល់ជំនួយផ្នែកបណ្តុះបណ្តាលយោធាកម្ពុជាទ្វេដង ពោល​គឺចំនួនជាងមួយរយនាក់ កាលពីពេលកន្លងមក នឹងបង្កើនទៅដល់ជាងបីរយនាក់ ក្នុងពេលខាងមុខ។

ការសន្យាបង្កើនជំនួយ របស់ប្រទេសចិនទេ្វដងដល់ប្រទេសកម្ពុជា ត្រូវបានគេកត់សម្គាល់ឃើញថា បានកើតឡើង​តែប៉ុន្មានថ្ងៃប៉ុណ្ណោះ ក្រោយប្រទេសរុស្ស៊ីសើរើបំណុលដែលកម្ពុជា បានជំពាក់ តាំងទស្សវត្យន៍ទី៨០។ ហើយការ​បង្កើន​ជំនួយរបស់ចិនដល់កម្ពុជាទ្វេដងនេះ ក៏បានកើតឡើងចំពេលដែលជម្លោះដែនទឹកនៅសមុទ្រចិនខាងត្បូង រវាងប្រទេសចិន និងបណ្តាប្រទេសសមាជិកអាស៊ាន មួយចំនួន កំពុងឡើងកំដៅ។

តែសម្រាប់រដ្ឋមន្រ្តីក្រសួងការពារជាតិកម្ពុជា បានពន្យល់ដល់អ្នកសារព័ត៌មាន នៅក្រសួងការពារជាតិថា៖ «វាជា​ធម្មតា​ទេ ប្រទេសទៅមករកគ្នា តែងតែមានបញ្ហាហ្នឹង ដូចជាប្រទេសដទៃអញ្ចឹង។ តែទោះជាយ៉ាងណាក៏ដោយ ចំពោះចិន និងយើង នឹងមានកិច្ចសហប្រតិបត្តិការ កន្លែងខ្លះ វាមានចំណុច ល្អប្រសើរដែរសម្រាប់ ប្រទេសយើង គឺសំខាន់បំផុត គឺការជួយ បណ្តុះបណ្តាលដល់ ធនធានមនុស្ស ហើយលើកនេះគាត់ទទួលសិក្ខាកាមយើង សិក្សា​នៅចិនហ្នឹងមានទំហំធំធេង ច្រើនជាងលើកមុនៗ។»

លោក ទៀ បាញ់ បានអត្ថធិប្បាយបន្ថែមថា ដំណើរទស្សនកិច្ច របស់អនុប្រធាន គណៈកម្មាធិការ យោធាមជ្ឈឹមបក្ស របស់សាធារណរដ្ឋប្រជាមានិតចិន លោកស៊ុន គីលាង (Xun Qiliang) នៅកម្ពុជា គឺជាការពង្រឹងកិច្ច​សហ​ប្រតិបត្តិ​ការ រវាងប្រទេសកម្ពុជា និងចិន លើគ្រប់វិស័យ ឲ្យកាន់តែរឹងមាំ បន្ថែមទៀតស្របទៅតាម គោលនយោបាយ គ្រប់ជ្រុង​ជ្រោយ រវាងប្រទេសទាំងពីរ។

ចំពោះគណបក្សជំទាស់ និងក្រុមអង្គការសង្គមស៊ីវិលមួយចំនួននៅកម្ពុជា បានធ្វើការតិះតៀនទំនាក់ទំនងចាក់ទឹក​មិនលិច​ រវាងកម្ពុជា និងប្រទេសកុំមុយនីស្តចិនថា អាចនឹងធ្វើឲ្យប៉ះពាល់ដល់ដំណើរការពង្រឹងលិទ្ធិប្រជាធិបតេយ្យ ការគោរពសិទ្ធិមនុស្ស ការការពារធនធានធម្មជាតិ ជាដើម។ ប៉ះពាល់ ក៏ព្រោះតែប្រទេសចិនត្រូវបានគេដឹងថា ជា​ប្រទេសផ្តល់ជំនួយដល់កម្ពុជាច្រើនជាងគេ ពិសេសវិស័យយោធា និងហេដ្ឋារចនាសម្ព័ន្ធ ហើយមិនបានខ្វល់ខ្វាយ ដាក់លក្ខខណ្ឌ ឲ្យមានការអភិវឌ្ឍន៍ត្រឹមត្រូវ ឬមានតម្លាភាព និងជំរុញឲ្យកម្ពុជាមានលិទ្ធិប្រជាធិបតេយ្យនោះទេ៕