ទិញអាយហ្វូន៩៩គ្រឿងដើម្បីសុំអូនរៀបការ តែថ្លៃមិនមេត្តា!
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី១២ វិច្ឆិកា ២០១៤
- កែប្រែចុងក្រោយ: November 13, 2014
- ប្រធានបទ: ខ្លោចចិត្ត
- អត្ថបទ: មានបញ្ហា?
- មតិ-យោបល់
-
នៅក្នុងខេត្ត ហ្គាហ្សូវ (Guangzhou) ភាគខាងត្បូងនៃប្រទេសចិន នៅមិនឆ្ងាយប៉ុន្មានពីក្រុងហុងកុង យុវជនមួយរូបបានចំណាយប្រាក់ ដើម្បីទិញយកទូរស័ព្ទអាយហ្វូន ចំនួន៩៩គ្រឿង ហើយបានយកវាមកតម្រៀបគ្នានៅលើដី មានទម្រង់ជារូបបេះដូង ក្នុងបំណងសុំសង្សារបស់នាយ រៀបការ។ ប៉ុន្តែគោលបំណងនោះ មិនទទួលបានលទ្ធផលជាផ្លែផ្កា ដូចការគ្រោងទុកទេ ដោយសារតែស្រីម្ចាស់ស្នេហ៍ មានទំនោរទៅរកទូរស័ព្ទរបស់សាមស៊ុង (Samsung) ច្រើនជាង អ័បផល (Apple)។ នេះបើតាមការផ្សាយរបស់សារព័ត៌មានចិន នៅថ្ងៃអង្គារ សប្ដាហ៍នេះ។
យុវជនចិន ដែលជាវិស្វករម្នាក់ផងនោះ មិនបានរារែកក្នុងការចំណាយលុយ ច្រើនជាង ៥០០ពាន់យ័ន (៨ម៉ឺនដុល្លារ ឬ៦,៥ម៉ឺនអ៊ឺរ៉ូ) ដើម្បីចូលទៅក្នុងហាងលក់សម្ភារៈរបស់អ័បផល ទិញយកសឹងតែទាំងអស់នូវទូរស័ព្ទ ដែលមាននៅក្នុងស្តុករបស់ហាងនោះ។ ចំនួនទឹកប្រាក់នេះ មានកម្រិតស្មើនឹងប្រាកបៀវត្សរ៍ប្រចាំខែ ធ្វើការរហូត១៧ឆ្នាំ នៃកម្មករចិនមួយរូប។ ហើយតម្លៃទូរស័ព្ទខាងលើ គេនៅមិនទាន់បានរាប់បញ្ចូល ពីផ្កាមួយបាច់ ដែលយុវជនកាន់មកឲ្យនារីម្ចាស់ចិត្តខ្លួននោះផង។
រឿងដែលគួរឲ្យសោកស្ដាយនោះ គឺនារីម្ចាស់ស្នេហ៍បានផ្ដល់ចម្លើយផ្សេង ពីការគ្រោងទុករបស់យុវជនវិស្វករ។ នាងប្រហែលជាមិនរំជួលចិត្ត ទល់នឹងអាយហ្វូនទាំង៩៩គ្រឿង បូករួមនឹងវត្តមាននៃមិត្តភ័ក្រជាច្រើននាក់ របស់យុវជនជាសង្សារបស់នាងនេះទេ។ ជាចម្លើយ«ខ្លោចផ្សារ» និង«អាណោចអាធម» សម្រាប់វិស្វករវ័យក្មេង ព្រោះនាងបាននិយាយថា៖ «យើងនៅជាមិត្តភ័ក្របានហើយ។ យល់ព្រម ឬទេ?»៕
វីដេអូដែលទាក់ទង៖