រងគ្រោះឆូតខ្ទេចមុខ ព្រោះចង់លែងលះពីប្ដី ដែលរៀបការព្រោះរំលោភនាង
- ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស ថ្ងៃទី១២ វិច្ឆិកា ២០១៤
- កែប្រែចុងក្រោយ: November 13, 2014
- ប្រធានបទ: ហិង្សា
- អត្ថបទ: មានបញ្ហា?
- មតិ-យោបល់
-
ហេតុការណ៍នេះ បានធ្វើឲ្យផ្ទុះជារឿងអាស្រូវ និងការជជែកវែកញែកជាថ្មីទៀត នៅប្រទេសម៉ារ៉ុក (ក្នុងទ្វីបអាហ្វ្រិកខាងជើង)។ យុវតីមួយរូបអាយុ១៧ឆ្នាំ ត្រូវបានដឹកទៅសង្គ្រោះ នៅមន្ទីរពេទ្យជាបន្ទាន់ កាលពីចុងសប្ដាហ៍មុន ដោយសារតែនាងបានរងរបួសយ៉ាងដំណំ នៅលើផ្ទៃមុខ នៅលើដៃ និងនៅលើដើមទ្រូងរបស់នាង។ យុវតីរងគ្រោះ ត្រូវបានប្ដីរបស់នាង វាយធ្វើបាប និងប្រើឡាមដើម្បីឆូតទៅលើសាច់របស់នាង។ នេះបើតាមសមាគមការពារសិទ្ធិមនុស្ស នៅក្នុងប្រទេសនេះ ដែលបានធ្វើសេចក្ដីរាយការណ៍មួយ ជុំវិញហេតុការណ៍ដ៏រន្ធត់។
ត្រឡប់ពីជាប់ពន្ធនាគារ៦ខែ មកផ្ទះវិញកាលពីសប្ដាហ៍មុន ហើយកន្លងមកទៀត តែប៉ុន្មានថ្ងៃប៉ុណ្ណោះ បុរសនេះបានប្រព្រឹត្តិទង្វើយ៉ាងឃោឃៅ ទៅលើភរិយាវ័យក្មេងរបស់ខ្លួន បន្ទាប់ពីយុវតីរងគ្រោះ បង្ហាញបំណងរបស់នាង ចង់លែងលះពីខ្លួន។ បន្ទាប់ពីហេតុការណ៍ហិង្សានោះ បុរសនេះបានបោះពាក្យសម្ដីទៅនារីរងគ្រោះថា៖ «ពីពេលនេះទៅ គ្មានអ្នកណាចង់បាននាងឯងទៀតទេ ក្រោយពីអញ»។
ហេតុការណ៍នេះ ត្រូវបានសារព័ត៌មានក្នុងស្រុក សរសេរជាភាសាអារ៉ាប់មួយ យកទៅផ្សព្វផ្សាយ ហើយបង្កឲ្យមានភាពរន្ធត់ញាប់ញ័រ ពាសពេញផ្ទៃប្រទេស។ ញាប់ញ័រខ្លាំង ព្រោះយុវតីវ័យក្មេង បានបង្ខំចិត្តត្រូវរៀបការនឹងជនឃោឃៅ ព្រោះតែជននេះបានចាប់នាងរំលោភ កាលពីឆ្នាំទៅម៉ិញ។ ហើយហេតុការណ៍បែបនេះ មិនមែនជារឿងថ្មីថ្មោងនោះទេ។
ច្បាប់របស់ប្រទសម៉ារ៉ុក (មុនខែមករា ឆ្នាំ២០១៤) បានអនុញ្ញាតឲ្យជនចាប់រំលោភ អាចគេចផុតពីសំណាញ់យុត្តិធម៌ ប្រសិនបើជនព្រានអប្រិយនេះ យកស្ត្រីរងគ្រោះធ្វើជាប្រពន្ធ។ ប៉ុន្តែរហូតមកដល់ខែមករា ឆ្នាំ២០១៤កន្លងទៅនេះ ច្បាប់នេះ ត្រូវបានក្រុមអ្នកតំណាងរាស្ត្រសម្រេចបោះឆ្នោតកែតម្រូវ បន្ទាប់ពីយុវតីម្នាក់ទៀតឈ្មោះ អាមីណា ហ្វីឡាលី (Amina Filali) បានសម្លាប់ខ្លួន ដោយសារតែនាងក៏ត្រូវគេបង្ខំ ឲ្យរៀបការនឹងជនដែលរំលោភនាងនោះដែរ។
រីឯយុវតីដែលទើបនឹងរងគ្រោះ កាលពីចុងសប្ដាហ៍មុននេះ បានរៀបការជាមួយជនកំណាចនោះ នៅមុនច្បាប់នេះត្រូវបានកែប្រែ។ គ្រួសាររបស់នាងនៅពេលនោះ បានជ្រើសរើស«ការអភ័យទោស»ឲ្យជនចាប់រំលោភនេះ បន្ទាប់ពីបុរសបានស្នើសុំរៀបការជាមួយយុវតី ដែលទើបតែមានអាយុ១៦ឆ្នាំ៕