ក្នុងដើមខែវិច្ឆិកា ឆ្នាំ២០១៤នេះ យ៉ាង​ហោច​ណាស់​មនុស្ស​១៥​នាក់ ត្រូវ​បាន​ចាប់​ខ្លួន ក្នុង​នោះ​មាន​ប្រជា​ពលរដ្ឋ​ជា​ស្រ្តី ចំនួន​១០នាក់ ព្រះ​សង្ឃ​ចំនួន​បី​អង្គ និង​សកម្ម​ជន​គណបក្ស​នយោបាយ មក​ពី​គណបក្ស​សង្គ្រោះ​ជាតិ​ចំនួន​ពីរ​នាក់ ផ្សេង​ទៀត។

មតិសាធារណៈជនមួយផ្នែក និង​គណបក្ស​សង្គ្រោះ​ជាតិ បាន​ចាត់​ទុក​ករណី​ចាប់​ខ្លួន​នេះ ថា​ជា​រឿង​«នយោបាយ»។ ក្នុង​សេចក្តី​ថ្លែងការណ៍​ចុុះ​ថ្ងៃ​ទី​១២ ខែ​វិច្ឆិកា របស់​គណបក្ស​សង្គ្រោះ​ជាតិ បាន​សរសេរ​ចោទ​ប្រកាន់​ថា គណបក្ស​ប្រជាជន​កម្ពុជា កំពុង​ប្រើ​ប្រាស់​អំណាច​អាជ្ញាធរ​សាធារណៈ និង​ប្រព័ន្ធ​តុលាការ ដែល​សាធារណៈ​មតិ​ជាតិ និង​អន្តរជាតិ​មើល​ឃើញ​ថា ប្រព័ន្ធ​នេះ​មិន​មាន​លក្ខណៈ​ឯករាជ្យ និង​អព្យាក្រិត្យ​ពេញ​លេញ។

គណបក្សសង្គ្រោះជាតិ បានថ្កោលទោស តម្រូវឲ្យរដ្ឋាភិបាល ដែលដឹកនាំដោយគណបក្សប្រជាជនកម្ពុជា ត្រូវ​តែបញ្ឈប់រាល់សកម្មភាពគម្រាមកំហែង គ្រប់រូបភាពទៅលើប្រជាពលរដ្ឋ ហើយត្រូវដោះលែងសកម្មជនបក្ស​របស់ខ្លួន និង​សកម្មជនដីធ្លីដោយឥតលក្ខខណ្ឌ។ សេចក្តីថ្លែងការណ៍ជាសាធារណៈដដែលនេះ បានសរសេរ​ថា៖ «គណបក្ស​សង្គ្រោះជាតិ មានឆន្ទះក្នុងការដោះស្រាយបញ្ហានយោបាយ ដោយអហិង្សា សន្តិវិធី និងការ​សន្ទនារហូតមានកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤ រវាងគណបក្សសង្គ្រោះជាតិ និងគណបក្ស​ប្រជាជន​កម្ពុជា។ ក្នុងន័យនេះ គណបក្សប្រជាជនកម្ពុជា បានរំលោភលើស្មារតីនៃកិច្ចព្រមព្រៀងនេះ។»

ប៉ុន្តែការចាប់ខ្លួនទាំងអស់ខាងលើ ត្រូវបានគណបក្សប្រជាជនកម្ពុជា ដែលកាន់អំណាចតាំងពីជាង៣០ឆ្នាំ មក​ហើយនោះ ចាត់ទុកថា ជាការអនុវត្តច្បាប់ របស់អាជ្ញាធរមានសមត្ថកិច្ច ក្នុងសំណុំរឿងដែលពាក់ព័ន្ធ នឹងអំពើ​ប្រព្រឹត្តបទល្មើសធ្ងន់ធ្ងរ របស់បុគ្គលទាំងនោះ។ ក្នុងសេចក្តីថ្លែងការណ៍ជាសាធារណៈ ឆ្លើយតបភ្លាមៗ ក្នុងថ្ងៃ​ដដែល ទៅនឹងការចោទរបស់គណបក្សសង្គ្រោះជាតិ គណបក្សប្រជាជនកម្ពុជា បាន«ព្រមាន»​គណបក្ស​​ប្រឆាំង ឲ្យមានការប្រុងប្រយ័ត្ន ក្នុងការធ្វើសេចក្តីថ្លែងការណ៍មួយដែលត្រឹមត្រូវ និងមាន​ផល​ប្រយោជន៍ ដល់​សភាពការណ៍ជាតិ។ ការចាប់ខ្លួនកម្មជនដីធ្លី និងសកម្មជនគណបក្សសង្គ្រោះជាតិនោះ គ្មានអ្វី​ទាក់​ទង​ដល់​កិច្ច​ព្រមព្រៀង របស់គណបក្សទាំងពីរឡើយ។ ហើយគណបក្សប្រជាជនកម្ពុជា នៅតែគោរព​កិច្ច​ព្រមព្រៀងបក្ស​ទាំង​ពីរ ដើម្បីស្ថេរភាព វឌ្ឃនភាព និងភាពសុខដុមរមនា នៃសង្គមជាតិ។

មន្រ្តីជាន់ខ្ពស់គណបក្សប្រជាជនកម្ពុជា លោក ឈាង វុន បដិសេធមិនធ្វើការបកស្រាយ ពីបញ្ហាចាប់​ខ្លួននេះ​ទេ។

ឯលោក យឹម សុវណ្ណ អ្នកនាំពាក្យគណបក្សសង្គ្រោះជាតិវិញ បានអះអាងជាថ្មីទៀតថា ការចាប់ខ្លួន​សកម្មជន​ទាំងដីធ្លី និងគណបក្សសង្គ្រោះជាតិនេះ ជាបញ្ហា នយោបាយ។ លោកថា រឿងកាលពីថ្ងៃទី១៥ ខែកក្កដា នៅ​ស្ពាននាគនោះ ត្រូវបានបញ្ចប់ក្រោមជំនួបថ្ងៃទី២២ ខែកក្កដារួចមកហើយ។ ដូច្នេះការចាប់ខ្លួននេះ ជាការ​រំលោភ​ឆន្ទះ និងបង្កបរិយាកាសអាប់អួក្នុងការអនុវត្តកិច្ចព្រមព្រៀងរវាងគណបក្សទាំងពីរប្រាកដ។

ប៉ុន្តែក្រុមអ្នកឃ្លាំមើលសិទ្ធិមនុស្ស បានបរិហារទង្វើចាប់ខ្លួនដាក់ពន្ធនាគារទាំងនេះ ជាការអនុវត្ត​វិធានការ​ថ្មី​មួយ គេសវេសពីការទទួលខុសត្រូវរបស់អាជ្ញាធរ ខណៈពេលដែលអាជ្ញាធរខ្លួនឯង គ្មានសមត្ថភាព​ដោះ​ស្រាយ​ទុក្ខលំបាក របស់ពលរដ្ឋឲ្យបានពេញលេញ។ បន្ថែមពីលើនេះ មន្ត្រីជាន់​ខ្ពស់អង្គការការពារ​សិទ្ធិ​មនុស្ស​លីកាដូ (Licadho) លោក អំ សំអាត ក៏បានថ្លែងដូចគ្នា​ ចាត់​ទុក​ករណី​ចាប់​ខ្លួន ថាជាការ​ដាក់សម្ពាធ​ផ្នែក​នយោបាយនោះដែរ។

ដោយឡែកអង្គការឃ្លាំងមើលសិទ្ធិមនុស្ស ហៅជាភាសាអង់គ្លេសថា Human Rights Watch បានទទូចនៅ​ថ្ងៃ​សុក្រនេះ ឲ្យម្ចាស់ជំនួយ​របស់កម្ពុជា ដាក់សម្ពាធឲ្យខ្លាំងក្លាលើ​រដ្ឋាភិបាលកម្ពុជា ក្នុងករណីចាប់ខ្លួននេះ។ លោក ប្រ៊េដ អាដាម នាយកទទួលបន្ទុកក្នុងទ្វីបអាស៊ី នៃអង្គការនេះ បានលើក​ឡើងថា​៖ «ការបង្រ្កាបទៅលើ​ការ​​តវ៉ា​​ដោយ​សន្តិវិធីនេះ គឺជាការចំអកឡកឡឺយដល់​ការធ្វើកំណែទម្រង់ ដែលរដ្ឋាភិបាលកម្ពុជា​បាន​សន្យា»៕