ចៅក្រមមួយរូប នៃតុលាការរបស់ប្រទេសអាហ្សង់ទីន បានបញ្ជូនសំនុំរឿង ទៅឲ្យនគរបាលអន្តរជាតិ ដើម្បីចេញដីការ​អន្តរជាតិមួយ តាមចាប់ខ្លួន ជូស្ទីន ប៊ែរប័រ (Justin Bieber) អ្នកចម្រៀងវ័យក្មេងដ៏ល្បី ជាតិកាណាដា ពីបទប្រើហិង្សាលើ អ្នកថតរូបម្នាក់ នៅក្នុងខេត្ត ប៊ូណូសអែរ៉េស (Buenos Aires) នៅពេលដែលតារាចម្រៀង បានចេញសម្ដែងវិលជុំ ច្រើន​ប្រទេស កាលពីឆ្នាំ២០១៣កន្លងមក។ នេះបើតាមប្រភពមួយ ស្និតនឹងប្រព័ន្ធតុលាការ នៃប្រទេសក្នុង ទ្វីបអាមេរិក​ខាង​ត្បូង មួយនេះ។

អ្នកស្រី ម៉ារីយ៉ា សូឡេដាដ នីញ៉េតូ (Maria Soledad Nieto) សហការីរបស់ចៅក្រម អាប៊ែរតូ បាណូស (Alberto Banos) បានថ្លែងឲ្យដឹងថា៖ «យើងស្នើរសុំទៅ នគរបាលអន្តរជាតិ ឲ្យតាមចាប់ខ្លួន ជូស្ទីន ប៊េប៊ើរ នៅគ្រប់ទីកន្លែងទាំងអស់ ក្នុង​ពិភពលោក។ ដូចក្នុងពេលកន្លងមក ជននេះមិនដែលចូលខ្លួន មកតាមការកោះហៅរបស់តុលាការនោះ អញ្ចឹងយើង​មាន​តែស្នើរសុំ ឲ្យតាមចាប់ខ្លួនប៉ុណ្ណោះ។»

អ្នកស្រី បាននិយាយទៀតថា ការស្នើរសុំនេះ បានបញ្ជូនទៅ តាំងពីថ្ងៃពុធ​មុន​ម្លេះ។ តែនៅលើគេហទំព័រ របស់​នគរបាល​អន្តរជាតិវិញ គេនៅមិនទាន់ឃើញតារាចម្រៀងម្នាក់នេះ ត្រូវបានបង្ហាញឈ្មោះ ដាក់ជារូបថត នៅក្នុងបញ្ជីនៃជន ដែល​ត្រូវ​ស្វែងចាប់ខ្លួន នោះនៅឡើយ។

ជាការរំលឹកឡើងវិញ នៅខែវិច្ឆិកា ឆ្នាំ២០១៤ ចៅក្រម ហ្វាកនដូ គូបាស (Facundo Cuba) បានចេញដីកាកោះហៅ តារា​ចម្រៀងវ័យក្មេង និងបានផ្ដល់ពេលវេលា ៦០ថ្ងៃ ដើម្បីឲ្យ ជូស្ទីន ប៊េប៊ើរ ត្រូវមកបង្ហាញខ្លួន នៅក្នុងការិយាល័យរបស់​ចៅក្រម។ ដីកានោះ បានសរសេរព្រមានជាមុនថា បើមិនដូច្នេះទេ តុលាការនឹងចេញដីការ ឲ្យនាំខ្លួន។

ជាងថតរូបជាតិអាហ្សង់ទីនមួយរូប ត្រូវបានតារាចម្រៀង បញ្ជាអង្គរក្សរបស់ខ្លួន ចាប់ដកយក ម៉ាស៊ីនថតរូប និងទូរស័ព្ទ​ដៃ នៅមុខរង្គសាលមួយកន្លែង នៃខេត្ត ប៊ូណសអែរ៉េស។ អង្គរក្សម្នាក់ ពីក្នុងចំណោមអង្គរក្សជាច្រើននាក់ ដែលបានទៅ​តាមការពារតារាចម្រៀង ក៏ត្រូវបានចៅក្រមកោះហៅ ឲ្យចូលខ្លួនដែរ។

បើនិយាយឲ្យវែងឆ្ងាយទៅ តារាចម្រៀង ជូស្ទីន ប៊េប៊ើរ អាយុ២១ឆ្នាំ មិនសូវជាមានឈ្មោះល្អប៉ុន្មានទេ ជាមួយប្រព័ន្ធ​យុត្តិធម៌ ទាំងនៅក្នុងប្រទេសអាហ្សង់ទីន អាមេរិក និងនៅក្នុងប្រទេសកាណាដា ដើមកំណើតខ្លួន។ តារាចម្រៀងនេះ ធ្លាប់ត្រូវបានពលរដ្ឋអាមេរិកមួយចំនួន ស្នើញត្តិមួយទៅប្រធានាធិបតី បារ៉ាក់ អូបាម៉ា ឲ្យដេញអ្នកចម្រៀងនេះ ពីទឹកដី​អាមេរិក កាលពីឆ្នាំទៅម៉ិញនោះ ថែមទៀត៕