«ម៉ែយ៉ែម» ជារហស្សនាមរបស់ស្ត្រីសង្ស័យម្នាក់ ដែលល្បីខាងលួងលោមក្មេងស្រី ទៅលក់ឲ្យភ្ញៀវ។ ស្ត្រី​ដែល​មានឈ្មោះ សុខ ហ៊ឹម ម្នាក់នេះ បានសារភាពឲ្យមន្រ្តីជំនាញ នៃការិយាល័យជួញដូរមនុស្សដឹងថា អ្នកស្រីតែង​តែទទួលបានកម្រៃ ពីការនាំក្មេងស្រី ទៅគេងជាមួយភ្ញៀវ បានសម្រេច ទាំងនោះបាន៥០ភាគរយ ក្នុងម្នាក់ៗ។

បីឆ្នាំ ដើម្បីឈានដល់ការចាប់ខ្លួន

ការិយាល័យជួញដូរមនុស្ស និងអនីតិជន ដែលដឹកនាំដោយលោក សេង ហុង ជានាយរងការិយាល័យ នៃ​ស្នង​ការរាជធានីភ្នំពេញ បានថ្លែងឲ្យដឹងថា តាមចម្លើយរបស់ស្រ្តី«ម៉ែយែម» និងក្មេងស្រីរងគ្រោះពីរនាក់ គឺស្ត្រី​ដែល​មានវ័យជាង ៥០ឆ្នាំរូបនេះ បានរកស៊ីជួញដូរផ្លូវភេទលើស្រ្តី និងកុមារនេះ អស់រយៈពេល៣ឆ្នាំមកហើយ។ រិឯ​ក្មេងស្រីទាំងពីរនាក់ ដែលត្រូវបាននគរបាល ជួយសង្គ្រោះនេះ ម្នាក់ឈ្មោះ ចាន់ ស្រីនាង អាយុ១៧ឆ្នាំ ម្នាក់​ទៀត​ឈ្មោះ កែវ វូចណៃ អាយុ១៩ឆ្នាំ។

ក្រុមនគរបាលបានឲ្យដឹងទៀតថា កងកម្លាំងរបស់ខ្លួនបានសង្ស័យ និងបានតាមដានស្ត្រីរូបនេះ រហូតធ្វើការ​ឃាត់​ខ្លូន កាលពីវេលាម៉ោង ៣និង៣០នាទី រសៀលថ្ងៃទី២២ ខែមិថុនា ឆ្នាំ២០២៥ នៅចំណុចទល់មុខ សណ្ឋាគារ បូរីណាផាលេស តាមបណ្តោយផ្លូវ ១៥៤ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ខណៈ​ដែលស្រ្តីខាងលើ បានបណ្តើរក្មេងស្រីពីរនាក់ ចេញពីបម្រើភ្ញៀវ នៅសណ្ឋាគារខាងលើ។

តាមការបញ្ជាក់ចុងក្រោយ របស់លោក សេង ហុង បានប្រាប់ថា បច្ចុប្បន្នស្ត្រីសង្ស័យ ជាមេខ្យល់រូបនេះ ត្រូវ​បានបញ្ជូនទៅកាន់ ការិយាល័យជួញដូរមនុស្ស និងអនីតិជន នៃស្នងការដ្ឋានរាជធានីភ្នំពេញ ដើម្បីបំពេញ​ឯកសារបញ្ជូនទៅកាន់តុលា និងធ្វើការស៊ើបបន្តរក អ្នកដែលជាដៃជើងរបស់ស្រ្តីខាងលើ ដែលតែងនាំក្មេង​ស្រី មកឲ្យស្រ្តីរូបនេះ អស់រយៈ៣ឆ្នាំមកហើយនេះ៕