សពទារកម្នាក់ ខ្ចប់ក្រដាសទុកចោលនៅក្នុងបង្គន់យន្ដហោះ
សាកសពរបស់ទារកដ៏តូចម្នាក់ ត្រូវបានរកឃើញ ខ្ចប់នៅក្នុងកញ្ចប់ក្រដាស់អនាម័យ នៅក្នុងបន្ទប់បង្គន់របស់យន្ដហោះ នៃក្រុមហ៊ុនអាកាសចរណ៍ «Qatar Airways» ដែលបានមកចុះចត នៅព្រលានយន្ដហោះអន្តរជាតិ «Soekarno-Hatta» ក្បែររដ្ឋធានីចាការតា ប្រទេសឥណ្ឌូនេស៊ី កាលពីយប់ថ្ងៃអាទិត្យ។ ការរកឃើញដ៏អាណោចអាធមនេះ បានផ្ទុះឡើង បន្ទាប់ពីបុគ្គលិក ខាងបោសសំអាតយន្ដហោះ បានចូលទៅលាងជូតបង្គន់ របស់យន្ដហោះខាងលើ ដែលបានហោះចេញ ពីរាជធានី ដូហា (Doha) នៃប្រទេសកាតា (ក្នុងតំបន់ឈូងសមុទ្រពែរ្យ៍)។
អ្នកនាំពាក្យរបស់ព្រលានយន្ដហោះ លោក «Endang Sutrisna» បានថ្លែងប្រាប់ទីភ្នាក់ងារព័ត៌មានបារាំង «AFP» ថា ទារករូបនោះ មានអាយុប្រមាណជា ៥ទៅ៧ខែ ហើយត្រូវបានខ្ចប់ ដោយក្រដាសអនាម័យ និងទុកចោល នៅក្នុងបន្ទប់បង្គន់។
នៅក្នុងជើងហោះហើរនេះដដែល ស្ត្រីអ្នកដំណើរម្នាក់ ដែលជាពលករជាតិឥណ្ឌូនេស៊ី (ចេញទៅធ្វើការនៅក្រៅប្រទេស) ត្រូវបានអាជ្ញាធរ ចាប់បង្ខំឲ្យត្រួតពិនិត្យសុខភាព មុននឹងត្រូវបញ្ជូនឲ្យទៅពិនិត្យបន្ថែម នៅឯមន្ទីរពេទ្យ ដោយមានភ្នាក់ងារនគរបាល អមទៅជាមួយផង។ អាជ្ញាធរឥណ្ឌូនេស៊ី មិនបានបញ្ជាក់ថា ស្ត្រីរូបនេះមានអ្វីទាក់ទង ជាមួយសាកសពទារក ដែលត្រូវបានរកឃើញ នៅក្នុងបង្គន់យន្ដហោះ ឬយ៉ាងណាទេ។
អ្នកនាំពាក្យដដែល គ្រាន់តែបានពន្យល់ថា៖ «ប្រសិនជាលទ្ធផល នៃការត្រួតពិនិត្យ បង្ហាញថាគាត់ (ស្ត្រីអ្នកដំណើរ) មានចំណុចគួរឲ្យសង្ស័យនោះ គាត់នឹងត្រូវបញ្ជូន ទៅឲ្យនគរបាលព្រលានយន្ដហោះ ដើម្បីឲ្យអ្នកស៊ើបអង្កេត ធ្វើការសាកសួរ និងស្វែងរកហេតុផល នៃទង្វើរបស់គាត់»។
ប្រទេសមួយចំនួន នៅក្នុងតំបន់មជ្ឈឹមបូព៌ា ដូចជាប្រទេសកាតា អារ៉ាប៊ីសាអូឌីត និងប្រទេសបារ៉ែនជាដើម គឺជាទិសដៅដ៏សំខាន់ សម្រាប់ពលករឥណ្ឌូនេស៊ី ក្នុងការចេញទៅរកការងារធ្វើ។ ស្ត្រីឥណ្ឌូនេស៊ីជាច្រើន បានចាកចេញ ទៅធ្វើការងារបោសជូត ដាំស្ល ឬថែរក្សាកុមារ ដើម្បីរកប្រាកផ្ញើរត្រឡប់មកគ្រួសារ នៅក្នុងប្រទេសរបស់ខ្លួនវិញ៕