ជារឿយៗ គេតែងសង្កេតឃើញ មានករណីប្លន់ ទើបឈានដល់បង្ករបួសស្នាម។ តែករណីលើកនេះ ជនល្មើសបានបង្ករបួស​ស្នាម​រួច បាន​រត់គេចខ្លួន ដោយមិនយកទ្រព្យសម្បត្តិ ពីជនរងគ្រោះទៅវិញ។

ករណីនេះ បានកើតទៅលើគូស្នេហ៍ពីរនាក់ ដែលត្រូវបានជនមិស្គាល់មុខកាប់ ជាច្រើនដាវ ទៅលើភាគីខាងប្រុស ខណៈ​ដែល​ខ្លូន កំពុងជិះ​ម៉ូតូឌុបសង្សា ចេញពីម្ដុំគិរីរម្យ ឆ្ពោះទៅម្ដុំសន្ធរមុខ តាមបណ្តោយផ្លូវ ព្រះសីហនុរាជ កែងផ្លូវលេខ១៥០ ជិតផ្សារ​ដេប៉ូ។ បើតាមអ្នកឃើញ​ហេតុការណ៍នេះ បានឲ្យដឹងថា ជនរងគ្រោះ ត្រូវបានជនមិនស្គាល់មុខពីរនាក់ ជិះម៉ូតូតាម រួចធ្វើ​សកម្មភាព​​កាប់​ពី​ក្រោយ នឹងដាវ «សាម៉ូរ៉ៃ» ជាច្រើនដាវ កាលពីវេលាម៉ោង៨ និង១០ នាទីយប់ថ្ងៃទី០១ ខែមិថុនា ឆ្នាំ២០១៥​នេះ ស្ថិតក្នុងខណ្ឌ​ទួលគោក រាជធានីភ្នំពេញ។

តាមកោសល្យវិច័យ របស់នគរបាល បានឲ្យដឹងថា ជនរងគ្រោះឈ្មោះ លី ហៀង អាយុ១៧ឆ្នាំ ជាសិស្សនៅវិទ្យាល័យ ហ៊ុនសែន​ភ្នំពេញ​ថ្មី ត្រូវ​របួស ក្បាល៣កាំបិត ក មួយកាំបិត និងស្មារមួយកាំបិតសរុប៥០ថ្នេរ តែមិត្តស្រីរបស់គេឈ្មោះ សុំ យាណា មិន​មាន​របួស​នោះ​ទេ។ ភ្លាមៗ បន្ទាប់ពីមានហេតុការណ៍នេះ អ្នកទាំងពីត្រូវបានបញ្ជូន ទៅកាន់មន្ទីរពេទ្យឯកជនមួយ នៅក្បែរ​នោះ​ដើម្បី​សង្គ្រោះ។ មន្ត្រីនគរបាល​មួយ​រូប បាន​និយាយថា ជនរងគ្រោះ ជិះម៉ូតូម៉ាក អាយខនពណ៍ខៀវ ស្លាកលេខភ្នំពេញ ១DN-៣៤៧៧ ជិះគ្នាពីរនាក់។

ចំណែកឯម៉ូតូជនដៃដល់ ត្រូវបានគេស្គាល់ថា ជាម៉ូតូធំម៉ាកឌុក មិនស្គាល់ស្លាកលេខ មានគ្នាពីរនាក់ បានជិះតាមពីក្រោយ​ជន​រង​គ្រោះ រហូត​មកដល់កន្លែងកើតហេតុ ក៏បានលោតចុះ នាំគ្នាវាយកាប់រហូតបានសម្រេច ទើបរត់ជិះគេចខ្លួន បាត់​ស្រមោល។ បន្ទាប់​ពីបញ្ជូន​ជន​រងគ្រោះ ទៅកាន់មន្ទីរពេទ្យ និងបានជួបជាមួយសាច់ញាតិ បានឲ្យដឹងថា កូនរបស់ខ្លួនមិន​ដែល​មាន​បញ្ហា ជាមួយ​អ្នកណា​ទេ ពីមុនមក។ ក្រុមគ្រួសារ​ជនរងគ្រោះ បានបង្ហើបថា សង្ស័យបណ្តាល មកពីបញ្ហាស្នេហ៍ត្រីកោណ ព្រោះ​ជន​ដៃ​ដល់ ជិះ​មក​ដល់​ភ្លាម បង្ករបួសទាំងកំរោល គ្មានចង់​បាន​របស់​អ្វីផ្សេងនោះទេ៕