នៅព្រះរាជាណាចក្រ អច្ឆៈរិយៈ បើចេញទៅណាមកណា នាក្បាលព្រលប់ ឬយប់តែម្នាក់ឯង គេច្បាស់ជាគិតថា ខ្លាចមានគ្រោះថ្នាក់ ដោយការលួចឆក់ ឬការប្លន់ជាដើម។ អញ្ចឹង គួរនាំបងប្អូន ឬមានគ្នីគ្នាទៅជាមួយ គ្រាន់បាន​ពីរនាក់ ឬច្រើននាក់ មិនសូវខ្លាច និងអាចមានសុវត្ថិភាពជាង។ តែពេលនេះ បើសូម្បីមានគ្នា ពីរនាក់បងប្អួន​ហើយ​ក៏ដោយ ក៏លោកចោរនៅតែហ៊ាន តាមប្លន់ទាំងស្រស់ សម្រេចយកបានម៉ូតូមួយគ្រឿង យកទៅជិះចេញទៅ ដោយ​សុវត្តិភាព។

នារីរងគ្រោះទាំងពីនាក់បងប្អូន បាននាំគ្នាកមដាក់ពាក្យប្តឹង នៅក្នុងប៉ុស្តិ៍នគរបាលរដ្ឋបាល ស្ទឹងមានជ័យ ក្នុងនោះ កញ្ញា អ៊ឹម ចរណៃ ជាបងស្រីអាយុ២០ឆ្នាំ ជាអ្នកបើកម៉ូតូម៉ាក ស៊ុយសាគីនិច ស្លាកលេខភ្នំពេញ ១CW-៣០៦៧ បានរៀបរាប់ថា នៅមុនពេលកើតហេតុកញ្ញា ពីរនាក់ប្អួន ស្រី អ៊ឹម អប្បរា អាយុ១៥ឆ្នាំ បានជិះម៉ូតូ នៅលើផ្លូវសឡា ឡើងទៅផ្លូវលូប្រាំ ស្រាប់តែមកដល់កន្លែងកើតហេតុ អ្នកទាំងពីរ បានឃើញម៉ូតូឌ្រីមមួយគ្រឿងទៀត មិន​ស្គាល់​ស្លាកលេខ បានបើកពីកក្រោយ មកជិត ដកកាំភ្លើងភ្ជង់នាង ឲ្យប្រគល់កូនសោរ និងម៉ូតូឲ្យវា ហើយគម្រាមសម្លាប់​អ្នកទាំងពីរ។

នារីរងគ្រោះបានបន្តទៀតថា ហេតុការណ៍នេះ បានកើតឡើង កាលពីវេលាម៉ោង៨យប់ ថ្ងៃទី០២ ខែមិថុនា ឆ្នាំ​២០១៥ ពេលដែលនាងចេញ ពីសាលារៀនជាមួយប្អូបស្រី ទៅផ្ទះនៅក្នុងភូមិឬស្សី សង្កាត់ស្ទឹងមានជ័យ ខណ្ឌ​មានជ័យ រាជធានីភ្នំពេញ។ អ្នកទាំងពីរបានបញ្ជាក់ថា ដំបូងមិនហ៊ានស្រែកហៅ ឲ្យអ្នកណាជួយទេ ព្រោះ​ចោរ​នោះ​គម្រាម សម្លាប់អ្នកទាំងពីរបើនៅតែស្រែក។ ម្យ៉ាងទៀត បើទោះជានាងស្រែក ក៏គ្មានអ្នកណាជួយទាន់​ដែរ ព្រោះយប់ងងឹត មិនសូវមានមនុស្សដើរច្រើន។

បន្ទាប់ពីទទួលបានពាក្យបណ្តឹងនេះ ក្រុមសមត្ថកិច្ចនគរបាលស្ទឹងមានជ័យ បានធ្វើការ ចាត់ចែងបញ្ជូនសុំនុំ​រឿង ទៅអធិការដ្ឋាននគរបាលខណ្ឌមានជ័យ ដើម្បីធ្វើការស៊ើបអង្កេត វែកមុខក្រុមចោរទាំងពីរ មកដាក់ទោសតាម​ច្បាប់៕