នាព្រឹកថ្ងៃទី៣ ខែឧសភានេះ ជាថ្ងៃដំបូងក្នុងការផ្តើមប្រកាស ស្វែងរកក្រុមហ៊ុន មានសិទ្ធិទទួលបាន នូវការធ្វើ​អាជីវកម្មរ៉ែខ្សាច់ ចំនួន«៤ឡូតិ៍» ក្នុងតំបន់ដោយឡែកៗពីគ្នា។ ការរប្រកាសជាសាធារណៈ ដើម្បីជ្រើស​រើស​ក្រុមហ៊ុន ធ្វើអាជីវកម្មបូមខ្សាច់ រដ្ឋលេខាធិការក្រសួងរ៉ែ និងថាមពល លោក ហូ វិចិត្រ បានលើកឡើងថា ការ​ដាក់​ឲ្យមានការដេញថ្លៃនេះ ក្នុងគោលបំណងស្តារផ្លូវនាវាចរណ៍ តាមដងទន្លសមេគង្គ ស្ថិតក្នុងតំបន់ប្រវ៉ាយស្តៅ តាឯក ស្រុកកងមាស ខេត្តកំពង់ចាម និង ក្នុងស្រុកមុខកំពូល ស្រុកខ្សាច់កណ្តាល ខេត្តកណ្តាល។

លោករដ្ឋលេខាធិការ បានរៀបរាប់ថា ការប្រកាសដាក់ឲ្យដេញថ្លៃនេះ ត្រូវបានធ្វើឡើង តាំងពីថ្ងៃទី ថ្ងៃទី២២ ខែ​មេសា ឆ្នាំ២០១៥ រហូតមកដល់ថ្ងៃទី៣ ខែឧសភា ឆ្នាំ២០១៥នេះ។ លោកថា ក្នុងរយៈពេលនេះ ឃើញមាន​ក្រុមហ៊ុន​ប្រមាណ៤០ ក្រុមហ៊ុន ដែលបាន«ទិញឯកសារដេញ»ថ្លៃ ចំនួន៦២ច្បាប់ សម្រាប់រ៉ែខ្សាច់ ទាំង៤ឡួតិ៍ ក្នុង​នោះ​ឡូតិ៍លេខ១ មានក្រុមហ៊ុនចំនួន២០ (ដែលបានទិញឯកសារដេញថ្លៃ) ឡូតិ៍លេខ២ មាន​ក្រុមហ៊ុនចំនួន​១៩ ឡូតិ៍លេខ៣ មានក្រុមហ៊ុនចំនួន១២ និងឡូតិ៍លេខ៤ មានក្រុមហ៊ុនចំនួន១១។

លោក ហូ វិចិត្រ បានបន្តថា ក្រោយការបញ្ចប់ការអនុញ្ញាត ឲ្យដាក់ពាក្យដេញថ្លៃនេះ គិតមកត្រឹមថ្ងៃទី៣ ខែ​ឧសភា​នេះ មានក្រុមហ៊ុនត្រឹមតែ៣០ប៉ុណ្ណោះ ដែលបានដាក់សំណើដេញថ្លៃជាផ្លូវការ។ ក្នុងនោះ​សម្រាប់​ឡូតិ៍​លេខ១ មានក្រ៊ុមហ៊ុនចំនួន៩ ឡូតិ៍លេខ២ មានក្រ៊ុមហ៊ុនចំនួន៨ ឡូតិ៍លេខ៣ មានក្រ៊ុមហ៊ុនចំនួន៧ និងឡូតិ៍​លេខ៤ មានក្រ៊ុមហ៊ុនចំនួន៦។

មានការចូលរួម ពីមន្ត្រីប្រឆាំងអំពើពុករលួយ

លោកបានបញ្ជាក់ថា នេះជាដំណាក់កាលដំបូង នៃការដេញថ្លៃ ហើយក្រសួងនឹងធ្វើការត្រួតពិនិត្យ លើក្រុមហ៊ុន​ទាំងអស់ ដែលបានចូលរួមដេញថ្លៃនេះ នូវសមត្ថភាព បច្ចេកទេស ហិរញ្ញវត្ថុ រួមទាំងអត្ថប្រយោជន៍​បន្ថែមផ្សេង​ទៀត។ លោកបន្តថា ក្រោមការត្រួតពិនិត្យនូវកិច្ចការទាំងនេះ ក្រុមហ៊ុនដែលទទួលបានពិន្ទុខ្ពស់ជាងគេ ក្រោយ​ពីការ​វាយ​តម្លៃនោះ និងប្រកាសថា បាន«ឈ្នះ»ក្នុងការដេញថ្លៃ។

លោកបានបង្ហាញថា ការដេញថ្លៃលើអាជីវកម្មរ៉ែខ្សាច់នេះ ត្រូវបានធ្វើឡើងដោយម៉ត់ចត់ ក្រោមការរៀបចំឡើង​ដោយក្រសួងរ៉ែ និងថាមពល ព្រមទាំងមានការចូលរួម ពីសំណាក់មន្រ្តីប្រឆាំង អំពើពុករលួយ ប្រចាំក្រសួង​នេះ​ផង។ លោកថា ក្រោមការរៀបចំនេះ អាចធ្វើឲ្យដំណើរការ នៃការដេញថ្លៃនេះ ប្រកបដោយភាពម៉ត់ចត់ ត្រឹមត្រូវ តម្លាភាព និងយុត្តិធម៌។ ឯការប្រកាស ស្វែងរកអ្នក«ឈ្នះ» ក្នុងការដេញថ្លៃនេះ អាចនឹងធ្វើ នាពេលឆាប់ៗ​ខាង​មុខ តាមការដែលអាចធ្វើទៅបាន៕