អាជីវករជនជាតិវៀតណាមបីនាក់ បានតម្លើងសសៃរករ ដាក់អាជ្ញាធរផ្សារ នាគមាស កណ្ដាលរាជធានីភ្នំពេញ ដែលបានចុះធ្វើសណ្តាប់ធ្នាប់ផ្សារ កាលពីថ្ងៃទី៩ ខែមិថុនាម្សិលម៉ិញនេះ ដែលចង់ស្នើ មន្ត្រីអាជ្ញាធរទាំងនោះ ដោះស្រាយបញ្ហារុះរើតូប ទាំងអស់គ្នា ដោយគ្មានការរើសអើង។

អាជីវករជនជាតិវៀតណាមនោះ បានប្រាប់ទស្សនាវដ្តីមនោរម្យ.អាំងហ្វូថា លោកនិងគ្រួសារ មិនប្រឆាំងនឹង​ការ​រៀបចំផ្សារ របស់អាជ្ញាធរនោះឡើយ។ និយាយជាភាសារខ្មែរ ប៉ៃឡាំៗ ជនជាតិវៀតណាម ឈ្មោះ វណ្ណ បាន​បញ្ជាក់​ប្រាប់ ទៅអាជ្ញាធរវិញថា ថ្វីត្បិតតែគេ ជាជនជាតិវៀតណាម ក៏ពិតមែន តែជាកូនកាត់ និងបាន​រស់នៅ​លើ​ទឹកដីខ្មែរនេះ ជាយូឆ្នាំមកហើយ ព្រមទាំងមានឯកសារបញ្ជាក់គ្រប់គ្រាន់ ដូលពលរដ្ឋខ្មែរដទៃ​ទៀត​ដែរ។

លោក វណ្ណ បានបន្តថា មិនត្រឹមតែប៉ុណ្ណោះ លោកបានចូលរួមបោះឆ្នោត ដូចជនជាតិខ្មែរដែរ ដោយ​លោក​មាន ទាំងអត្តសញ្ញាណប័ណ្ឌ មានទាំងសៀវភៅគ្រួសារ មានទាំងប័ណ្ណបោះឆ្នោត ដែលចេញដោយអាជ្ញាធរ​កម្ពុជា នោះ​ផង​ទៀត។

អាជីវករជនជាតិវៀតណាម ដែលមានមុខរបរ ជាអ្នកលក់ការហ្វេ កត់ឆ្នោត និងកន្ទុយលេខ នៅផ្សារនាគមាស បានបញ្ជាក់នៅចំពោះមុខ អាជ្ញាធរខណ្ឌទួលគោក យ៉ាងដូច្នេះថា៖ «ខ្ញុំជនជាតិវៀតណាមក៏ដោយ ខ្ញុំរស់នៅ​ទឹកដី​ខ្មែរ ខ្ញុំមិនតវ៉ាទេ ដេញក៏ដេញចុះ។ (…) ឯកសារខ្ញុំ មានគ្រប់គ្រាន់ទាំងអស់ ខ្ញុំមានមួយកំផ្លេរតែម្តង។ (…) បើរើ រើឲ្យអស់ណា (ទាំងតូបអាជីវករ ដែលជាជនជាតិខ្មែរ) រើមួយអត់មួយម៉េចបាន យើងរើៗឲ្យអស់ហ្មង រើ​មួយ ចាំ​កន្លែង​មួយទៀត នៅម៉េចបាន។ រើខាងយើងមួយ ខាងហ្នឹងនៅ វាពិបាកណាស់ណា?។ (…) បើគេ (អាជីវករ​ខ្មែរ) មិនរុះ ខ្ញុំក៏មិនរុះដែរ។ បើគេរុះ ខ្ញុំរុះតាមគេ ខ្ញុំមិនចេះច្បាប់ទេ តេបើគេរុះ ខ្ញុំរុះតាមគេ។ ខ្ញុំមិនមែនចោរប្លន់ទេ ខ្ញុំលក់ដូរ។»

យ៉ាងណាក៏ដោយ អាជីវករវៀតណាមរូបនេះ បានសន្យាជាចុងក្រោយថា នឹងរុះរើតូបរបស់ខ្លួន តែសុំពេល​៤ថ្ងៃ​ទៀត ដើម្បីរុះរើ។ ប៉ុន្តែ ល័ក្ខខ័ណ្ឌក្នុងការរុះរើនេះ អាចធ្វើទៅបាន ទាល់តែអាជីវករខ្មែរទាំងអស់រុះរើ ជា​មុន​សិន។ ករណីនៃការតវ៉ា និងដាក់បន្ទុក មកលើជនជាតិខ្មែរ ដែលជាម្ចាស់ស្រុកនេះ ត្រូវបានលោក ប៉ាង លីដា អភិបាល​រងខណ្ឌទួលគោក បញ្ជាក់ប្រាប់ទស្សនាវដ្តីមនោរម្យ.អាំងហ្វូថា កម្ពុជាមានច្បាប់ទម្លាប់ និងត្រូវតែអនុវត្តន៍​ទាំង​អស់​គ្នា។ លោកអភិបាលរង បានថ្លែងឡើងថា ជនបរទេសណាក៏ដោយ ទោះមានឯកសារត្រឹមត្រូវក៏ដោយ ត្រូវ​តែ​គោរពច្បាប់នៃប្រទេសនោះ។ លោកបានបញ្ជាក់យ៉ាងខ្លីដូច្នេះថា «កុំទៅយកអត្តសញ្ញាណប័ណ្ដ ជារឿង​សំខាន់ ពិសេស តើមនុស្សនោះល្មើសច្បាប់ឬអត់?»។

» សម្ភាសអាជីវករវៀតណាម តវ៉ានឹងអាជ្ញាធរ រឿងធ្វើសណ្តាប់ធ្នាប់ នៅផ្សារនាគមាស៖