អភិបាលរងខណ្ឌទួលគោក លោក ប៉ាង លីដា បានលើកឡើង ដូចជាដេញជើង អ្នកក្រោមបង្គាប់ថា មិនមាន​អ្វី​រីកចម្រើនប៉ុន្មានសោះ ព្រោះភាពរញេរញ៉ៃ នៃការលក់ដូរ របស់អាជីវករក្នុងផ្សារដើមគ នៅតែមាន។ ការអះអាង​របស់លោក បានធ្វើឡើង នៅក្នុងអង្គប្រជុំ ជាមួយមន្ត្រីរៀបចំសណ្ដាប់ធ្នាប់ ជុំវិញផ្សារដើមគ និងបន្ទាប់ពីលោក បានចុះទៅជួបផ្ទាល់ ជាមួយអាជីវករផ្សារ ដើម្បីព្យាយាមដឹងពីបញ្ហានៅទីនោះ។ ទស្សនាវដ្ដី​មនោរម្យ.អាំងហ្វូ បាន​ចុះយកការណ៍នៅពេលនោះ បានធ្វើសេចក្ដីរាយការណ៍នេះ ដូចខាងក្រោម។

នៅចំពោះអ្នកស្រី ផល្លា អ្នកលក់ដូរម្នាក់ នៅជាប់ផ្លូវ៣៣៦ ក្នុងផ្សារនេះ លោក ប៉ាង លីដា បាននិយាយថា សូម​ឲ្យអ្នកស្រី មេត្តាលក់ថយ ទៅក្រោយបន្តិច ដើម្បីបានស្រឡះផ្លូវធំ ងាយស្រួលមនុស្សចេញចូល ក្នុងការដើរ​ទិញ​ឥវ៉ាន់ផ្សារនេះ។

ប៉ុន្តែអ្នកស្រី ផល្លា ដែលមានឥវ៉ាន់ លយចេញមកខាងផ្លូវ បានយល់ព្រមជាមួយលោក ប៉ាង លីដា ថារើចេញ​ទៅក្រោយបន្តិចមែន ដើម្បីឲ្យមានផ្លូវដើរ។ ប៉ុន្តែអ្នកស្រី បានរៀបរាប់ថា បើឲ្យរើជាងនេះ អ្នកស្រីមិនចេញទេ ទោះអ្នកមកប្រាប់នោះ ប្រើអពើហឹង្សាដាក់គាត់ក៏ដោយ។ គាត់នឹងនៅតែបន្តលក់ទៀត ដោយហេតុថា អ្នកនៅ​លក់ម្តុំគាត់ គ្មានអ្នកណារើថយក្រោយដែរ។ អ្នកស្រីបានថ្លែង ទាំងដៃសំពីងសំពោងថា បើឲ្យថយក្រោយ ដើម្បី​សណ្តាប់ធ្នាប់ផ្សារ គួរតែឲ្យថយទាំងអស់គ្នា ព្រោះកន្លែងដែលលក់នេះ គាត់បានជួលពីប្រធានផ្សារ ២០០ដុល្លា ក្នុងមួយខែ បើលក់មិនបានច្រើន គាត់ច្បាស់ជាខាត គ្មានលុយឲ្យថ្លៃតូប ឬកន្លែងមិនខាន។

មន្រ្តីដឹកនាំខណ្ឌ ដែលបានចុះធ្វើអន្តរាគមន៍ បាននិយាយបន្ត ជាមួយអ្នកលក់នោះថា យើងគ្រប់គ្នា ត្រូវជួយ​គ្នា​ម្នាក់បន្តិច នោះអ្វីៗនឹងប្រសើរ។ លោកបានបញ្ជាក់ប្រាប់ អ្នកលក់រូបនេះថា លោកនឹងធ្វើការពង្រឹង សារជាថ្មី និង​សុំឲ្យមាន ការសហការចូលរួមពីអាជីវករ ពីប្រធានផ្សារ និងពីអ្នកគ្រប់គ្រងកម្លាំងចម្រុះ ដែលមើលកាខុសត្រួវ នៅក្នុងខណ្ឌនេះទាំងមូលឡើងវិញ កុំឲ្យមានការធ្វេសប្រហែសទៀត។

បន្ទាប់ពីជំនួប ជាមួយអាជីវករហើយនេះ លោក ប៉ាង លីដា ក៏បានកោះប្រជុំ នៅក្នុងទីស្នាក់ការផ្សារដើមគ ជា​បន្ទាន់ ជាមួយនឹងអ្នកនៅថ្នាក់ក្រោមទាំងអស់ ដើម្បីពួកគាត់ទាំងនោះ បរិយាយពីអ្វី ដែលជាបញ្ហាមិនអាច​ធ្វើ​ទៅ​បាន ជាពិសេសគឺការធូរលុង បណ្តាលមកពីមូហេតុអ្វី។ ចប់ការប្រជុំនេះ មន្ត្រីសន្តិសុខសណ្ដាប់ធ្នាប់ខ្លះ បាន​សន្យាជាមួយ ប្រធានផ្សារ និងអភិបាលរងខណ្ឌថា នឹងរឹតបណ្តឹងឲ្យបានខ្ជាប់ខ្ជូន ជាមួយអ្នកដែលលក់ដូរ គ្មាន​ទីតាំងច្បាស់លាស់ លក់ចល័ត... ផ្សេងៗ។ តែអាជីវករខ្លះ បានលើកឡើងថា ចាំមើលថា តើការរឹតបណ្តឹងនោះ នឹងត្រូវរលាវិញ នៅពេលណា និងយ៉ាងដូចម្ដេច បើធ្លាប់និយាយច្រើនដងមកហើយ នៅតែគ្មាន​ប្រសិទ្ធភាព​នោះ៕