តំណាង​រាស្ត្រ​ឱ្យ​អ្នក​តវ៉ា​នឹង​ការ​ចាប់​ខ្លួន ធ្វើ​តាម​និតិវិធី​តុលាការ

បន្ទាប់ពីប្រជាពលរដ្ឋ ជាច្រើនបានតវ៉ានៅមុខរដ្ឋសភាជាតិនៅថ្ងៃទី១៤ ខែវិច្ឆិកានេះ តំណាងរាស្រ្តមកពីគណបក្សប្រជាជន និងជាសមាជិកគណៈកម្មាការទី១នៃរដ្ឋសភា លោកស្រី ឡោ ខេង បានអំពាវនាវទៅកាន់អ្នកតវ៉ាថា សូម​ឱ្យ​ប្រជា​ពលរដ្ឋ​ទាំង​អស់ គោរពទៅតាមនិតិវិធីរបស់តុលាការ ហើយរដ្ឋសភា និងធ្វើការសម្រុះសម្រួលតាមក្រោយ។
Loading...
  • ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី១៤ វិច្ឆិកា ២០១៤
  • កែប្រែចុងក្រោយ: November 15, 2014
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ខណៈពេលដែលស្រ្តី៧នាក់ ដែល​តវ៉ា​សុំ​ឱ្យ​អាជ្ញាធរ​ជួយ​ដោះ​ស្រាយ បញ្ហា​ទឹក​លិច​ផ្ទះ រួម​ទាំង​ព្រះ​សង្ឃ សកម្មជន​ដីធ្លី និង​គណបក្ស​ប្រឆាំង​មួយ​ចំនួន​ទៀត ត្រូវ​បាន​ចាប់​ខ្លួន​ជា​បន្ត​បន្ទាប់ ក្រុម​អ្នក​តវ៉ា ជា​ពិសេស​អ្នក​រង​គ្រោះ​ពី​ជម្លោះ​ដី​ធ្លី​បាន ចេញ​តវ៉ា​ជា​បន្ត​បន្ទាប់។ នៅ​ថ្ងៃ​ទី១៤ ខែ​វិច្ឆិកា​នេះ ក្រុម​អ្នក​តវ៉ា​ច្រើន​រយ​នាក់ បាន​ប្រមូល​ផ្តុំ​គ្នា​នៅ​មុខ​រដ្ឋសភា ដើម្បី​ដាក់​ញត្តិ ឱ្យ​រដ្ឋ​សភា​ជួយ​ដោះ​ស្រាយ និង​ដោះ​លែង​អ្នក​ដែល​ត្រូវ​បាន​ចាប់​ខ្លួន​ទាំង​នោះ។

ថ្លែងទៅកាន់អ្នកតវ៉ាទាំងនោះ ដែល​មក​ដាក់​ញត្តិ​នៅ​មុខ​រដ្ឋ​សភា​ជាតិ នៅ​ថ្ងៃ​ទី១៤ ខែ​វិច្ឆិកា​នេះ លោក​ស្រី ឡោ ខេង សមាជិក​នៃ​គណៈកម្មាការ​ទី១​នៃ​រដ្ឋសភា និង​ជា​តំណាង​រាស្ត្រ មក​ពី​គណបក្ស​ប្រជាជន​កម្ពុជា បាន​ថ្លែង​ឡើង​ថា លោក​ស្រី​ចង់​ឱ្យ​ប្រជា​ពលរដ្ឋ​ស្ងប់​ចិត្ត​សិន ហើយ​ទុក​ពេល​ឱ្យ​គណៈកម្មាការ​ទី១​នៃ​រដ្ឋសភា ធ្វើការ​ទៅ​លើ​រឿង​នេះ។

«តុលាការលោក"នេះ"ហើយ»

លោកស្រីបន្តថា៖ «ទោះបីជាព្រះសង្ឃក៏ដោយ ប្រជាពលរដ្ឋក៏ដោយ ប្រសិនបើតុលាការលោក"នេះ"ហើយ យើងត្រូវធ្វើតាមនិតិវិធីរបស់តុលាការសិន ឥលូវយើងអាចប្តឹងទៅសាលាឧទ្ធរណ៍សិន ហើយរដ្ឋសភា​នឹង​ធ្វើ​តាមនិតិវិធីរបស់រដ្ឋសភា ដើម្បីជួយសម្រុះសម្រួលបងប្អូន»។

រីឯបញ្ហារបស់ប្រជាសហគមន៍បឹងកក់ ដែលកំពុងជួបបញ្ហាលិចទឹក ដោយលូទឹកទឹកស្អុយវិញ ត្រូវបាន​តំណាង​រាស្រ្តរូបនេះបញ្ជាក់ថា រដ្ឋសភាបានប្រជុំសម្រេចរួចរាល់ហើយថា ថ្ងៃណាដែលរដ្ឋសភា នឹងហៅអភិបាល​រាជធានី​ភ្នំពេញ តាមរយៈលោក ស ខេង ដើម្បីប្រមូលបញ្ហាដែលបានកើតឡើង នៅទីក្រុងភ្នំពេញទាំងអស់ យកមកពិភាក្សាគ្នា ដោះស្រាយបញ្ហាឱ្យប្រជាពលរដ្ឋ។

លោក ចាន់ ពុទ្ធិស័ក្ក សកម្មជនដីធ្លីនៅតំបន់បឹងកក់ និងជាអតីតអ្នកជាប់ពន្ធនាគាររឿងទាមទារប្រាក់ខែកម្មករ បានលើកឡើង វាជារឿងមួយដែលមិនសមហេតុផលឡើយ ខណៈដែលប្រជាពលរដ្ឋមកតវ៉ា ឱ្យដោះស្រាយ​បញ្ហាទឹកលិច ប៉ុន្តែបែរជាត្រូវបានអាជ្ញាធរចាប់ខ្លួនទៅវិញ។ លោកបានអះអាងទៀតថា នេះជាការទទួល​ខុស​ត្រូវទាំងស្រុង របស់អាជ្ញាធរសាលារាជធានីភ្នំពេញ។

សូមរំលឹកជូនថា នៅក្នុងព្រឹ្តត្តិការណ៍ចុងក្រោយនេះ ពលរដ្ឋ១៥នាក់ត្រូវបានអាជ្ញាធរចាប់ខ្លួនជាបន្តបន្ទាប់ ក្នុង​នោះមានស្ត្រីសកម្មជនមកពីសហគមន៍បឹងកក់ ព្រះសង្ឃ និងមន្ត្រីគណបក្សសង្គ្រោះជាតិ លោក មាជ សុវណ្ណរ៉ា នោះផង។ ក្រុមពលរដ្ឋនិងព្រះសង្ឃទាំងនោះ ត្រូវបានសាលាដំបូងរាជធានីភ្នំពេញ ចោទប្រកាន់ និង​ដាក់​​ពន្ធនាគារ​ក្នុងម្នាក់ៗ/អង្គ ចំនួនមួយឆ្នាំ និងពិន័យជាប្រាក់២លានរៀល ពីបទ«បង្កឧបសគ្គ​ដល់​ចរាចរណ៍» និង​បទ​«រំខាន​ដល់​ការងារមន្ត្រីរាជការសាធារណៈ»។

ដោយឡែក លោក មាជ សុវណ្ណារ៉ា ដែលមានតួនាទី ជាប្រធាន​នាយកដ្ឋាន​ព័ត៌មាន និងប្រព័ន្ធផ្សព្វផ្សាយ​របស់​គណបក្សសង្គ្រោះជាតិ ត្រូវចាប់ខ្លួន ពីបទផ្ដើម​គំនិតឲ្យមានហិង្សា ដោយចេតនា​មាន​ស្ថានទម្ងន់ទោស និង​បទ​ញុះញង់ឲ្យប្រព្រឹត្តបទឧក្រិដ្ឋ និងដឹកនាំ​ចលនា​កុបកម្មខុសច្បាប់ នៅក្នុងព្រឹត្តិការណ៍​វាយតប់គ្នា នាថ្ងៃទី១៥ ខែ​កក្កដា ឆ្នាំ២០១៤កន្លងទៅ។ មន្ត្រីគណបក្សប្រឆាំងរូបនេះ អាចជាប់ពន្ធនាគាររហូត​ដល់៣០ឆ្នាំ បើតុលាការ​រក​ឃើញថា លោកពិតជាមានទោសមែននោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...