អ្នកដំណើរថ្មើរជើង ជាច្រើននាក់ បានរងរបួស ក្នុងព្រឹកថ្ងៃអង្គារនេះ នៅក្នុងព្រឹត្តិការណ៍បើករថយន្ដបុករនាំងសុវត្ថិភាព ដែលស្ថិតនៅខាងមុខអាគាររដ្ឋសភា នៃចក្រភព​អង់គ្លេស កណ្ដាលរាជធានីឡុងដ៍។ នេះ បើតាមការបញ្ជាក់ របស់នគរបាលអង់គ្លេស ដោយបានឲ្យដឹង​បន្ថែមថា ជនអ្នកបើកបររថយន្ដ ត្រូវបានចាប់ខ្លួន។

នៅលើទំព័រទ្វីសធើររបស់ខ្លួន នគរបាលអង់គ្លេស បានសរសេរឲ្យដឹងថា៖ «នៅព្រឹក វេលាម៉ោង ៧ និង៣៧នាទី រថយន្ដមួយគ្រឿង បានបើកបុក ជាមួយនឹងរនាំងសុវត្ថិភាព នៅខាងមុខអាគាររដ្ឋសភា។ អ្នកបើកបរត្រូវបានចាប់ខ្លួនភ្លាមៗ ដោយភ្នាក់ងារនគរបាល ដែលមានវត្តមាន នៅនឹងកន្លែង។ អ្នកដំណើរថ្មើរជើងជាច្រើន បានរងរបួស។»។

Breaking: Big armed police response to car which has cashed into Parliament barriers we are now being moved back pic.twitter.com/rYAqExq6rn

— Vincent McAviney (@VinnyMcAv) 14 août 2018

នគរបាលធ្វើកោសល្យវិច័យ និងក្រុមអ្នកស៊ើបអង្កេតផ្សេងទៀត កំពុងមានវត្តមាន នៅនឹងកន្លែងកើតហេតុ ដើម្បីស្រង់យកទិន្ន័យសំខាន់ៗ ពីក្នុងហេតុការណ៍។

បើតាមសារព័ត៌មានក្នុងស្រុក «Daily Mail» បានឲ្យដឹងថា រថយន្ដខាងលើ បានបើកក្នុងល្បឿន ៨០គីឡូម៉ែត្រ ក្នុងមួយម៉ោង និងមានចេតនា បើកបុកទៅលើអ្នកដំណើរទាំងឡាយ ក្នុងនោះមានអ្នកថ្មើរជើង អ្នកជិះកង់ មុននឹងទៅបុករនាំង នៅខាងមុខអាគាររដ្ឋសភា។ រថយន្ដបង្ក ដែលជាប់គាំងនៅនឹងកន្លែង ត្រូវបានឡោមព័ទ្ធ ដោយកងកម្លាំងអាជ្ញាធរ ហើយអ្នកបើកបររថយន្ដនោះ ត្រូវបាននាំខ្លួនចេញទៅ។

BREAKING: There has been an incident outside of Westminster. Police are urgently clearing the area. More updates to follow. pic.twitter.com/mnKUVI7Npn

— Good Morning Britain (@GMB) 14 août 2018

បើតាមរូបភាពជាច្រើន ដែលត្រូវបានបង្ហោះ នៅតាមបណ្ដាញសង្គម បានបង្ហាញឲ្យឃើញ កងកម្លាំងនគរបាល កំពុងឃាត់ខ្លួន បុរសស្បែកខ្មៅមួយរូប ដែលពាក់ខោខូប៊យ និងអាវធំពណ៌ខ្មៅ។ 

ចក្រភពអង់គ្លេស បានរងការវាយប្រហារជាច្រើន និងបន្តបន្ទាប់គ្នា នៅក្នុងឆ្នាំ២០១៧កន្លងមក ក្នុងនោះការវាយប្រហារចំនួន៤លើក ដែលធ្វើឲ្យមនុស្សស្លាប់ ៣៦នាក់ និងរបួស ២០០នាក់ ត្រូវបានក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) ប្រកាសទទួលស្គាល់ ថាជាស្នាដៃរបស់ក្រុមខ្លួន។ ការវាយប្រហារមួយ កាលពីខែមីនា ឆ្នាំទៅម៉ិញ បាន​កើតឡើង​នៅលើស្ពាន «Westminster» និងខាងមុខអាគាររដ្ឋសភាអង់គ្លេស៕