ហេតុការណ៍ភ្ញាក់ផ្អើល បានកើតឡើង កាលពីវេលាម៉ោង ៤ និង៣០ នាទីទៀបភ្លឺថ្ងៃទី ០៤ ខែកញ្ញា ឆ្នាំ២០១៥ នៅតាមបណ្តោយផ្លូវ២០០៥ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ នោះ គឺស្ត្រីម្នាក់ បាន​សម្រាល​បុត្រ នៅលើរ៉ឺម៉កកង់បីមួយ យ៉ាងអណោចអធ័ម។ ទារកតូច ដែលទើបនឹងកើត ត្រូវអ្នកម្តាយប្រាប់ថា ជា​កូនស្រី ហើយនេះជាកូនទីបី សម្រាប់អ្នកស្រី ជាមួយនឹងស្វាមី ដែលជាកម្មករសំណង់ រកព្រឹកខ្វះល្ងាច។ បន្ទាប់​ពីដឹង ពីហេតុការណ៍នេះ អ្នកដំណើរនៅជិតរ៉ឺមកកង់បី បានរូតរះជួយស្រ្តីជាម្តាយ យកទៅសង្គ្រោះភ្លាមៗ នៅ​មណ្ឌល​សុខភាព ទឹកថ្លា។

តាមប្រសាសន៍ របស់អនុប្រធានមណ្ឌលសុខភាពទឹកថ្លា លោក ប៉ាន ជ្រឹង ប្រាប់នៅថ្ងៃទី០៤ ខែកញ្ញានេះថា ស្ត្រីជាម្តាយ និងទារកដែលទើបនឹងកើត បានឆ្លងផុតពីគ្រោះថ្នាក់ហើយ នៅក្នុងពេលនេះ។ លោកថា អ្វីជាបញ្ហា គឺគ្រួសារដែលមាន តែពីរនាក់ប្ដីប្រពន្ធនេះ គ្មានប្រាក់ សម្រាប់បង់ថ្លៃសេវា មើលសុខភាពឡើយ សូម្បីតែសេវា​សម្រាល របសមណ្ឌលសុខភាព ដែលមានកម្រិត៣០ដុល្លារនេះ ក៏ដោយ។ ដោយហេតុកនេះហើយ លោក​បាន​សម្រេច ជាមួយក្រុមប្រឹក្សាហិរញ្ញប្បទាន ក្នុងមណ្ឌល ថាមិនគិតថ្លៃសេវាសម្រាលនេះទេ ហើយថែម​ទាំង​ជួយបើកថ្នាំ រយៈពេល០៥ថ្ងៃ សម្រាប់ស្រ្តីខាងលើទៀតផង។

ចំពោះការចាកចេញ ពីមន្ទីពេទ្យត្រឡប់ទៅផ្ទះវិញ លោកមិនហ៊ានសម្រេចនោះទេ ព្រោះនៅត្រូវការត្រូត​ពិនិត្យ សុខភាពម្តាយនិងទារក ពីសំណាក់ឆ្មបជំនាញជាមុនសិន ថាអាចចេញ នៅថ្ងៃណាមួយបាន៕