ក្នុងពេលបច្ចុប្បន្ន ស្ថានភាពអ្នកជំងឺ ដែលរងគ្រោះ ដោយម៉ាស៊ីនបោកស្រូវ មានសភាពប្រសើឡើងហើយ បន្ទាប់ពីការ​ព្យាបាល អស់រយៈពេលជាងបីខែ មកនេះ។ ហេតុការណ៍គ្រោះថ្នាក់នោះ បានកើតឡើង កាលពីខែ ធ្នូ ឆ្នាំ២០១៤ នៅឯ​ខេត្ត​ត្បួងឃ្មុំ ហើយក្នុងពេលនេះ ត្រូវបានបញ្ជូន មកស្នាក់ព្យាបាល និងបន្តការវះកាត់ ក្នុ្ងងមន្ទីពេទ្យរូស្ស៊ី។

អ្នកស្រី មិត លីន បានឲ្យទស្សនាវដ្តីមនោរម្យ.អាំងហ្វូដឹងថា គាត់មានសភាពប្រសើរហើយសព្វថ្ងៃ ព្រោះគ្រូពេទ្យ បាន​វះកាត់ស្បែកភ្លៅទាំងសងខាង យកទៅបំពេញលលាដក្បាលដែលបាត់បង់។ ស្ត្រីវ័យ៣៦ឆ្នាំ ដែលមានកូន២នាក់រូបនេះ បានលើកយកសំដីគ្រូពេទ្យ មកបញ្ជាក់ថា លលាដក្បាលអ្នកស្រីទាំងមូល ត្រូវការស្បែកមកប៉ះ ៨បន្ទះ ទើបជិត ដូចនេះ គ្រូពេទ្យសម្រេចវះកាត់ ស្បែកក្បាលពោះបន្ថែម ដើម្បីឲ្យជិតលលាក្បាល។

អ្នកស្ត្រី បានបន្តថា វាមិនធ្ងន់ធ្ងរទេ ព្រោះបានជាសះ នូវកន្លែងមួយចំនួនរួចហើយ តែអ្វីដែលខ្លាំង គឺត្រចៀក​ខាងឆ្វេង​អ្នកស្រីដែលបាត់បង់។ តាមប្រសាសន៍របស់គ្រូពេទ្យ បានឲ្យដឹងថា អ្នកជំងឺត្រូវះកាត់សាច់ឆ្អឹងជំនី ដើម្បីបំពេញ​ត្រចៀក​មកវិញ។

មូលហេតុ ដែលបណ្តាលឲ្យស្រ្តីរងគ្រោះ ឈានដល់ដំណាក់កាលនេះ ដោយសារមុនពេលកើតហេតុ គាត់ជាអ្នកស៊ីឈ្នួល បោះស្រូវឲ្យគេ នៅតាមម៉ាស៊ីនបោកស្រូវ ក្នុងភូមិតាមាន់ ឃុំពញ្ញ៉ាក្រែក ស្រុកពញាក្រែក ខេត្តត្បួងឃ្មុំ។ អ្នកស្រីបាន​រៀប​រាប់​ពីគ្រោះថ្នាក់ទាំងនោះថា ពេលគាត់បោះស្រូវ ចូលក្នុងម៉ាស៊ីន ខ្យល់ប៉ើងខ្សែរអាវរងារ ចូលក្នុងខ្សែរពានម៉ាស៊ីន។ រំពេច​នោះ ម៉ាស៊ីនបានស្រូបយកគាត់ ទៅជាមួយខ្សែរអាវ ចូលទៅក្នុង។ តែសំណាងល្អ មានបុរសម្នាក់ បានទាញអ្នកស្រី ភ្លាមៗ​ចេញ​មកវិញ។ តែគួរឲ្យសោកស្តាយ ក្បាល សក់ និងស្លឹកត្រចៀក លែងមានសភាពដូចដើម ទៅហើយ។

ស្ត្រីរងគ្រោះ បានបញ្ជាក់ទៀតថា គាត់មិនបានប្តឹងទាមទារអ្វី ពីម្ចាស់ម៉ាស៊ីទេ ព្រោះជាអ្នកជិតខាង។ ប៉ុន្តែកាលលពី​ពេល​ភ្លាមៗ ដែលអ្នកស្រីត្រូវបានបញ្ជូនទៅមន្ទីពេទ្យ ម្ចាស់ម៉ាស៊ីនបោកស្រូវ បានចេញថ្លៃព្យាបាល ឲ្យគ្រួសារអ្នកស្រី ១ លាន​រៀល។ នៅថ្ងៃទី១២ ខែមិនា ឆ្នាំ ២០១៥នេះ អ្នកស្រី មិត លីន បានបញ្ជាក់ថា គ្រូពេទ្យនឹងបន្ត ការវះកាត់ត្រចៀកឲ្យគាត់ នៅពេលដែលគាត់ មាន«ថវិកាគ្រប់គ្រាន់»៕