មិនមាននរណាម្នាក់សប្បាយចិត្ត នឹងស្ដាប់ស្នូរសន្ធឹកយន្ដហោះ ដែលលាន់ចង់បែកអាកាសនោះទេ។ ប៉ុន្តែមិនមែនត្រឹម​តែ​ជារឿង ដែលធ្វើឲ្យក្ដៅក្រហាយនោះទេ ព្រោះបើតាមការសិក្សាមួយ នៅប្រទេសអង់គ្លេស បាននិយាយថា ស្នូរសន្ធឹក​យន្ដហោះ បានបង្កើនហនិភ័យកាន់តែខ្លាំងឡើង ទៅលើប្រព័ន្ធសសៃឈាមខួរក្បាល និងបេះដូង ហើយអាចតម្រូវឲ្យ​អ្នក​ជម្ងឺ ត្រូវទៅស្នាក់សម្រាកព្យាបាលនៅក្នុងមន្ទីរពេទ្យ ហើយមានករណីដល់ស្លាប់នោះទៀត។

ព្រលានយន្ដហោះ ហៀដ្សរ៉ូវ នៃទីក្រុងឡុងដ៍ នៅពេលយប់។ (រូបថត ឯកសារ MONOROOM.info)

ទីក្រុងប៉ារីស - នេះជាការសិក្សាស្រាវជ្រាវមួយ របស់ប្រទេសអង់គ្លេស ដែលបានធ្វើទៅលើព្រលានយន្ដហោះធំៗ ចំនួន​ប្រាំពីរនៅទ្វីបអ៊ឺរ៉ុប ប៉ុន្តែបានផ្ដោតសំខាន់ទៅលើ ប្រជាពលរដ្ឋចំនួនជាង ៣,៦លាននាក់ ដែលរស់នៅជុំវិញព្រលាន​យន្ដហោះ ហៀដ្សរ៉ូវ (Heathrow) នៃទីក្រុងឡុងដ៍។

អ្នកសិក្សាស្រាវជ្រាវមួយក្រុម នៃរាជបណ្ឌិតទីក្រុងឡុងដ៍ បានធ្វើសេចក្ដីប្រកាសដ៏រង្គៀសចិត្តមួយ ប៉ះពាល់ទៅដល់តំបន់​ជុំវិញព្រលានយន្ដហោះដ៏ធំជាងគេរបស់ប្រទេស ដែលទទួលយន្ដហោះចេញចូល ច្រើនជាង៤៨០ពាន់ជើងហោះហើរ ក្នុង​មួយឆ្នាំៗ។ ការចាប់អារម្មណ៍ដ៏សំខាន់ជាងគេ ពីសេចក្ដីប្រកាសនោះ គឺទំហំសម្លេងសន្ធឹកយន្ដហោះ ដែលរងទទួល​ដោយ​ប្រជាពលរដ្ឋ អាចបង្កឲ្យមានបញ្ហាសុខភាពទៅដល់ពួកគាត់។

ពួកអ្នកសិក្សា បានធ្វើស្ថិតិទៅលើចំនួនអ្នកជម្ងឺ ដែលបានចូលសម្រាកព្យាបាលក្នុងមន្ទីរពេទ្យ និងបានស្លាប់ដោយ​មាន​ទាក់ទងនឹងបញ្ហាថប់ដង្ហើម ជម្ងឺដាច់សរសៃឈាមខួរក្បាល និងជម្ងឺគាំងបេះដូង។ អ្វីដែលរកឃើញមិនអាច​ប្រកែក​បាន​នោះ គឺបណ្ដាជនជាង ៧០ពាន់នាក់ ដែលរស់នៅក្នុងតំបន់ដែលមានសម្លេងយន្ដហោះ ដែលលើសពី៦៣ dB (ស្មើនឹង​កម្រិតនៃការជជែកគ្នាតឹងសសៃក រវាងមនុស្សពីរនាក់) ទទួលរងគ្រោះនឹងជម្ងឺដាច់សរសៃឈាមខួរក្បាល ដល់ទៅ២៤​ភាគរយ និងជម្ងឺគាំងបេះដូង ១៤ភាគរយ ច្រើនជាងអ្នករស់នៅតំបន់ផ្សេង។

មូលហេតុស៊ីជម្រៅដែលគេរកឃើញ គឺបណ្ដាលមកពីសភាពតឹងតែង និងភាពនឿយណាយ ជាមួយនឹងសម្លេងសន្ធឹក ដែលកម្រិតខ្លាំងៗ និងកើតឡើងដដែលៗ។ សម្លេងសន្ធឹកនេះ បានចូលទៅបំផ្លាញប្រព័ន្ធសសៃឈាមខួរក្បាល និង​បង្កើត​នូវភាពញ័ររណ្ដំដែលប៉ះពាល់យ៉ាងខ្លាំង ដល់មេជីវិតសម្រាប់ចិញ្ចឹមសារពាង្គកាយ។

សូមបញ្ជាក់ថា ការស្រាវជ្រាវបែបនេះ ធ្លាប់បានធ្វើម្ដងរួចហើយ តាំងពីឆ្នាំ២០០១។ តាំងពីពេលនោះមក ក្រិត្យក្រមនៃ​ការ​ទប់សម្លេង ដែលធ្វើឡើងសំដៅកម្រិតក្បួនខ្នាតសំណង់សង់លំនៅដ្ឋាន និងយន្ដហោះ ត្រូវបានពង្រឹង ហើយមនុស្ស​ដែល​រងគ្រោះនឹងបញ្ហាសម្លេងនេះ ក៏បានស្រុតចុះជាខ្លាំងដែរ។ ប៉ុន្តែនៅឆ្នាំ២០១៤ខាងមុខ ព្រលានយន្ដហោះនៃទីក្រុងឡុងដ៍​ដដែលនេះ គ្រោងនឹងសង់ផ្លូវយន្ដហោះទីបីបន្ថែមទៀត។ គម្រោង ដែលបើតាមទំនង អាចនឹងរងការតវ៉ាយ៉ាងខ្លាំងក្លា ពី​បណ្ដាជនរស់នៅតំបន់នោះ៕

-------------------------------------------------
ដោយ៖ ឈូករ័ត្ន - ​ ថ្ងៃទី១២ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ